নিজৰ আহ্বান পাহৰি প্লাষ্টিক বেগত জাবৰ বোটলা বুলি মোদীক টুইটাৰত তীব্ৰ কটাক্ষ

দেশক ছিংগল-য়ুজ প্লাষ্টিকৰ পৰা মুক্ত কৰাৰ আহ্বান আৰু অংগীকাৰক নিজেই অৱমাননা কৰা বুলি একাংশ টুইটাৰ য়ুজাৰে তীব্ৰ কটাক্ষ কৰিছে প্ৰধান মন্ত্ৰী মোদীক।

স্বচ্ছ ভাৰত মোদীৰ এটা সৰ্বদা প্ৰিয় শ্ব’গান আৰু সেইটো প্ৰমাণ কৰিবৰ বাবে প্ৰধান মন্ত্ৰীজনে সুযোগৰ সদ্ব্যৱহাৰ কৰি আহিছে।

১২ অক্টোবৰত মোদীয়ে তামিল নাডুৰ মমল্লাপুৰম সাগৰ তীৰত প্ৰাতঃভ্ৰমণ কৰোঁতে তাত পৰি থকা আৱৰ্জনা বুটলি দেশবাসীৰ বাবে এটা উদাহৰণ দাঙি ধৰিব বিচাৰে আৰু পুৱাতেই তেওঁ কৰা সেই কামৰ এটা ভিডিঅ’ টুইটাৰত আপল’ড কৰে।

তিনি মিনিটৰ ভিডিঅ’টোত প্ৰধান মন্ত্ৰী মোদীক সাগৰ পাৰত পৰি থকা প্লাষ্টিকৰ বটলকে আদি কৰি বিভিন্ন আৱৰ্জনা বুটলি এটা প্লাষ্টিকৰ বেগত ভৰোৱা দেখা যায় আৰু শেষত সেইটো তাত উপস্থিত থকা হোটেলৰ কৰ্মচাৰী এজনৰ হাতত তুলি দিয়ে।

উক্ত ভিডিঅ’টো এ এন আই নামৰ বাতৰি প্ৰতিষ্ঠানটোৱে নিজৰ টুইটাৰ একাউণ্টত শ্বেয়াৰ কৰাৰ পিছত বিভিন্নজনে মোদীৰ হাতত থকা বেগটোক লৈ প্ৰশ্নৰ অৱতাৰণা কৰে।

“তেওঁ জাবৰ বুটলিবলৈ ব্যৱহাৰ কৰা সেইটো ছিংগল য়ুজ প্লাষ্টিকৰ বেগ হয় নে? (Is that a single use plastic bag he’s using to collect garbage?) ”, এ এন আয়ে দিয়া ভিডিঅ’টোৰ উত্তৰ দি মেঘনাদ নামৰ এটা একাউণ্টৰ গৰাকীয়ে কয়।

আন এজনৰ উত্তৰ, “Wah kya acting hai wah Wo bhi plastic ke saath”.

“Collecting small bits of plastic in a bigger plastic bag. Also notice all the decor lights on the beach are covered with plastic sheets.” আন এজন টুইটাৰ য়ুজাৰৰ মন্তব্য।

আদৰ্শ দেৱৰাজ নামৰ এজন য়ুজাৰৰ মন্তব্য, “জাবৰ সংগ্ৰহ কৰিবলৈ ছিংগল য়ুজ প্লাষ্টিকৰ ব্যৱহাৰ!! মোদীজীয়ে ইয়াৰ দ্বাৰা কি বাৰ্তা দিব বিচাৰিছে? যেতিয়া হেডলাইনৰ বাবে কিবা কৰা হয়, তেতিয়াই এনেকুৱা হয়।”

প্ৰধান মন্ত্ৰী মোদীয়ে যোৱা ১৫ আগষ্টৰ স্বাধীনতা দিৱসৰ কাৰ্য্যসূচীত ছিংগল য়ুজ প্লাষ্টিকৰ বিৰুদ্ধে এক প্ৰকাৰৰ জেহাদ ঘোষণা কৰিছিল আৰু দেশক ছিংগল য়ুজ প্লাষ্টিকমুক্ত কৰিবলৈ দেশবাসীক উদাত্তকণ্ঠে আহ্বান জনাইছিল।

২ অক্টোবৰৰ পৰা মোদী চৰকাৰে ছিংগল য়ুজ প্লাষ্টিকৰ ৬টা প্ৰডাক্ট নিষিদ্ধ কৰাৰ কথা আছিল যদিও সেয়া কৰিব নোৱাৰি বুলি ১ অক্টোবৰত জানিবলৈ দিয়ে।

নিষিদ্ধ কৰাৰ পৰিৱৰ্তে প্ৰধান মন্ত্ৰীজনে দেশবাসীক এই ধৰণৰ প্লাষ্টিকৰ ব্যৱহাৰ কমাবলৈ আহ্বান জনাই আহিছে আৰু চৰকাৰীভাৱে ইয়াক বৰ্জনৰ সজাগতা সৃষ্টিৰ পদক্ষেপ লোৱা হৈছে।

এই পটভূমিত ১২ অক্টোবৰৰ ভিডিঅ’টোত প্ৰধান মন্ত্ৰী মোদীৰ এই স্ববিৰোধ কাৰ্য্যই টুইটাৰ য়ুজাৰসকলৰ অসন্তুষ্টি জগাই তোলে আৰু তেওঁক তীব্ৰ কটাক্ষ আৰু সমালোচনাৰে থকাসৰকা কৰে।

অৱশ্যে মোদীয়ে টুইটাৰতে আৱৰ্জনাৰ বেগটোৰ বাদে আনখন হাতত লৈ থকা বস্তুটো সম্পৰ্কেহে স্পষ্টীকৰণ দিয়ে। ভিডিঅ’টোত এটা টৰ্চৰ দৰে দেখা সেই বস্তুটো এটা আকুপ্ৰেচাৰ ৰোলাৰ, যিটো তেওঁ প্ৰায়ে ব্যৱহাৰ কৰে, স্পষ্টীকৰণটোত প্ৰধান মন্ত্ৰী মোদীৰ মন্তব্য।