কাজিৰঙা ৰাষ্ট্ৰীয় উদ্যানৰ গঁড়ৰ সুৰক্ষাৰ লগতে বন্যপ্ৰাণী অপৰাধ নিয়ন্ত্ৰণত সহায়ক হোৱাকৈ দেশৰ আগশাৰীৰ সংগঠন আৰণ্যকে ৱাইল্ড লাইফ কনজাৰভেশ্যন নেটৱৰ্কৰ ৰাইন’ ৰেচকিউ ফাণ্ডৰ সহায়ত আজি গোলাঘাট জিলা আৰু নগাঁও জিলা আৰক্ষীক একোখনকৈ বলেৰ’ কেম্পাৰ বাহন প্ৰদান কৰে।
এই উপলক্ষে আজি কহঁৰাস্থিত আৰক্ষী অতিথিশালাত আয়োজিত এক অনুষ্ঠানত কাজিৰঙা ৰাষ্ট্ৰীয় উদ্যানৰ সঞ্চালক পি. শিৱকুমাৰ, গোলাঘাট জিলাৰ আৰক্ষী অধীক্ষক পুষ্পৰাজ সিং আৰু নগাঁও জিলাৰ আৰক্ষী অধীক্ষক গৌৰৱ অভিজিত দিলীপৰ উপৰিও অনান্য আৰক্ষী বিষয়াও উপস্থিত থাকে।
অনুষ্ঠানত আৰণ্যকৰ সচিব প্ৰধান ডঃ বিভৱ কুমাৰ তালুকদাৰে আনুষ্ঠানিকভাৱে গোলাঘাট জিলাৰ আৰক্ষী অধীক্ষক পুষ্পৰাজ সিং আৰু কলিয়াবৰৰ মহকুমা আৰক্ষী বিষয়া মৃন্ময় দাসৰ হাতত বাহন দুখন অৰ্পণ কৰে।
অনুষ্ঠানটোত বক্তব্য প্ৰদান কৰি ডঃ বিভৱ কুমাৰ তালুকদাৰে গড়ঁ হত্যা আৰু অন্যান্য বন্যপ্ৰাণী অপৰাধসমূহৰোধ কৰাত অসম আৰক্ষী বিষয়াসকলে গ্ৰহণ কৰা সক্ৰিয় ভূমিকাক প্ৰশংসা কৰে আৰু অসম গৌৰৱ এশিঙীয়া গড়ঁক নিৰাপত্তা প্ৰদান কৰাত গোলাঘাট আৰু নগাঁও জিলাৰ আৰক্ষী বাহিনীৰ শলাগ লয় ।
উল্লেখ্য যে ইয়াৰ পূৰ্বেও আৰণ্যকে বন্যপ্ৰাণী অপৰাধ ৰোধ কৰাৰ বাবে গোলাঘাট জিলা আৰক্ষীক ছখন মটৰচাইকেল প্ৰদান কৰিছিল।
২০১৯-২০ বৰ্ষত কাজিৰঙা ৰাষ্ট্ৰীয় উদ্যানত থকা গঁড় আৰু অন্যান্য বন্যপ্ৰাণী সুৰক্ষা আৰু নিৰীক্ষণৰ বাবে উদ্যানখনৰ কৰ্তৃপক্ষক চাৰিখন ৪ চকীয়া বাহন আৰণ্যকে প্ৰদান কৰাৰ উপৰিও যোৱা আগষ্ট মাহত কাৰ্বিআংলং জিলাৰ আৰক্ষীক জিলাখনত চলি থকা বন্যপ্ৰাণী অপৰাধ ৰোধ কৰাৰ বাবে এখন বলেৰ’ কেম্পাৰ প্ৰদান কৰিছিল ।
আজিৰ অনুষ্ঠানত বক্তব্য প্ৰদান কৰি গোলাঘাট জিলাৰ আৰক্ষী অধীক্ষক পুষ্পৰাজ সিঙে আৰণ্যকৰ এই পদক্ষেপৰ বাবে ধন্যবাদ প্ৰদান কৰাৰ বিপৰীতে নগাঁও জিলাৰ আৰক্ষী অধীক্ষক গৌৰৱ অভিজিত দিলীপেও আৰণ্যকৰ প্ৰতি কৃতজ্ঞতা প্ৰকাশ কৰে।
অনুষ্ঠানটিত বোকাখাতৰ মহকুমা আৰক্ষী বিষয়া পৃথ্বীৰাজ ৰাজখোৱা, আৰণ্যকৰ বাঘ গৱেষণা আৰু সংৰক্ষণ বিভাগৰ প্ৰধান ডঃ ফিৰোজ আহমেদ, আইন আৰু উপদেষ্ট গোটৰ প্ৰৱন্ধক মানস কুমাৰ ভট্টাচার্য আৰু কাজিৰঙাৰ জ্যোষ্ঠ সাংবাদিক স্বপন নাথো উপস্থিত আছিল।
