আমেৰিকা প্ৰশাসনৰ এটা গুৰুত্বপূৰ্ণ পদৰ পৰা পদত্যাগ কৰিছে জো কেণ্টে। ৰাষ্ট্ৰীয় সন্ত্ৰাসবাদ বিৰোধী কেন্দ্ৰৰ মুৰব্বী কেণ্টে কয় যে ড’নাল্ড ট্ৰাম্প প্ৰশাসনৰ ইৰাণ নীতি আৰু যুদ্ধৰ বিৰোধিতা কৰিয়েই তেওঁ পদত্যাগ কৰিছে।
মঙলবাৰে ছ’চিয়েল মিডিয়াত নিজৰ সিদ্ধান্ত ঘোষণা কৰি কেণ্টে কয় যে তেওঁ “নৈতিকভাৱে” যুদ্ধক সমৰ্থন কৰিব নোৱাৰে। তেওঁ দাবী কৰে যে ইৰাণ আমেৰিকাৰ বাবে তাৎক্ষণিক ভাবুকি নহয়। বৰঞ্চ ইজৰাইল আৰু ইয়াৰ প্ৰভাৱশালী আমেৰিকান গোটৰ হেঁচাত যুদ্ধ আৰম্ভ হৈছিল।
যি সময়ত মধ্যপ্ৰাচ্যত আমেৰিকা আৰু ইৰাণৰ মাজত সংঘাত তীব্ৰতৰ হৈ পৰিছে সেই সময়তে এই পদত্যাগৰ ঘটনা ঘটিছে। পৰিস্থিতি অধিক জটিল হৈ পৰাৰ লগে লগে এই পদত্যাগৰ গুৰুত্বও বাঢ়িছে।
ৰাষ্ট্ৰীয় সন্ত্ৰাসবাদ বিৰোধী কেন্দ্ৰৰ মুৰব্বী হিচাপে কেণ্টে আমেৰিকাৰ এটা গুৰুত্বপূৰ্ণ চোৰাংচোৱা সংস্থাৰ নেতৃত্ব দিছিল। এই সংস্থাই দেশত সন্ত্ৰাসবাদী ভাবুকিৰ বিশ্লেষণ আৰু মোকাবিলা কৰে। ইয়াৰ উপৰিও বিভিন্ন চোৰাংচোৱা সংস্থা, প্ৰতিৰক্ষা বিভাগ, আৰু আইন প্ৰয়োগকাৰী সংস্থাৰ মাজত সমন্বয় সাধন কৰে।
পদত্যাগৰ সমান্তৰালকৈ কেণ্টে ৰাষ্ট্ৰপতি ট্ৰাম্পলৈ এখন পত্ৰও প্ৰেৰণ কৰে। ইয়াত তেওঁ লিখিছে যে ২০১৬, ২০২০, আৰু ২০২৪ চনৰ নিৰ্বাচনী প্ৰচাৰৰ সময়ত ট্ৰাম্পে ঘোষণা কৰা নীতিসমূহক সমৰ্থন কৰিলেও ইৰাণত সামৰিক অভিযান আৰম্ভ কৰাৰ সিদ্ধান্তৰ সৈতে তেওঁ একমত নহয়। তেওঁ ট্ৰাম্পক এই সিদ্ধান্ত পুনৰ বিবেচনা কৰিবলৈ আহ্বান জনায়।
ইপিনে, এই ঘটনাৰ কিছুদিন পূৰ্বে ট্ৰাম্পে দিয়া এটা মন্তব্যক লৈ বিতৰ্কৰ সৃষ্টি হৈছে। অ’ভেল অফিচত সাংবাদিকৰ সন্মুখীন হৈ ট্ৰাম্পে কৈছিল যে ইৰাণক আক্ৰমণ কৰাৰ ক্ষেত্ৰত আমেৰিকাই প্ৰথম পদক্ষেপ গ্ৰহণ কৰিছে। তেওঁ দাবী কৰে যে আমি যদি তেনেকুৱা নকৰিলোহেঁতেন তেন্তে ইৰাণে প্ৰথমে আক্ৰমণ কৰিলেহেঁতেন। তেওঁ লগতে কয় যে তেওঁ ইজৰাইলক প্ৰয়োজন হ’লে প্ৰথমে আক্ৰমণ কৰিবলৈ উৎসাহিত কৰিছিল।
উল্লেখ্য যে যোৱা বছৰৰ জুলাই মাহত কেণ্টক ৫২-৪৪ ভোটত আমেৰিকাৰ চেনেটে এই পদত বহুৱাইছিল। পূৰ্বেও সোঁপন্থী উগ্ৰপন্থী সংগঠনৰ সৈতে যোগাযোগ ৰখাৰ অভিযোগ উত্থাপন হোৱাৰ বাবে তেওঁৰ নিযুক্তিক লৈ কিছু বিতৰ্কৰ সৃষ্টি হৈছিল।
ৰাজনীতিত প্ৰৱেশ কৰাৰ পূৰ্বে কেণ্টে আমেৰিকা সেনাৰ বিশেষ বাহিনীৰ সদস্য হিচাপে কাৰ্যনিৰ্বাহ কৰিছিল আৰু ১১ বাৰ বিদেশত নিয়োজিত হৈছিল। পিছলৈ তেওঁ কেন্দ্ৰীয় চোৰাংচোৱা সংস্থাত কাম কৰিছিল।
তেওঁৰ পদত্যাগৰ ফলত ইৰাণ যুদ্ধৰ যুক্তি আৰু আমেৰিকাৰ বৈদেশিক নীতিৰ ভৱিষ্যতক লৈ ৱাশ্বিংটনত নতুন বিতৰ্কৰ সম্ভাৱনা সৃষ্টি হৈছে।
