Martyrs remembered: অসমৰ ইতিহাসত ১৮৩০ চনৰ আজিৰ দিনটোতে জাতীয় বীৰ পিয়লী ফুকন আৰু জীউৰাম দুলীয়া বৰুৱাক বৃটিছে ফাঁচী কাঠত ওলমাইছিল।
আজি এই দুই বীৰ শ্বহীদক স্মৰণ কৰা হয় শিৱসাগৰত।
শিৱসাগৰৰ বৰপুখুৰী পাৰত থকা শ্বহীদ পিয়লি ফুকনৰ প্ৰতিমূৰ্তি আৰু জীউৰাম দুলীয়া বৰুৱাৰ সমাধিত আজি পুৱা ৰংপুৰ প্ৰাচীন কীৰ্তিচিহ্ন সংৰক্ষণ সমিতিৰ লগতে বহু ছাত্ৰ-ছাত্ৰীয়ে বন্তি প্ৰজ্বলন আৰু মাল্যাপৰ্ণ কৰি দুয়োগৰাকী জাতীয় বীৰক শ্ৰদ্ধাৰে স্মৰণ কৰে।
ভাৰতৰ ইতিহাসৰ পাতত অৱহেলিত এই দুই অসমীয়াই স্বাধীনতা আন্দোলনত বৃটিছৰ বিৰুদ্ধে যুঁজ দিছিল।
জয়সাগৰত থকা বৃটিছৰ খাৰ বাৰুদৰ ঘৰত জুই লগাই বৃটিছৰ বিৰুদ্ধে যুদ্ধ ঘোষণা কৰিছিল পিয়লী ফুকনে।
যাৰ বাবে ১৮৩০ চনৰ আজিৰ দিনটোতে পিয়লী ফুকন আৰু জীউৰাম দুলীয়া বৰুৱাক বৃটিছে ফাঁচী দিছিল।
আৰু পঢ়ক: বিবাদৰ পৰিণতিত নিহত দুজন বিএছএফ জোৱান; গুলীবিদ্ধ উপ পৰিদর্শক
কিন্তু ইতিহাসৰ পাতত আজিও উপেক্ষিত এই দুই বীৰ অসমীয়া। কাৰণ ভাৰতৰ স্বাধীনতা আন্দোলনত বৃটিছে ফাঁচী দিয়া প্ৰথমজন শ্বহীদ বুলিলে সকলোৱে মংগল পাণ্ডেক জানে। কিন্তু মংগল পাণ্ডেক ফাঁচী দিয়া হৈছিল ১৮৫৭ চনত।
আজি এই দুই জাতীয় বীৰৰ সমাধিৰ পৰাই ৰংপুৰ প্ৰাচীন কৃৰ্তিচিহ্ন সংৰক্ষণ সমিতিয়ে চৰকাৰক মংগল পাণ্ডেৰ পৰিৱৰ্তে পিয়লী ফুকনক দেশৰ স্বাধীনতা সংগ্ৰামৰ প্ৰথম শ্বহীদ হিচাপে ঘোষণা কৰাৰ দাবী উত্থাপন কৰিছে।
