নতুন দিল্লীৰ নেহৰু প্লেচ অঞ্চলত যোৱা ১০ মে’ৰ পুৱা উত্তৰ-পূবৰ দুগৰাকী যুৱতী ভয়ংকৰ হাৰাশাস্তিৰ বলি হোৱাৰ এক চাঞ্চল্যকৰ ঘটনা পোহৰলৈ আহিছে। প্ৰাপ্ত খবৰ অনুসৰি, দক্ষিণ দিল্লীৰ ইৰোছ হোটেলৰ সমীপৰ এখন চাহৰ দোকানত দুগৰাকী যুৱতীক একাংশ লোকে উদ্দেশ্য কৰি আপত্তিজনক মন্তব্য কৰাৰ লগতে শাৰীৰিকভাৱে অপদস্ত কৰে।
এই ঘটনাক কেন্দ্ৰ কৰি সৃষ্টি হোৱা উত্তপ্ত পৰিস্থিতিৰ পাছতে ভুক্তভোগী যুৱতী দুগৰাকীয়ে আৰক্ষীৰ সহায় বিচাৰে । আৰক্ষীৰ দলটোৱে ততাতৈয়াকৈ ঘটনাস্থলীত উপস্থিত হৈ পৰিস্থিতিৰ বুজ লয় আৰু যুৱতী দুগৰাকীক উদ্ধাৰ কৰে।
প্ৰাথমিক তদন্তৰ পাছত আৰক্ষীয়ে জানিবলৈ দিছে যে অভিযুক্ত কেইজনে যুৱতী দুগৰাকীক লক্ষ্য কৰি অতি অপমানজনক আৰু বৰ্ণবৈষম্যমূলক মন্তব্য কৰিছিল। ইয়াৰ পৰিণতিত দুয়োপক্ষৰ মাজত তৰ্কাতৰ্কিৰ সৃষ্টি হয় আৰু পৰৱৰ্তী সময়ত অভিযুক্তসকলে যুৱতী দুগৰাকীক শাৰীৰিকভাৱে আক্ৰমণ কৰে। আৰক্ষীয়ে তৎক্ষণাত ভুক্তভোগী যুৱতী দুগৰাকীক চিকিৎসাৰ বাবে এইমছ হাস্পতাললৈ লৈ যায় আৰু তাত তেওঁলোকৰ স্বাস্থ্য পৰীক্ষা সম্পন্ন কৰা হয়। এই সমগ্ৰ ঘটনাৰ সন্দৰ্ভত ইতিমধ্যে আৰক্ষীয়ে এটা এজাহাৰ পঞ্জীয়ন কৰিছে আৰু দোষীক কৰায়ত্ত কৰিবলৈ কঠোৰ পদক্ষেপ গ্ৰহণ কৰিছে।
ঘটনাটোৰ তদন্ত প্ৰক্ৰিয়া ক্ষিপ্ৰতৰ কৰি তুলিবলৈ দিল্লী আৰক্ষীয়ে সমগ্ৰ অঞ্চলটোৰ চিচিটিভি ফুটেজ পৰীক্ষা কৰিছে। ইয়াৰ লগতে সেই সময়ত ঘটনাস্থলীত উপস্থিত থকা প্ৰত্যক্ষদৰ্শী আৰু পথচাৰীসকলৰ সৈতেও আৰক্ষীয়ে কথা পাতিছে। তদন্তকাৰী বিষয়াসকলে জনোৱা মতে, এই কাণ্ডৰ সৈতে জড়িত থকা চাৰিজন মূল অভিযুক্তক ইতিমধ্যে চিনাক্ত কৰা হৈছে। এই গোচৰৰ সন্দৰ্ভত এতিয়ালৈকে আঠজন লোকক আটক কৰি সোধা-পোছা কৰা হৈছে। বৰ্তমান অভিযুক্তসকলক গ্ৰেপ্তাৰ কৰিবলৈ আৰক্ষীৰ কেইবাটাও দলে বিভিন্ন স্থানত অভিযান চলাই আছে বুলি জানিব পৰা গৈছে।
