“আমাৰ মাজত কিছু মতপাৰ্থক্য আৰু ভুল বুজাবুজি হোৱা বাবে আমাৰ সংগঠন দুটা পৃথক পৃথক ভাগত বিভক্ত হৈছিল।”
আজি দিচপুৰস্থিত আমছুৰ কেন্দ্ৰীয় কাৰ্য্যালয়ত এখন সংবাদমেল অনুষ্ঠিত কৰি এই মন্তব্য কৰে আমছুৰ মুখ্য উপদেষ্টা আজিজুৰ ৰহমানে।
উল্লেখযোগ্য যে, সংগঠনৰ নেতৃত্বৰ মাজত খামখেয়ালি আৰু মতৰ পাৰ্থক্যৰ বাবে যোৱা ২৩ জুলাই দিনা সংগঠনটো দুটা ভাগত বিভক্ত হৈছিল। তাৰ পাছতে আজিজুৰ ৰহমানৰ নেতৃত্বত নতুনকৈ ৫১ জনীয়া কমিটী গঠিত হৈছিল।
ইয়াৰ পূৰ্বেও একাধিকবাৰ সংগঠনটোৰ বিভাজন হৈছিল। মূলতঃ ক্ষমতাৰ যুঁজেই এই বিভাজনবোৰৰ অন্যতম কাৰণ।
কিন্তু অন্তিমবাৰ যোৱা ২৩ জুলাইত দুভাগত বিভক্ত হোৱা সংগঠনটো যোৱা ১২ আগষ্টৰ দিনা আমছুৰ প্ৰতিষ্ঠাপক সভাপতি আব্দুল হাইৰ নেতৃত্বত তথা প্ৰাক্তন বিষয়ববীয়াৰ মধ্যস্থতাত জোৰা লাগে।
আজি সংবাদমেলত আজিজুৰ ৰহমানে কয়, “আমি সংকল্পবদ্ধ হৈছো, অসমৰ অসমীয়াৰ হকে আৰু বিশেষকৈ ধৰ্মীয় আৰু বিশেষ সংখ্যালঘু জনসাধাৰণৰ বাবে বিগত সময়ছোৱাত যিদৰে আমছুৱে সংগ্ৰাম কৰি গৈছিল, ঠিক তেনেকৈয়ে সংগ্ৰাম আগ বঢ়াই লৈ যোৱাৰ বাবে বদ্ধপৰিকৰ হৈছো।”
আনহাতে, আজিজুৰ ৰহমানক মুখ্য উপদেষ্টা, ৰেজাউল কৰিম সৰকাৰক সভাপতি, আইনুদ্দিন আহমেদক কাৰ্য্যকৰী সভাপতি. মোশ্বাৰফ হুছেইন কবিৰ, আব্দুৰ ৰহমান বিশ্বাস আৰু ইমতিয়াজ হুছেইনক সাধাৰণ সম্পাদক তথা অন্য কেইবাগৰাকীক বিষয়ববীয়াক লৈ পুনৰ এখন কমিটি গঠন কৰা হয়। এই কমিটিখনে একত্ৰিত হৈ ভৱিষ্যৎ দিনবোৰত আমছুৰ হৈ কাম কৰি যাব বুলি সংবাদমেলত মুখ্য উপদেষ্টা আজিজুৰ ৰহমানে জানিবলৈ দিয়ে।
তেওঁ লগতে কয়, “১৯৭১ চনৰ পূৰ্বে অহা কোনো লোকৰ নাম যাতে এন আৰ চিৰ পৰা বাদ নপৰে তাৰ ওপৰতো আমছুৱে দৃষ্টি ৰাখিব বুলি উক্ত সভাত সিদ্ধান্ত গ্ৰহণ কৰা হয়।”
আনহাতে এন আৰ চিৰ খচৰাৰ পৰা বাদ পৰা বৈধ ভাৰতীয়ৰ নাম অন্তৰ্ভুক্ত কৰাৰ ক্ষেত্ৰত সমূহ আমছু কৰ্মীকে নজৰ ৰাখিবৰ বাবে নিৰ্দেশ দিয়া হৈছে বুলি আজিজুৰে সংবাদমেলত জনায়।
“কোনো লোকেই অপ্ৰীতিকৰ পৰিৱেশৰ সৃষ্টি নকৰে। কিন্তু শেষৰজন বৈধ ভাৰতীয়ৰ নামো যাতে এন আৰ চিত অন্তৰ্ভুক্ত হয় তাৰ বাবে চোকা দৃষ্টি ৰাখিবৰ বাবে এন আৰ চিৰ কৰ্তৃপক্ষক চোকা দৃষ্টি ৰাখিবৰ বাবে অনুৰোধ জনাইছো।” এইদৰে কয় আজিজুৰে।
