শনিবাৰে পুৱা জম্মু-কাশ্মীৰৰ কুপোৱাৰা জিলাত নিৰাপত্তা বাহিনীয়ে ডাঙৰ সফলতা অৰ্জন কৰে। অনুপ্ৰৱেশৰ চেষ্টাৰ সময়ত সেনাই চলোৱা ‘অপাৰেচন পিম্পল’ত দুজন উগ্ৰপন্থী নিহত হয়।
অঞ্চলটোত আন কোনো উগ্ৰপন্থীয়ে আত্মগোপন কৰি আছে নেকি সেই বিষয়ে জানিবলৈ এতিয়া সেনাই তীব্ৰ তালাচী অভিযান আৰম্ভ কৰিছে।
কিৰণ ছেক্টৰৰ কুপৱাৰা অঞ্চলত অনুপ্ৰৱেশ সম্পৰ্কে নিৰ্দিষ্ট তথ্য লাভ কৰা বুলি সেনাই জনায়। ইয়াৰ ভিত্তিত ৭ নৱেম্বৰত অঞ্চলটোত অভিযান আৰম্ভ কৰা হয়।
তাত উপস্থিত হোৱাৰ লগে লগে নিৰাপত্তাৰক্ষীয়ে কিছুমান সন্দেহজনক গতিবিধি লক্ষ্য কৰে। বিষয়টোৰ তদন্ত কৰিবলৈ যাওঁতে দুস্কৃতিকাৰীয়ে সেনাবাহিনীৰ ওপৰত গুলীচালনা কৰে। ইয়াৰ প্ৰত্যুত্তৰ হিচাপে নিৰাপত্তা বাহিনীয়ে উগ্ৰপন্থী দুজনক সফলতাৰে নিহত কৰিবলৈ সক্ষম হয়। সেনাৰ সূত্ৰ অনুসৰি অঞ্চলটোত উগ্ৰপন্থী দমন অভিযান এতিয়াও অব্যাহত আছে।
উল্লেখযোগ্য যে যোৱা ৫ নৱেম্বৰত জম্মু-কাশ্মীৰৰ কিষ্টৱাৰতো উগ্ৰপন্থীৰ সৈতে নিৰাপত্তাৰক্ষীৰ সংঘৰ্ষ হৈছিল। নিৰ্দিষ্ট তথ্যৰ ভিত্তিত জম্মু-কাশ্মীৰ আৰক্ষী আৰু সেনাই যৌথভাৱে অঞ্চলটোত তালাচী অভিযান আৰম্ভ কৰে। সেই সময়ত উগ্ৰপন্থীয়েও নিৰাপত্তাৰক্ষীৰ ওপৰত গুলীচালনা কৰে, যাৰ প্ৰত্যুত্তৰ দিয়া হয়।
জম্মু-কাশ্মীৰত উগ্ৰপন্থীৰ অনুপ্ৰৱেশ আৰু আক্ৰমণৰ চেষ্টা ৰোধৰ বাবে নিৰাপত্তা বাহিনীয়ে নিৰন্তৰ নিৰীক্ষণ আৰু অভিযান চলাই আছে।
