পেঙেৰী হত্যাকাণ্ডত জড়িত দুই অভিযুক্তক গ্ৰেপ্তাৰ
যোৱা ১৯ অক্টোবৰত তিনিচুকীয়া জিলাৰ পেঙেৰী আৰক্ষীৰ থানাৰ অধীনৰ খাটাংপানী চাহ বাগিছাত সংঘটিত হত্যাকাণ্ডৰ সৈতে জড়িত দুজন ব্যক্তিক পেঙেৰী আৰক্ষীয়ে বুধবাৰে গ্ৰেপ্তাৰ কৰে।
গ্ৰেপ্তাৰ কৰা লোকদুজনক খাটাংপানী চাহ বাগিছা অঞ্চলৰ বিৰাল উৰাং (৪০) আৰু ধৰম সিং উৰাং (৩৫) বুলি চিনাক্ত কৰা হৈছে।
উল্লেখযোগ্য যে যোৱা ২০ অক্টোবৰৰ চাহ জনগোষ্ঠীয় ৰাইজৰ পৱিত্ৰ অনুষ্ঠান কৰম পূজাৰ মাজতে খাটাংপানী চাহ বাগিছাত ৰঞ্জিত গোৱালা নামৰ এজন ১৬ বছৰীয়া কিশোৰৰ মৃতদেহ উদ্ধাৰ হৈছিল।
লগতে পঢ়ক : কৰম সন্মিলনৰ মাজতে কিশোৰৰ উলংগ মৃতদেহ উদ্ধাৰ; পেঙেৰীত চাঞ্চল্য
অভিযানৰ নেতৃত্ব দিয়া তিনিচুকীয়াৰ উপ আৰক্ষী অধীক্ষক সমৰজ্যোতি ভুঞাই কয়, ‘শনিবৰে সংঘটিত এগৰকী কিশোৰৰ হত্যাকাণ্ডত জড়িত ২জন ব্যক্তিক আমি গ্ৰেপ্তাৰ কৰিছো।‘
আনহাতে উক্ত হত্যাকাণ্ডত জড়িত থকা আন এগৰাকী ব্যক্তিয়ে যোৱা দেওবাৰে আত্মহত্যা কৰে বুলি ভুঞাই লগতে কয়। আত্মহত্যা কৰা লোকজনৰ নাম জগত গগৈ (৪০)।
হত্যাকাণ্ডৰ কথা স্বীকাৰ কৰি অভিযুক্ত ধৰম সিং উৰাঙে কয় যে পাৰিশ্ৰমিক সম্পৰ্কীয় এক বিবাদক লৈ সূত্ৰপাত হোৱা কাজিয়াৰ পিছতে কিশোৰ গৰাকীক হত্যা কৰা হয়।
ইতিমধ্যে গ্ৰেপ্তাৰ কৰা ব্যক্তি দুজনক ভাৰতীয় দণ্ডবিধিৰ ৩০২ নং ধাৰা অধীনত গোচৰ ৰুজু কৰি জে’ললৈ প্ৰেৰণ কৰা হৈছে।
তাৎক্ষণিক ব্যৱস্থা লৈ হত্যাকাৰী কেইজনক গ্ৰেপ্তাৰ কৰাৰ বাবে সদৌ অসম চাহ জনগোষ্ঠী ছাত্ৰ সন্থা (আটছা)ৰ পেঙেৰী আঞ্চলিক সমিতিয়ে আৰক্ষীক ধন্যবাদ জনায়।