ৰৱিন্দৰ সিং নামৰ এজন ২৫ বছৰীয়া শিখ যুৱকক পাকিস্তানত আজি অচিনাক্ত আততায়ীয়ে গুলীয়াই হত্যা কৰে। পেছৱাৰৰ ছামকানি আৰক্ষী থানাৰ অধীনৰ এটা অঞ্চলত পৰি থকা অৱস্থাত যুৱকজনৰ মৃতদেহটো পোৱা যায়।
প্ৰায় ৪০০ উন্মত্ত মুছলিম লোকে নানকানত থকা এটা গুৰুদ্বাৰত আক্ৰমণ কৰাৰ দুদিন পিছতে ঘটা ঘটনাটোৱে দেশখনত থকা ধৰ্মীয় সংখ্যালঘুসকলৰ জীৱনৰ শংকা গভীৰ কৰি তুলিছে।
পাকিস্তানৰ সংবাদ মাধ্যমৰ বাতৰি অনুসৰি ৰৱিন্দৰ মালয়েছিয়াত থাকে আৰু তাৰ পৰা অলপতে ঘৰলৈ আহিছিল আৰু ঘটনাটোৰ সময়ত তেওঁ নিজৰ বিয়াৰ বাবে পেছোৱাৰত বজাৰ কৰিবলৈ গৈছিল। তেওঁৰ ককায়েক এজন নিউজ এংকৰ বুলি জানিব পৰা গৈছে।
আৰক্ষীয়ে এতিয়ালৈকে হত্যাকাৰীক ধৰিব পৰা নাই।
ভাৰতে এই ঘটনাৰ গৰিহণা দিছে আৰু আজি পাকিস্তান চৰকাৰক যোগাযোগ কৰি অপৰাধীক ধৰি শাস্তি দিয়াৰ দাবী জনাইছে।
“ভাৰতে পাকিস্তান চৰকাৰৰ সৈতে যোগাযোগ কৰিছে আৰু অজুহাত দেখুওৱাৰ পৰা বিৰত থাকিবলৈ আৰু এই কাৰ্য্যত জড়িতসকলক ধৰিবৰ বাবে আৰু দৃষ্টান্তমূলক শাস্তি দিয়াৰ বাবে তৎক্ষণাত কাৰ্য্য ব্যৱস্থা ল’বলৈ দাবী জনাইছে”, বৈদেশিক পৰিক্ৰমা মন্ত্ৰ্যালয়ৰ উদ্ধৃতি ইণ্ডিয়া টুডেত।
আনহাতে মাত্ৰ দুদিনৰ অগা-পিছাকৈ ঘটা এই দুয়োটা ঘটনা ভাৰতৰ ৰাজনৈতিক পৰিস্থিতিৰ প্ৰতিফলন বুলি আখ্যা দিছে একাংশই।
CAA বা নাগৰিকত্ব (সংশোধন) আইনে পাকিস্তান, বাংলাদেশত ধৰ্মীয় সংখ্যালঘুৰ ওপৰত নিৰ্য্যাতন বৃদ্ধি কৰিব বুলি বিভিন্ন মহলে মত আগ বঢ়াই আহিছে।
নাগৰিকত্ব সংশোধনী বিধেয়ক গৃহীত হোৱাৰ দিনটোতে বাংলাদেশৰ হিন্দু, বৌদ্ধ, খ্ৰীষ্টান ঐক্য পৰিষদে এখন সংবাদমেল দি কৈছিল যে এই বিধেয়ক/আইনখনে দেশখনত সংখ্যালঘুসকলৰ ওপৰত উৎপীড়ন চলাই তেওঁলোকক দেশত্যাগ কৰাবলৈ বিচৰা ইছলামিক মৌলবাদীসকলক উৎসাহিত কৰিব।
এইবোৰ ঘটনাৰ প্ৰতি শূন্য সহনশীলতা দেখুওৱা হ’ব : ইমৰান খান
পাকিস্তানৰ প্ৰধান মন্ত্ৰী ইমৰান খানে এই দুয়োটা ঘটনাক গৰিহণা দিছে আৰু কৈছে যে ই তেওঁৰ দৃষ্টিকোণৰ সম্পূৰ্ণ বিপৰীত আৰু ইয়াৰ প্ৰতি “শূন্য সহনশীলতা” প্ৰদৰ্শন কৰা হ’ব।
খানে ভাৰতত মুছলমানসকলৰ লগতে অন্যান্য সংখ্যালঘুসকলৰ ওপৰত চলি থকা নিৰ্য্যাতনৰো গৰিহণা দিয়ে। তেওঁ কয়, “নৰেন্দ্ৰ মোদীৰ মতলব হ’ল সংখ্যালঘুৰ ওপৰত চলা উৎপীড়নক সমৰ্থন আগ বঢ়াই যোৱা।”
