টুইটাৰৰ চিইঅ’ ইলন মাস্কৰ বিৰুদ্ধে গোচৰ। চাকৰি হেৰুওৱা শীৰ্ষ তিনিগৰাকী বিষয়াৰ সৈতে কোম্পানীটোৰ প্ৰাক্তন মুখ্য কাৰ্যবাহী বিষয়া পৰাগ আগৰৱালাই এই গোচৰ ৰুজু কৰে। সোমবাৰে এই গোচৰ ৰুজু কৰি তেওঁলোকে প্ৰাপ্য ধন পৰিশোধ কৰিবলৈ দাবী জনাইছে।
কোটিপতি ইলন মাস্কে যোৱা বছৰ টুইটাৰ ক্ৰয় কৰিছিল। পিছত তেওঁ কোম্পানীটোৰ চিইঅ’ৰ দায়িত্ব লয়। ভাৰতীয় মূলৰ মুখ্য কাৰ্যবাহী বিষয়া পৰাগ আগৰৱালাকে ধৰি কেইবাগৰাকীও শীৰ্ষ কাৰ্যবাহীক বৰ্খাস্ত কৰা হয়। এই তালিকাত আছিল টুইটাৰৰ প্ৰাক্তন মুখ্য আইনী বিষয়া বিজয়া গাড্ডে আৰু প্ৰাক্তন মুখ্য বিত্তীয় বিষয়া নেড চেগাল।
লগতে পঢ়ক: আই এ এছ বিষয়া শেৱালী দেৱী শৰ্মাৰ বিৰুদ্ধে ১০৫ কোটি টকা আত্মসাতৰ অভিযোগ; হ’ব পাৰে গ্ৰেপ্তাৰ
এতিয়া এজাহাৰ দাখিল কৰি পৰাগ, বিজয়া আৰু নেডে দাবী কৰিছে যে টুইটাৰৰ পৰা চাকৰি হেৰুৱাই গোচৰৰ তদন্ত আৰু বিচাৰৰ বাবে ধন দিবলগীয়া হৈছে। আইনগতভাৱে টুইটাৰ কৰ্তৃপক্ষই এই খৰচ বহন কৰিবলৈ বাধ্য। কিন্তু এই খৰচ আদায় দিয়া হোৱা নাই। সেয়েহে তেওঁলোকে পাবলগীয়া হিচাপত ১০ লাখ ডলাৰতকৈ অধিক ধন আদায়ৰ বাবে গোচৰ তৰে।
ইলন মাস্কে যোৱা বছৰৰ মাৰ্চ মাহত টুইটাৰ ক্ৰয়ৰ প্ৰক্ৰিয়া আৰম্ভ কৰিছিল। সেই বছৰৰ ১৪ এপ্ৰিলত কোটিপতিগৰাকীয়ে টুইটাৰ সম্পূৰ্ণৰূপে ক্ৰয় কৰাৰ ৰাজহুৱা ঘোষণা কৰে। অভিযোগ আৰু প্ৰতি অভিযোগৰ হুলস্থুল, চুক্তিৰ পৰা আঁতৰি অহাৰ ঘোষণা আৰু অৱশেষত আদালতত হাজিৰ হোৱাৰ পিছত অৱশেষত অক্টোবৰ মাহত মাস্ক টুইটাৰৰ মালিক হৈ পৰে।
টুইটাৰৰ মালিকীস্বত্ব লোৱাৰ পিছত ইলন মাস্কে শীৰ্ষ কাৰ্যবাহীক চাকৰিৰ পৰা বৰ্খাস্ত কৰাৰ উপৰিও বিভিন্ন নতুন নিয়ম প্ৰণয়ন কৰিবলৈ আৰম্ভ কৰে। ইয়াৰ ভিতৰত আছিল গ্ৰাহকৰ বাবে মাহে ৮ ডলাৰ (৭.৯৯ ডলাৰ)ত টুইটাৰৰ ‘ব্লু টিক’ সেৱা প্ৰৱৰ্তন কৰা, কৰ্মচাৰীক অধিক সময় (১২ ঘণ্টা) কাম কৰিবলৈ কোৱা, ঘৰৰ পৰা কাম কৰি থকাসকলক অফিচলৈ আহিবলৈ নিৰ্দেশ দিয়া ইত্যাদি।
লগতে পঢ়ক: শচীন পাইলটৰ অনশন ‘দল বিৰোধী কাৰ্যকলাপ’! গেহলটৰ কাষত থিয় দি কঠোৰ বাৰ্তা কংগ্ৰেছ নেতৃত্বৰ
শেহতীয়াকৈ কৰ্মচাৰী ছাটাই কৰিও ইলন মাস্কে চৰ্চালৈ আহিছিল। টুইটাৰে ৰাজহ হ্ৰাস পোৱাৰ কাৰণে যোৱা নৱেম্বৰ মাহত একেটা পদক্ষেপতে ৩৭০০ শ্ৰমিকক চাকৰিৰ পৰা বৰ্খাস্ত কৰিছিল। ইয়াৰ পিছতো কোম্পানীয়ে কেইবাটাও ৰাউণ্ডত কৰ্মচাৰীক চাকৰিৰ পৰা বৰ্খাস্ত কৰিছিল।
