দূষিত পানীৰ সমস্যাত আলোড়ণৰ সৃষ্টি হৈছে ইন্দোৰত। অভিযোগ অনুসৰি ইন্দোৰৰ ভাগীৰথপুৰাত নলা-নৰ্দমা আৰু শৌচাগাৰৰ সৈতে মিহলি পানী খাই ২০০ৰো অধিক লোক আক্ৰান্ত হৈছে। কমেও ৯ জন লোকৰ মৃত্যু হৈছে।
এইবাৰ একেধৰণৰ ঘটনাৰ সাক্ষী হ’ল গুজৰাটৰ ৰাজধানী গান্ধীনগৰো। বিগত ৫ দিনত গান্ধীনগৰত দূষিত পানী সেৱন কৰি শিশু আৰু মহিলাসহ মুঠ ১০৪ জন লোক টাইফয়েডত আক্ৰান্ত হৈছে। চৰকাৰী সূত্ৰ অনুসৰি আটাইকেইজন অসুস্থ লোকক গুজৰাটৰ গান্ধীনগৰ অসামৰিক চিকিৎসালয়ত ভৰ্তি কৰোৱা হৈছে।
গুজৰাটৰ উপ-মুখ্যমন্ত্ৰী হৰ্ষ সংঘৱীয়ে কয় যে ৰোগীৰ চিকিৎসাৰ বাবে প্ৰশাসনে ২২ জনীয়া চিকিৎসকৰ এটা বিশেষ দল গঠন কৰিছে। সমগ্ৰ পৰিস্থিতিৰ ওপৰত প্ৰশাসনে তীক্ষ্ণ দৃষ্টি ৰাখিছে।
অসুস্থ লোকসকলক সাক্ষাৎ কৰি উপ-মুখ্যমন্ত্ৰীগৰাকীয়ে ৰোগী আৰু তেওঁলোকৰ পৰিয়ালৰ সৈতে কথা পাতিছে বুলি জনায়। তেওঁ কয় যে তেওঁলোকক সকলো ধৰণৰ সহায় আগবঢ়োৱা হ’ব।
সংঘৱীয়ে লগতে কয় যে চিকিৎসালয়ত ভৰ্তি হোৱা ৰোগীসকলৰ পৰিয়ালৰ বাবে প্ৰশাসনে খাদ্য আৰু আশ্ৰয়ৰ ব্যৱস্থা কৰি আছে। ইয়াৰ উপৰিও কেন্দ্ৰীয় মন্ত্ৰী অমিত শ্বাহে সমগ্ৰ বিষয়টোৰ ওপৰত চকু ৰাখিছে বুলি সংঘৱীয়ে জনায়।
চিকিৎসালয়ৰ সূত্ৰ অনুসৰি যোৱা তিনিদিনত টাইফয়েডৰ বাবে সৰ্বাধিক লোকক চিকিৎসালয়ত ভৰ্তি কৰা হৈছে। যোৱা তিনিদিনত টাইফয়েড পৰীক্ষাৰ বাবে চিকিৎসালয়লৈ অহা ৫০ শতাংশ ৰোগী আক্ৰান্ত হৈছে। আক্ৰান্তৰ অধিকাংশৰে বয়স ১৮ বছৰৰ তলৰ।
চিকিৎসালয়ৰ অধীক্ষক মিতা পাৰেখে কয় যে ৰোগীসকলৰ অৱস্থা পূৰ্বতকৈ ভাল হৈছে। কেইবাটাও স্থানৰ পৰা পানীৰ নমুনা সংগ্ৰহ কৰা হৈছিল। তাত দেখা গৈছে যে বেছিভাগ অঞ্চলৰ পানী খোৱাৰ উপযোগী নহয়।
গান্ধীনগৰৰ পানীত ক’ৰ পৰা দূষিত পানী বিয়পি পৰিছে সেই বিষয়ে জানিবলৈ গান্ধীনগৰ পৌৰসভাই এক সমীক্ষা চলাই আছে। ইয়াৰ উপৰিও পৌৰসভাই ৰাইজক পানী উতলাই খাবলৈ পৰামৰ্শ দিছে। ঘৰতে টেংকীৰ পানী পৰিষ্কাৰ কৰি ৰাখিবলৈ পৌৰসভাই বিনামূলীয়াকৈ ক্ল’ৰিন টেবলেট বিতৰণ কৰিছে।
পৌৰসভাৰ বিষয়াসকলে জনোৱা মতে, টাইফয়েড কেনেকৈ বিয়পি পৰিছে সেই বিষয়ে জানিবলৈ প্ৰচেষ্টা চলোৱা হৈছে। অসুস্থ লোকৰ চিকিৎসাৰ ওপৰতো প্ৰশাসনে তীক্ষ্ণ দৃষ্টি ৰাখিছে যাতে কোনো ধৰণৰ গাফিলতি নহয়।
