গোৱাত সংঘটিত হৈছে এক অতি চাঞ্চল্য্যকৰ ঘটনা য’ত একেটা নামৰে দুগৰাকী ৰাছিয়ান যুৱতীৰ মৃতদেহ উদ্ধাৰ কৰা হৈছে। এই ভয়ংকৰ হত্যাকাণ্ডৰ সৈতে জড়িত থকাৰ অভিযোগত আৰক্ষীয়ে ইতিমধ্যে এজন ৰুছ নাগৰিকক গ্ৰেপ্তাৰ কৰিছে।
ধৃত ব্যক্তিজনৰ নাম আলেকসেই লিওনভ বুলি জানিব পৰা গৈছে যাৰ বয়স প্ৰায় ৩৭ বছৰ। আৰক্ষীৰ সূত্ৰ অনুসৰি লিওনভে দুটা পৃথক ঘটনাত একেই বয়সৰ দুজনী ৰুছ মহিলাক হত্যা কৰিছে আৰু এই ঘটনাই সমগ্ৰ অঞ্চলটোতে তীব্ৰ চাঞ্চল্যৰ সৃষ্টি কৰিছে।
ঘটনাৰ বিৱৰণী অনুসৰি প্ৰথম হত্যাকাণ্ডটো ১৪ জানুৱাৰীৰ নিশা প্ৰায় ১১ বজাত মোৰজিম নামৰ ঠাইত সংঘটিত হৈছিল। সেইদিনা কোনো এক ব্যক্তিগত বিবাদৰ বাবে অভিযুক্ত আলেকসেই লিওনভে এলেনা ভানেইভা নামৰ মহিলাগৰাকীক নিজৰ ঘৰতে ডিঙি কাটি হত্যা কৰে। ঘৰৰ মালিকে এই বিষয়ে গোচৰ তৰাৰ পিছতেই আৰক্ষীয়ে তদন্ত আৰম্ভ কৰিছিল। ইয়াৰ পিছদিনাই অৰ্থাৎ ১৫ জানুৱাৰীত লিওনভে মোৰজিমৰ পৰা প্ৰায় আঠ কিলোমিটাৰ নিলগত থকা আৰামবোল অঞ্চললৈ যায় আৰু তাত থকা তেওঁৰ বান্ধৱী এলেনা কাস্তানোভাৰ সৈতে কাজিয়াত লিপ্ত হয়।
আৰক্ষীৰ মতে কাজিয়াৰ চৰম পৰ্যায়ত লিওনভে প্ৰথমে কাস্তানোভাৰ হাত-ভৰি বান্ধি ঘৰত আবদ্ধ কৰি ৰখাৰ চেষ্টা কৰিছিল। কিন্তু যুৱতীগৰাকীয়ে পলাবলৈ চেষ্টা কৰোঁতেই অভিযুক্তই ধাৰালো অস্ত্ৰৰে তেওঁক ডিঙি কাটি হত্যা কৰে। আৰামবোলৰ ঘৰৰ গৰাকী উত্তম নায়কে এই ঘটনাৰ বিষয়ে আৰক্ষীক খবৰ দিয়ে আৰু তাৰ পিছতেই আৰক্ষীয়ে ঘটনাস্থলীত উপস্থিত হৈ অভিযুক্ত আলেকসেইক গ্ৰেপ্তাৰ কৰে। শুকুৰবাৰে দুই মহিলাৰে মৃতদেহ উদ্ধাৰ কৰা হয় আৰু আৰক্ষীয়ে সমগ্ৰ ঘটনাৰ তদন্ত ক্ষিপ্ৰতৰ কৰি তুলিছে।
গোৱা আৰক্ষীয়ে এই সন্দৰ্ভত ভাৰতীয় ন্যায় সংহিতাৰ ১২৬(২) আৰু ১০৩(১) ধাৰাৰ অধীনত এটা গোচৰ ৰুজু কৰিছে। আৰক্ষীৰ প্ৰাথমিক অনুমান অনুসৰি কোনো ব্যক্তিগত কাৰণতে এই হত্যাকাণ্ড সংঘটিত হৈছে যদিও অভিযুক্তৰ মানসিক স্থিতি আৰু দুই হত্যাকাণ্ডৰ মাজত কিবা গভীৰ সংযোগ আছে নেকি সেই বিষয়ে অধিক তথ্য সংগ্ৰহ কৰা হৈছে। ম্ন্দ্ৰেম থানাৰ আৰক্ষীয়ে বৰ্তমান লিওনভক জেৰা কৰি আছে। উত্তৰ গোৱাৰ দৰে পৰ্যটনস্থলিত এনে ধৰণৰ ঘটনাই এতিয়া সকলোৰে মাজত উদ্বেগৰ সৃষ্টি কৰিছে।
