কেইমাহমানৰ পিছত আৰম্ভ হ’ব অমৰনাথ যাত্ৰা। ইতিমধ্যে ইয়াৰ প্ৰস্তুতি আৰম্ভ হৈছে। ইফালে জম্মু-কাশ্মীৰত পৰ্যটকৰ ওপৰত সন্ত্ৰাসবাদীয়ে চলাইছে আক্ৰমণ। মঙলবাৰে পহলগামত উগ্ৰপন্থীয়ে গুলীচালনা কৰে এদল পৰ্যটকৰ ওপৰত। খবৰ অনুসৰি এই ঘটনাত এতিয়ালৈকে ২৮ জন লোকৰ মৃত্যু হৈছে।
সূত্ৰই জনোৱা মতে, মঙলবাৰে বিয়লি পহলগামৰ ভৈষ্ৰণ উপত্যকাত উগ্ৰপন্থীয়ে পৰ্যটকৰ ওপৰত গুলীচালনা কৰে। খবৰ পোৱাৰ পিছতে স্থানীয় আৰক্ষী সেই স্থানত উপস্থিত হয়। অতিৰিক্ত সৈন্যও মোতায়েন কৰা হয়।
সূত্ৰ অনুসৰি পৰ্যটকৰ উপৰিও আহতসকলৰ ভিতৰত স্থানীয় গাঁৱৰ একাংশ বাসিন্দাও আছে। শতাধিক জন লোক আহত হোৱাৰ খবৰ পোৱা গৈছে। ইয়াৰে অধিকাংশই ৰাজস্থানৰ বাসিন্দা।
যোৱা কেইমাহমানৰ পৰা জম্মু-কাশ্মীৰত সন্ত্ৰাসবাদী আক্ৰমণৰ ঘটনা বৃদ্ধি পাইছে। শেহতীয়াকৈ উগ্ৰপন্থী আৰু সেনাৰ মাজত বাৰে বাৰে সংঘৰ্ষৰ সৃষ্টি হৈছে।
অৱশ্যে ইয়াৰ পূৰ্বে ভাৰতীয় সেনাই তিনিজন পাকিস্তানী সন্ত্ৰাসবাদীক হত্যা কৰিছিল। নিহতসকলৰ ভিতৰত এজন জৈছ-ই-মহম্মদ উগ্ৰপন্থী গোটৰ অধিনায়ক ছয়ফুল্লা। বাকী উগ্ৰপন্থী দুজনৰ নাম ফাৰ্মান আৰু বাছা। দুয়োজনেই জৈছৰ সদস্যও।
নিৰাপত্তা বাহিনীৰ হাতত থকা তথ্য মতে জম্মু-কাশ্মীৰৰ একাধিক জিলাত পাকিস্তানী সন্ত্ৰাসবাদীৰ এটা বৃহৎ দল বিয়পি আছে । আক্ৰমণকাৰী কোন সংস্থাৰ সেয়া এতিয়াও নিশ্চিত হোৱা নাই।তাৎপৰ্যপূৰ্ণভাৱে পহলগাম চহৰ কাশ্মীৰ আৰু গুলমাৰ্গৰ পিছত জম্মু-কাশ্মীৰৰ তৃতীয় বৃহত্তম পৰ্যটন কেন্দ্ৰ। অমৰনাথ যাত্ৰাৰ দুটা পথৰ ভিতৰত এটা হ’ল পেহলগামলৈ যোৱা এই পথ। এনে পৰিস্থিতিত পৰ্যটকৰ ওপৰত আক্ৰমণৰ খবৰে স্বাভাৱিকতে উদ্বেগৰ সৃষ্টি কৰিছে।
সুত্ৰৰ খবৰ অনুসৰি গুলি চলোৱাৰ পূৰ্বে সন্ত্রাসবাদী দলে পর্যটকক ধর্মীয় পৰিচয় সুধিছে। এই ঘটনাক লৈ উদ্বিগ্ন হৈছে কেন্দ্ৰীয় চৰকাৰা প্ৰধানমন্ত্ৰীৰ নিৰ্দেশত ইতিমধ্যে শ্রীনগৰলৈ ৰাওনা হৈছে গৃহমন্ত্রী অমিত শ্বাহা ঘটনাক লৈ প্ৰধানমন্ত্ৰীয়েও কৰিছে বিশেষ টুইট।
