জাপানৰ ৰাজধানী টকিঅ’ত শুকুৰবাৰৰ পৰা আৰম্ভ হ’ব অলিম্পিক ক্ৰীড়া। কিন্তু তাৰ পূৰ্বে খেলুৱৈসকলৰ মাজত কৰ’নাৰ সংক্ৰমণ কোনোপধ্যে ৰোধ কৰাটো সম্ভৱ হৈ উঠা নাই।
বৃহস্পতিবাৰে পুনৰ নতুনকৈ দুজন কৰ’নাত আক্ৰান্ত হোৱাৰ খৱৰ পোৱা গৈছে। আক্ৰান্ত দুয়োজনেই অলিম্পিক ভিলেজত আছিল।
আয়োজক সমিতিয়ে জানিবলৈ দিয়া মতে দুজন এথলেটকে ধৰি নতুনকৈ আক্ৰান্তৰ সংখ্যা হৈছে ১২জন। এতিয়া খেল আৰম্ভ হোৱাৰ পূৰ্বে মুঠ আক্ৰান্তৰ সংখ্যা হৈছেগৈ ৮৭জন।
টকিঅ’ত যোৱা বছৰেই অলিম্পিক গেমছ অনুষ্ঠিত হোৱাৰ কথা আছিল যদিও কৰ’নাৰ সংক্ৰমণৰ কাৰণে কাৰ্যসূচী সলনি হয়। বিধি-নিয়মো বহুত সলনি হৈ গৈছে।
এতিয়া ইচ্ছা কৰিলেই খেলুৱৈসকলে পৰস্পৰৰ সৈতে মুকলিভাৱে মিলিত হ’ব নোৱাৰে। আনকি বিজয়ী এললেটসকলে নিজৰ পদক নিজেই ডিঙিত আঁৰি ল’ব লাগিব।
এইবাৰৰ অলিম্পিকত ৩৩টা ক্ৰীড়াৰ ৩৩৯টা ইভেন্টত ১১হাজাৰৰো অধিক এথলেটে অংশ গ্ৰহণ কৰাৰ কথা। ইয়াৰ মাজতে বিভিন্ন কাৰণত বহু এথলেটে নিজক অলিম্পিকৰ পৰা অঁতৰাই নিছে। তদুপৰি, সম্পূৰ্ণ দৰ্শকশূন্যভাৱে আয়োজন কৰা হৈছে এইবাৰৰ অলিম্পিক।
