সোমবাৰে সন্ধিয়া গুজৰাটৰ ৰাজকোটত বন্দে ভাৰত এক্সপ্ৰেছৰ খুন্দাত দুজন প্ৰব্ৰজিত শ্ৰমিক নিহত হয়। গুৰুতৰভাৱে আহত আন এজন যুৱক। আৰক্ষী সূত্ৰৰ পৰা জানিব পৰা মতে সোমবাৰে বিয়লি প্ৰায় ৪:৩০ বজাত ভক্তিনগৰ আৰু ৰিবদা ষ্টেচনৰ মাজৰ ৰে’লৱে ক্ৰছিঙৰ সমীপত সংঘটিত হয় এই দুৰ্ঘটনা।
দুৰ্ঘটনাটোৰ পিছত কিছু সময়ৰ বাবে ৰে’ল সেৱা বন্ধ হৈ পৰে। আৰক্ষীয়ে ঘটনা সন্দৰ্ভত তদন্ত আৰম্ভ কৰি ৰে’ল লাইনৰ সমীপত চেলফি বা ভিডিঅ’ লোৱাৰ পৰা বিৰত থাকিবলৈ সাধাৰণ জনতাক কঠোৰ বাৰ্তা প্ৰেৰণ কৰিছে। আহত যুৱকজন চিকিৎসাধীন হৈ আছে।
সংবাদ সংস্থাৰ সূত্ৰ অনুসৰি আৰক্ষীয়ে জনোৱা মতে, সেই সময়ত ভেৰাভাল-আহমেদাবাদ বন্দে ভাৰত ৰে’লখন সেই লাইনত দ্ৰুতগতিত আহি আছিল। ঠিক তেতিয়াই যুৱক তিনিজনে ৰে’ল লাইনৰ সমীপত মোবাইলত গ্ৰুপ চেলফি তুলিবলৈ গৈছিল। ৰে’লখন কিমান ওচৰত আছিল সঠিকভাৱে অনুমান কৰিব নোৱাৰি তিনিওজনে নিমিষতে ৰে’লখনৰ খুন্দাত ছিটিকি পৰে।
ঘটনা সন্দৰ্ভত উপ-পৰিদৰ্শক এ আৰ ৰাথোড়ে কয় যে এজন যুৱকৰ থিতাতে মৃত্যু হয়। আন দুজনক গুৰুতৰ অৱস্থাত চিকিৎসালয়লৈ নিয়াৰ বিপৰীতে আন এজনৰ চিকিৎসাৰ সময়ত মৃত্যু হয়। নিহত দুজনৰ নাম সন্দীপ পেটেল আৰু সন্দীপ কোলি বুলি জানিব পৰা গৈছে। আহত যুৱকজনৰ নাম কপিল পেটেল। তিনিওজনেই উত্তৰ প্ৰদেশৰ বাসিন্দা আৰু ৰাজকোটৰ এটা কাৰখানাত শ্ৰমিক হিচাপে কাম কৰিছিল।
প্ৰাৰম্ভিক তদন্তৰ সময়ত আৰক্ষীয়ে জানিব পাৰে যে তিনিওজন যুৱকে তেওঁলোকৰ ঘৰলৈ উভতি যাবলৈ সাজু হোৱা এজন বন্ধু সন্দীপ পেটেলক ষ্টেচনত থবলৈ আহিছিল। সেই সময়তে ৰে’লপথ পাৰ হোৱাৰ আগতে চেলফি লোৱাৰ সিদ্ধান্তই তেওঁলোকৰ জীৱনৰ শেষ সিদ্ধান্ত হৈ পৰিল।
