অহা চাৰি এপ্ৰিলৰ পৰা সাত এপ্ৰিললৈকে মালেয়েছিয়াত অনুষ্ঠিত হ’ব লগীয়া চতুৰ্থ বাৰ্ষিক ১০১ পাঞ্জা প্ৰতিযোগিতাত অংশগ্ৰহণ কৰিব অসমৰ দুজন পাঞ্জা খেলুৱৈয়ে। যুৱ খেলুৱৈ দুগৰাকীৰ এজন তেজপুৰৰ দীপক দাস আৰু আনজন গুৱাহাটীৰ প্ৰাণজিৎ শইকীয়া।
উল্লেখ্য যে, ৯০ কিলোগ্ৰাম শাখাত বিশ্বৰ সপ্তম স্থানত থকা তথা ভাৰতৰ চতুৰ্থ ৰেংকপ্ৰাপ্ত খেলুৱৈগৰাকীৰ লগতে গুৱাহাটীৰ প্ৰাণজিৎ শইকীয়াও এই বিশ্বমানৰ প্ৰতিযোগিতাখনত অংশগ্ৰহণ কৰিব। ৮৬ কিলোগ্ৰাম শাখাৰ পাঞ্জা খেলুৱৈ শইকীয়াৰ বিশ্ব ৰেংকিং এক হোৱাৰ বিপৰীতে ভাৰতত তেওঁ ‘চেম্পিয়ন অব চেম্পিয়ন’ৰ খিতাপ অৰ্জন কৰিছে।
ইফালে, ২০১৬ৰ পৰাই পাঞ্জা খেলিবলৈ আৰম্ভ কৰিছিল তেজপুৰ মিশ্যন চাৰিআলি নিৱাসী পাঞ্জা খেলুৱৈ দীপক দাসে। দাসে ইতিমধ্যে এই খেলবিধত নিজৰ দক্ষতা ৰাষ্ট্ৰীয় পৰ্যায়ত দাঙি ধৰিছে। ৱাৰিয়ৰ্ছ ক্লাবৰ সদস্য দাসে ২০১৮ত লক্ষ্ণৌত অনুষ্ঠিত সৰ্বভাৰতীয় পাঞ্জা প্ৰতিযোগিতাত আৰু বেংগালুৰুত অনুষ্ঠিত বুলডগ এছ’চিয়েশ্যনৰ দ্বাৰা আয়োজিত প্ৰতিযোগিতাত ব্ৰঞ্জৰ পদক অৰ্জনেৰে তেজপুৰলৈ গৌৰৱ কঢ়িয়াই আনিবলৈ সক্ষম হৈছিল।
আনহাতে, যোৱা মাৰ্চত বেংগালুৰুত য়ু আৰ পি এ ৱৰ্ল্ড ৰেংকিং ছিৰিজত অংশগ্ৰহণ কৰি বিশ্বৰ সপ্তম স্থান অৰ্জন কৰাৰ সূত্ৰেই দাসে ৬ এপ্ৰিলত মালয়েছিয়াত অনুষ্ঠিতব্য আন্তঃৰাষ্ট্ৰীয় প্ৰিমিয়াৰ লীগ পাঞ্জা প্ৰতিযোগিতাখনত অংশগ্ৰহণৰ সুযোগ লাভ কৰিছে।
জানিব পৰা মতে প্ৰতিযোগিতাখনত অংশ গ্ৰহণৰ বাবে দুয়োগৰাকী খেলুৱৈয়ে অহা ৩ এপ্ৰিলত গুৱাহাটীৰ পৰা মালয়েছিয়ালৈ যাত্ৰা কৰিব।