মহাৰাষ্ট্ৰৰ ৰাজনীতিৰ দ্ৰুত গতিত পট পৰিৱৰ্তন ঘটিছে। একনাথ চিন্দেৰ শিবিৰ ত্যাগ কৰি পলায়ন কৰা বুলি চৰ্চা হোৱা শিৱসেনাৰ দুজন বিধায়ক নিতিন দেশমুখ আৰু কৈলাশ পাটিলে চুৰাটৰ পৰা কিদৰে ‘পলাই’ আহিছিল সেই বৰ্ণনা বিধায়ক দুগৰাকীয়ে দাঙি ধৰিছে। শিৱসেনাৰ বিধায়ক নিতিন দেশমুখে আনকি গুজৰাট আৰক্ষীয়ে তেওঁক বিষাক্ত বেজীৰে হত্যা কৰাৰ চেষ্টা কৰাৰো অভিযোগ উত্থাপন কৰিছে।
তেওঁ কয় যে তেওঁ এজন প্ৰকৃত শিৱ সৈনিক আৰু মহাৰাষ্ট্ৰৰ মুখ্যমন্ত্ৰী উদ্ধৱ থাকৰেৰ সৈতেই তেওঁ আছে। তেওঁ কয় “মই পথভ্ৰষ্ট হৈছিলোঁ আৰু চুৰাটলৈ গৈছিলো। মই পলাই যাবলৈ চেষ্টা কৰিছিলো, কিন্তু গুজৰাট আৰক্ষীয়ে মোক বাধা দিছিল,” ।
তেওঁ কয় যে তেওঁৰ কোনো স্বাস্থ্যজনিত সমস্যা নাই, কিন্তু এজন চিকিৎসকে গুজৰাটত তেওঁক কৈছিল যে তেওঁ হৃদযন্ত্ৰৰ সমস্যাত ভুগিছিল।” মই আচৰিত হৈছিলোঁ আৰু এই বিষয়ত প্ৰশ্ন কৰিছিলো, কিন্তু তেওঁলোকে মোক সন্তোষজনক উত্তৰ দিব নোৱাৰিলে। তেওঁলোকে মোক কিছুমান বেজী দিছিল। ফলত মোৰ গাটো বেয়া লাগিছিল। ২০০-২৫০ জন গুজৰাট আৰক্ষীৰ লোকে মোক অনুসৰণ কৰিছিল। তেওঁলোকৰ কিছুমানে আনকি যেতিয়া মই পলাই যাবলৈ চেষ্টা কৰিছিলো তেতিয়া মোক প্ৰহাৰ কৰিছিল। মই সুখী যে মই সকলো অতিক্ৰম কৰি মহাৰাষ্ট্ৰলৈ উভতি আহিব পাৰিছো। মহাৰাষ্ট্ৰৰ মুখ্যমন্ত্ৰী উদ্ধৱ থাকৰে আৰু শিৱ সৈনিকসকলৰ সমৰ্থনৰ বাবেই মই এজন শিৱসেনাৰ বিধায়ক। মই এতিয়া গুৱাহাটীত থকা আন বিধায়কসকলকো মুম্বাইলৈ উভতি আহি মুখ্যমন্ত্ৰী উদ্ধৱ থাকৰেৰ সৈতে থাকিবলৈ অনুৰোধ জনাইছো,” ।
ইয়াৰ আগতে, নিতিন দেশমুখৰ পত্নীয়ে আকোলা আৰক্ষী থানাত তেওঁৰ স্বামী নিৰুদ্দেশ হোৱাৰ অভিযোগ দাখিল কৰিছিল। চুৰাটৰ উভতি অহা শিৱসেনাৰ বিধায়ক কৈলাশ পাটিলেও কয় যে তেওঁ বিপথে পৰিচালিত হৈছিল। তেওঁ কৈছিল যে একনাথ চিন্দেই তেওঁক ডিনাৰলৈ আমন্ত্ৰণ জনাইছে। তেওঁ বিশ্বাস কৰিছিল যে এটা ডিনাৰ পাৰ্টি হয়তো আয়োজন কৰা হৈছে।
কিন্তু তেওঁক গুজৰাটলৈহে লৈ যোৱা হ’ল। পাটিলে কয় যে তেওঁ চাৰি কিলোমিটাৰতকৈও অধিক খোজ কাঢ়িছিল আৰু মুম্বাইলৈ উভতি যাবলৈ এখন ব্যক্তিগত ট্ৰাকতো উঠিছিল। সেই মুহূৰ্তটো ব্যাখ্যা কৰি তেওঁ কয় ’ মই তেতিয়া অন্ধকাৰ অৰণ্যলৈ দৌৰি গৈছিলো আৰু নিজকে এটা জোপোহাৰ পিছফালে লুকুৱাই ৰাখিছিলো।
তাৰ পিছত, অন্ধকাৰৰ মাজে মাজে মই মহাৰাষ্ট্ৰ আৰু গুজৰাটৰ সীমালৈ দৌৰি আছিলো। এনেদৰে মই এটা সময়ত মুম্বাই পাবলৈ সক্ষম হৈছিলো। মই আনকি মুখ্যমন্ত্ৰী উদ্ধৱ থাকৰেক ফোন কৰিছিলো আৰু তেওঁক চিন্দেৰ ষড়যন্ত্ৰৰ বিষয়ে অৱগত কৰিছিলো। মই সকাহ পাইছো যে মই মুম্বাইলৈ ঘূৰি আহিব পাৰিছো। ” ।
শিৱসেনাৰ নেতা সঞ্জয় ৰাউতেও অভিযোগ কৰিছিল যে সেনাৰ বিধায়কসকলক বিজেপিৰ সহায়ত বল প্ৰয়োগ কৰি অপহৰণ কৰা হৈছিল। উল্লেখ্য শিৱসেনাৰ বিধায়কসকলক প্ৰথমে চুৰাটৰ হোটেললৈ আৰু তাৰ পিছত গুৱাহাটীলৈ লৈ যোৱা হৈছিল।
