কাৰ্বি আংলঙৰ খেৰোনিত বুধবাৰে ৰাতিপুৱা দুটা বনৰীয়া হাতীৰ কৰুণ মৃত্যুৱে সমগ্ৰ অঞ্চলটোত শোকৰ ছাঁ পেলাইছে।
কাৰ্বি আংলঙৰ খেৰোনিত বিদ্যুৎ স্পৃষ্ট হৈ হাতী দুটাৰ মৃত্যু হোৱা বুলি স্থানীয় লোকে উল্লেখ কৰে।
জানিব পৰা মতে, উক্ত অঞ্চলত প্ৰায়ে বনৰীয়া হাতীৰ জাকে বিচৰণ কৰি ফুৰে আৰু বুধবাৰে ৰাতিপুৱা মাটিত পৰি থকা উচ্চ ক্ষমতাযুক্ত বিদ্যুৎ পৰিবাহী তাৰত লাগি বনৰীয়া হাতী দুটাৰ কৰুণ মৃত্যু হয়।
হাতী দুটাৰ কৰুণ মৃত্যুৰ পাছতে স্থানীয় ৰাইজে এইক্ষেত্ৰত বিদ্যুৎ বিভাগক জগৰীয়া কৰে।
‘বিদ্যুৎ বিভাগৰ গাফিলতিৰ বাবে দুটা বনৰীয়া হাতীয়ে বিনাকাৰণত মৃত্যু বৰণ কৰিবলগীয়া হ’ল,’ এগৰাকী স্থানীয় নাগৰিকে কয়।
পৰৱৰ্তী সময়ত ঘটনাস্থলীত বন বিভাগৰ দল উপস্থিত হয় আৰু হাতী দুটা উদ্ধাৰ কৰে।
কিছুদিন পূৰ্বে গুৱাহাটীৰ সমীপৰ চন্দ্ৰপুৰত দ্ৰুতবেগী ৰে’লৰ খুন্দাত এটা বনৰীয়া হাতীৰ কৰুণ মৃত্যু হৈছিল।
অসমত প্ৰতিবছৰে হাতী মানুহৰ সংঘাতৰ ফলত আৰু অন্যান্য কাৰণত ভালেসংখ্যক বনৰীয়া হাতীৰ অকালতে মৃত্যু হৈ আহিছে।
