নিয়মীয়া প্ৰশিক্ষণ অভিযানত থকা ভাৰতীয় বায়ুসেনাৰ ছুখই ছু-৩০এমকেআই যুদ্ধ বিমানখন বৃহস্পতিবাৰে (৫ মাৰ্চ) কাৰ্বি আংলং জিলাত দুৰ্ঘটনাগ্ৰস্ত হয়। এই ঘটনাত দুজন পাইলট নিহত হোৱা বুলি বিষয়াসকলে জানিবলৈ দিয়ে।
দুৰ্ঘটনাত গুৰুতৰভাৱে আঘাতপ্ৰাপ্ত স্কোয়াড্ৰন লীডাৰ অনুজ আৰু ফ্লাইট লেফটেনেণ্ট পূৰ্বেশ দুৰগকাৰৰ মৃত্যু হোৱা বুলি আই এ এফে নিশ্চিত কৰিছে। বিষয়া দুগৰাকীৰ পৰিয়াললৈ সমবেদনা জ্ঞাপন কৰিছে বাহিনীয়ে।
বায়ুসেনাই এক বিবৃতিত কয় যে, ‘আই এ এফে ছু-৩০ দুৰ্ঘটনাত গুৰুতৰভাৱে আঘাতপ্ৰাপ্ত স্কোয়াড্ৰন লীডাৰ অনুজ আৰু ফ্লাইট লেফটেনেণ্ট পূৰ্বেশ দুৰগকাৰক হেৰুৱাইছে।‘
যোৰহাটৰ পৰা সন্ধিয়া প্ৰায় ৬.৪৫ বজাত উৰা মাৰিছিল বিমানখন আৰু প্ৰায় ৭.৪২ বজাত গ্ৰাউণ্ড নিয়ন্ত্ৰণৰ সৈতে ৰাডাৰৰ যোগাযোগ হেৰুৱাই পেলায়। ইয়াৰ পিছতে অঞ্চলটোত অনুসন্ধান আৰু উদ্ধাৰ অভিযান আৰম্ভ কৰা হয়।
বিমানখন নামি পৰাৰ কিছু সময়ৰ পিছতে স্থানীয় বাসিন্দাসকলে প্ৰচণ্ড বিস্ফোৰণ শব্দ শুনিবলৈ পোৱা বুলি জনায়। স্থানীয় লোকসকলে অনুসন্ধান অভিযানত সহায় কৰে। এই দুৰ্ঘটনাৰ পিছতে বায়ুসেনাৰ আৰক্ষীৰ দলৰ সৈতে আৰক্ষীৰ লোক অঞ্চলটোত উপস্থিত হয় আৰু দুৰ্ঘটনাস্থলীত তালাচী অভিযান চলায়।
ছু-৩০এমকেআই হৈছে ৰাছিয়াৰ বিমান নিৰ্মাতা কোম্পানী ছুখ’ইয়ে নিৰ্মাণ কৰা দ্বৈত ইঞ্জিনযুক্ত যুঁজাৰু বিমান আৰু ই ভাৰতীয় বায়ুসেনাৰ যুদ্ধ বহৰৰ এক মূল অংশ।
