ডিব্রুগড়ত মহৰমৰ দিনা তাজিয়াৰ নামত উদ্ভণ্ডালি কৰাৰ অভিযোগত আৰক্ষীয়ে এগৰাকী কংগ্ৰেছ নেতাক গ্ৰেপ্তাৰ কৰিছে। আৰক্ষীয়ে গ্ৰেপ্তাৰ কৰা কংগ্ৰেছী নেতাজনৰ নাম হৈছে জাভেদ আখতাৰ খান ওৰফে আজাদ খান।
তেওঁকে ধৰি উক্ত ঘটনাৰ সৈতে জড়িত থকাৰ অভিযোগত দুজন লোকক গ্ৰেপ্তাৰ কৰা হৈছে। বুধবাৰে ডিব্ৰুগড় আৰক্ষীয়ে ফুলকান আলী নামৰ আন এজন যুৱকক গ্ৰেপ্তাৰ কৰিছিল।
উল্লেখযোগ্য যে যোৱা ১০ ছেপ্টেম্বৰত মহৰমৰ দিনা একাংশ উন্মত্ত লোকে তাজিয়া প্ৰদৰ্শনৰ নামত ডিব্ৰুগড়ৰ ৰাজপথত উদ্ভণ্ডালিৰ সৃষ্টি কৰিছিল। তেওঁলোকৰ একাংশই ভাঙি চুৰমাৰ কৰিছিল পথত ৰখাই থোৱা কেইবাখনো গাড়ী।
উক্ত ঘটনাই সমগ্ৰ ৰাজ্যজুৰি ব্যাপক প্ৰতিক্ৰিয়াৰ সৃষ্টি কৰাৰ লগতে সকলো সচেতন লোকেই এই কাৰ্যক তীব্ৰ ভাষাৰে গৰিহণা দিছিল আৰু দোষীক অনতিপলমে গ্ৰেপ্তাৰ কৰাৰ দাবী তুলিছিল।
ইয়াৰ পিছতেই ডিব্ৰুগড় আৰক্ষীয়ে ঘটনা সন্দৰ্ভত ১৫২৩/১৯ নম্বৰত এটা গোচৰ ৰুজু কৰি তদন্ত আৰম্ভ কৰে। ডিব্ৰুগড়ৰ আৰক্ষী অধীক্ষক সুভাষিণী শংকৰণে সংবাদ মাধ্যমৰ আগত কয় যে আইন উলংঘন কৰা কোনো লোককেই ৰেহাই দিয়া নহ’ব।
ইপিনে কংগ্ৰেছী নেতা জাভেদ আখতাৰ খানক গ্ৰেপ্তাৰৰ পাছতে ডিব্ৰুগড়ত উত্তপ্ত পৰিস্থিতিৰ সৃষ্টি হৈছে। খানৰ একাংশ সমৰ্থকে আজি ডিব্ৰুগড় আৰক্ষী থানাৰ সন্মুখলৈ আহি তেওঁক মুকলি কৰি দিয়াৰ দাবীত প্ৰতিবাদ সাব্যস্ত কৰে।
