গুৱাহাটীৰ জু-ৰোডত সংঘটিত গ্ৰেনেড বিস্ফোৰণৰ পৰৱৰ্তী পৰ্যায়ত ৰাজ্যত আৰক্ষী বাহিনীয়ে আলফা (স্বা)ৰ গতিবিধিক লৈ চোকা দৃষ্টি ৰাখি অহাৰ সময়তে আজি বকোত আলফাৰ নামত ধন দাবী কৰি দুজন ভুৱা উগ্ৰপন্থী গ্ৰেপ্তাৰ হ’ব লগীয়া হ’ল।
ধৃত যুৱক দুজনক অনল নাৰ্জাৰী আৰু মোনা বিশ্বাস বুলি চিনাক্ত কৰা হৈছে।
বকো আৰক্ষী থানাৰ এগৰাকী বিষয়াই জনোৱা মতে যুৱক দুজনে যোৱা ৭ মে’ৰ পৰা ছয়গাঁওস্থীত অনুভৱ ইণ্ডাষ্টিছ নামৰ এটা বেকাৰী ফেক্টৰীৰ মেনেজাৰক নিজকে আলফাৰ সদস্য বুলি কৈ ১ লাখ টকা দাবী কৰি আহিছিল।
পিছত কালি অৰ্থাৎ ২৮ মে’ত দাবী কৰা টকা নিবলৈ আহোতে ইয়াৰে অনল নাৰ্জাৰী নামৰ যুৱকজনক আৰক্ষীয়ে হাতে লোটে আটক কৰিবলৈ সক্ষম হয়। ধৃত নাৰ্জাৰীৰ ভাষ্যৰ ভিত্তিত কালি নিশা দুধনৈৰ পৰা মোনা বিশ্বাস নামৰ আনজন যুৱকক আটক কৰা হয় বুলি বিষয়া গৰাকীয়ে লগতে জনায়।
আনহাতে এই সমগ্ৰ ঘটনাৰ সৈতে আৰু কেইজনমান লোক জড়িত আছে বুলি মন্তব্য কৰি তেওঁ উক্ত লোকেইজনক বিচাৰি আৰক্ষীয়ে তদন্ত আৰম্ভ কৰিছে বুলি জানিবলৈ দিয়ে।
