নগাঁও জিলাৰ চামগুৰি সমষ্টিৰ অন্তৰ্গত আমবাগান আৰক্ষী চকীৰ পূব লৰীমুখত আজি দুপৰীয়া বিদ্যুত স্পৃৃৃৃষ্ট হৈ দুজন যুৱকৰ মৃত্যু হোৱাৰ লগতে এজন শিশু গুৰুতৰভাৱে আহত হোৱা ঘটনাই সমগ্ৰ অঞ্চলটোতে চাঞ্চল্যৰ সৃষ্টি কৰিছে ।
ঘটনা সন্দৰ্ভত জানিব পৰা মতে, আজি দুপৰীয়া আমবাগান আৰক্ষী চকীৰ অধীনৰ পূব লৰীমুখ গাঁৱৰ জংকেত আলীৰ পুত্ৰ মছবুল ইছলাম (১৯) নামৰ যুৱক জনে ইমৰান হুছেইন (৬) নামৰ শিশুটোক কান্ধত তুলি পথেৰে আহি থকা অৱস্থাত পথৰ ওপৰেদি যোৱা বিদ্যুৎ পৰিবাহী তাৰত গছৰ ডাল ভাঙি পৰি যোৱাত বিদ্যুৎ পৰিবাহী তাৰ ছিগি যায় ৷
এই আকস্মিক দুৰ্যোগৰ ফলতে মছবুল ইছলাম নামৰ যুৱক জনক বিদ্যুৎ পৰিবাহী তাৰে মেৰিয়াই ধৰে আৰু শিশু ইমৰান হুছেইন ছিটিকি পৰে ৷
তেনে অৱস্থাত ওচৰতে থকা ৰছিদুল হক (১৮) নামৰ যুৱক জনে শিশুটোক উদ্ধাৰ কৰিবলৈ যোৱাৰ অৱস্থাত ৰছিদুল হকো বিদ্যুৎৰ তাৰত লাগি ধৰে ৷
পৰৱৰ্তী সময়ত স্থানীয় ৰাইজ আৰু বিদ্যুৎ বিভাগৰ লোক ঘটনাস্থলীত উপস্থিত হৈ তিনিও জনকে চিকিৎসালয়লৈ নিয়াৰ ব্যৱস্থা কৰে যদিও মছবুল ইছলাম আৰু ৰছিদুল হ’কক চিকিৎসকে মৃত ঘোষণা কৰে।
আনহাতে, গুৰুতৰভাৱে আহত হোৱা শিশু ইমৰান হুছেইনক প্ৰথমে নগাঁও অসামৰিক চিকিৎসালয়লৈ নিয়া হয় যদিও পৰৱৰ্তী সময়ত উন্নত চিকিৎসাৰ বাবে গুৱাহাটীলৈ প্ৰেৰণ কৰা হয় বুলি জানিব পৰা গৈছে ৷