গোৱালপাৰা জিলাত বন্য হস্তীৰ সন্ত্ৰাসে ভয়াৱহ ৰূপ ধাৰণ কৰিছে। মাত্ৰ ১২ ঘণ্টাৰ ব্যৱধানত পৃথক পৃথক দুটা স্থানত বনৰীয়া হাতীৰ আক্ৰমণত দুজনকৈ লোকে প্ৰাণ হেৰুৱাবলগীয়া হোৱা ঘটনাই সমগ্ৰ অঞ্চলটোত শোকৰ ছাঁ পেলাইছে। দেওবাৰে নিশা দুধনৈৰ ডাবলি অঞ্চলত পালাদীপ এম চাংমা নামৰ এজন ব্যক্তিৰ মৃত্যু হোৱাৰ পাছতে ৰংজুলি বন সংমণ্ডলৰ অধীনত পুনৰ একেধৰণৰ শোকাৱহ ঘটনা সংঘটিত হয়।
শেহতীয়া ঘটনাটো ৰংজুলি বন সংমণ্ডলৰ ধনুবঙাৰ জালাপৰাত সংঘটিত হৈছে। জানিব পৰা মতে, মৃত ব্যক্তিজনৰ নাম অৰূপ কুমাৰ দাস আৰু তেওঁৰ বয়স প্ৰায় ৪৬ বছৰ। দেওবাৰে নিশা তেওঁ নিজৰ কলবাৰীৰ পৰা মটৰ চাইকেলেৰে ঘৰলৈ উভতি আহি থকাৰ সময়তে এই অঘটন ঘটে। মাজনিশাৰ ভাগত তেওঁ হঠাতে এটা বন্য হস্তীৰ সন্মুখীন হয়।
স্থানীয় লোকৰ মতে, এটা পোৱালিৰ সৈতে থকা মাখুন্দী হাতীয়ে হঠাতে অৰূপ কুমাৰ দাসক আক্ৰমণ কৰে। নিজৰ প্ৰাণ ৰক্ষাৰ বাবে তেওঁ মটৰ চাইকেলখন এৰি পলাবলৈ চেষ্টা কৰিছিল যদিও হাতীটোৰ আক্ৰমণৰ পৰা সাৰি যাব নোৱাৰিলে। হাতীটোৱে তেওঁক বৰ্বৰভাৱে আক্ৰমণ কৰাৰ ফলত থিতাতে তেওঁৰ মৃত্যু হয়।
ইটোৰ পাছত সিটো দুৰ্ঘটনাই এতিয়া সমগ্ৰ জিলাখনতে তীব্ৰ আতংকৰ সৃষ্টি কৰিছে। জনবসতিপূৰ্ণ অঞ্চলত বনৰীয়া হাতীৰ সঘন আহ-যাহৰ বাবে ৰাইজ চিন্তিত হৈ পৰিছে। স্থানীয় ৰাইজে বন বিভাগক অতি শীঘ্ৰে বিহিত ব্যৱস্থা গ্ৰহণ কৰিবলৈ আৰু হাতী-মানুহৰ সংঘাত ৰোধ কৰিবলৈ দাবী জনাইছে যাতে ভৱিষ্যতে এনেধৰণৰ অকাল মৃত্যু ৰোধ কৰিব পৰা যায়।
