নগাঁও জিলাৰ চামগুৰিৰ ভেলেউগুৰিত শনিবাৰে বাজিয়া মণ্ডল বিজেপিৰ উদ্যোগত বাৰখন গাঁও পঞ্চায়তৰ অন্তৰ্গত হাইস্কুল শিক্ষান্ত পৰীক্ষাত উত্তীৰ্ণ মুঠ দুশ গৰাকী ছাত্ৰ-ছাত্ৰীক অভিনন্দন জ্ঞাপন কৰা হয় ৷
বাজিয়া মণ্ডল বিজেপিৰ উপ সভাপতি তথা আমলখী গাঁও পঞ্চায়তৰ আঞ্চলিক সদস্য ৰাজু চবৰৰ সভাপতিত্বত অনুষ্ঠিত হোৱা অভিনন্দন জ্ঞাপন অনুষ্ঠানত উদ্দেশ্য বাখ্যা কৰে বাজিয়া মণ্ডল বিজেপিৰ সম্পাদক নিতুল মনি বৰাই ৷ পুৱা বন্তি প্ৰজ্বলনৰ পাছতে ইন্দ্ৰজিৎ দাসৰ পৰিচালনাত নৃত্যাঞ্জলী নৃত্য বিদ্যালয়ৰ শিল্পীবৃন্দই পৰিৱেশন কৰা নৃত্য-গীত অনুষ্ঠানে উপস্থিত দৰ্শকক মন্ত্ৰমুগ্ধ কৰি তোলে ৷
দেৱানন্দ বৰাই বন্তি প্ৰজ্বলনেৰে শুভাৰম্ভ কৰা অভিনন্দন অনুষ্ঠানত চামগুৰি উচ্চতৰ মাধ্যমিক বিদ্যালয়ৰ অধ্যক্ষ দুৰ্লভ কুমাৰ মহন্ত বিশিষ্ট অতিথি হিচাপে উপস্থিত থাকি নিজৰ ভাষণ প্ৰসঙ্গত কয় যে, ব্যক্তিগত অথবা ৰাজহুৱা খণ্ডৰ বিদ্যালয়তকৈ চৰকাৰী খণ্ডৰ বিদ্যালয়ত ছাত্ৰ-ছাত্ৰী, অভিভাৱক আৰু শিক্ষকৰ সৌহাদ্যপূৰ্ণ সহযোগিতাৰ অভাৱতে চৰকাৰী বিদ্যালয়ত উত্তীৰ্ণৰ হাৰ নিম্নগামী হৈছে ৷ এই ক্ষেত্ৰত অভিভাৱক সকলক বিশেষ ভাৱে গুৰুত্ব প্ৰদান কৰিবলৈ আহ্বান জনায় ৷
আজিৰ অনুষ্ঠানত নিমন্ত্ৰিত অতিথি হিচাপে উপস্থিত থাকি বিশিষ্ট শিক্ষাবিদ প্ৰবীণ চন্দ্ৰ বৰাই নিজৰ ভাষণ প্ৰসঙ্গত কয় যে, ব্যক্তিগত খণ্ডত অধ্যয়ন কৰা ছাত্ৰ-ছাত্ৰী সকলক অভিভাৱক সকলে ঘৰুৱা শিক্ষকৰ ব্যৱস্থা কৰি যি ধৰণে সহযোগিতাৰ কৰে, তাৰ তুলনাত চৰকাৰী বিদ্যালয়ত অভিভাৱক সকলে গুৰুত্ব প্ৰদান কৰা দেখা নাযায় ৷
তেওঁ লগতে কয় যে চৰকাৰে সৰ্ব শিক্ষা মিছনৰ জৰিয়তে খাদ্য,য়ুনিফৰ্ম, কিতাপ আৰু মাচুল বিনামুলীয়াকৈ যোগান ধৰাৰ পাছতো চৰকাৰী বিদ্যালয়ত অভিভাৱক সকলে দায়বদ্ধতা স্বীকাৰ কৰা দেখা নাযায় ৷ আনহাতে অভিভাৱক সকলে মাচুল ভৰি নিজৰ সন্তানক ব্যক্তিগত খণ্ডৰ বিদ্যালয়ত নাম ভৰ্তি কৰোৱাৰ লগতে ছাত্ৰ-ছাত্ৰী, শিক্ষক আৰু অভিভাৱকৰ ত্ৰিবেণী সংগমত ফলতেই ব্যক্তিগত খণ্ডৰ বিদ্যালয়ত উত্তীৰ্ণৰ হাৰ বৃদ্ধি পোৱা দেখা গৈছে ৷
অনুষ্ঠানত আমন্ত্ৰিত অতিথি হিচাপে উপস্থিত থাকি বিশিষ্ট সমাজ কৰ্মী ৰমজান আলিয়ে চৰকাৰী বিদ্যালয়ত পৰিকল্পিত আন্ত:গাঁথনিৰ অভাৱৰ বাবেই শিক্ষাৰ মান নিম্নগামী হোৱা বুলি উল্লেখ কৰে ৷
ভেলেউগুৰি গাঁও পঞ্চায়তৰ আঞ্চলিক সদস্য পিন্টু ডেকা,কলিয়াবৰ অবিচি মৰ্চাৰ সভাপতি নিতু মুদৈ,সুতাৰ গাঁও পঞ্চায়তৰ সভানেত্ৰী প্ৰনতি দাধৰা, চামগুৰি গাঁও পঞ্চায়তৰ সভানেত্ৰী মনিকা দাস হাজৰিকা, ভেলেউগুৰি গাঁও পঞ্চায়তৰ সভানেত্ৰী নিৰমায় দাস, কলিয়াবৰ যুৱ মৰ্চাৰ মেডিয়া সমন্বয়ক মৌচম বৰাৰ বিশেষ তৎপৰতাত এই অনুষ্ঠানৰ আয়োজন কৰা হয়।
উক্ত অনুষ্ঠানত চামগুৰি শংকৰদেৱ শিশু নিকেতনৰ আচাৰ্য্য প্ৰমুখ দীগেন চন্দ্ৰ বৰা,সৰস্বতী একাডেমীৰ অধ্যক্ষ ৰূপজ্যোতি মহন্ত, বিশিষ্ট সমাজ সেৱক হাচেন আলি,নিৰ প্ৰসাদ দাধৰা,নৰেন বৰা,বাজিয়া ব্লকৰ সভানেত্ৰী সোনামনি ওৰাং উপস্থিত থাকি দুশ গৰাকী কৃতী ছাত্ৰ-ছাত্ৰীক ফুলাম গামোচা আৰু মান পত্ৰৰে অভিনন্দন জ্ঞাপন কৰে ৷ অনুষ্ঠানত কৃতী ছাত্ৰ-ছাত্ৰী, অভিভাৱক, শিক্ষক-শিক্ষয়িত্ৰী প্ৰমুখ্যে প্ৰায় সহস্ৰাধিক লোক উপস্থিত থাকে ৷