শেহতীয়াকৈ আফগানিস্তানৰ তালিবান অধিগ্ৰহণক “সমৰ্থন” কৰি ছ’চিয়েল মিডিয়া পোষ্ট দিয়াৰ অভিযোগত আগষ্টত অসম আৰক্ষীয়ে গ্ৰেপ্তাৰ কৰা ১৬ জন লোকৰ কমেও ১৪ জনক স্থানীয় আদালতে জামিন প্ৰদান কৰিছে।
উল্লেখ্য যে গ্ৰেপ্তাৰ কৰা ব্যক্তি সকলৰ এজনৰ বাহিৰে সকলোকে কঠোৰ UAPAৰ অধীনত গোচৰ ৰুজু কৰা হৈছিল। আদালতে জামিন ৰায় দিওঁতে মন্তব্য কৰে যে তেওঁলোকক কাৰাগাৰত ৰখাৰ বাবে পৰ্যাপ্ত ভিত্তি নাই।
অসমৰ আইন-শৃংখলা শাখাৰ বিশেষ ডিজিপি জি পি সিঙে ২১ আগষ্টত তালিবানৰ সমৰ্থনত পোষ্ট লিখা প্ৰথম ১৪ জন ব্যক্তিক গ্ৰেপ্তাৰ কৰাৰ কথা ঘোষণা কৰিছিল, আনহাতে পিছদিনা আৰু দুজনক গ্ৰেপ্তাৰ কৰা হৈছিল। মুখ্যমন্ত্ৰী মহন্ত বিশ্ব শৰ্মাই আৰক্ষীক ভয় আৰু পক্ষপাত অবিহনে কাম কৰিবলৈ নিৰ্দেশ দিছিল।
ইতিমধ্যে জামিন লাভ কৰা সকলৰ ভিতৰত আছে এআইইউডিএফৰ প্ৰাক্তন সাধাৰণ সম্পাদক আৰু জমিয়তৰাজ্যিক সম্পাদক ৪৯ বছৰীয়া মৌলানা ফজলুল কৰিম কাছিমী।
৬ অক্টোবৰত তেওঁক জামিন প্ৰদান কৰি গুৱাহাটী উচ্চ ন্যায়ালয়ে কয় যে সেই ফেচবুক পোষ্টটো বাদ দি তেওঁৰ বিৰুদ্ধে একো আপত্তিজনক প্ৰমাণ নাই। “এটা নিৰ্দিষ্ট ফেচবুক পোষ্টৰ বাদে অভিযুক্তৰ ক্ষেত্ৰত আন আপত্তিজনক প্ৰমাণৰ অনুপস্থিতিত কেৱল ফেচবুক পোষ্টটোৱেই এক গুৰুত্বপূৰ্ণ অপৰাধ হ’ব নে নাই সেয়া সন্দেহজনক।” ন্যায়াধীশ সুমন শ্যামে কয়।
অসম আৰক্ষীৰ ২১ নং বেটেলিয়নৰ কনিষ্টবল ছাইদুল হকে ২২ ছেপ্টেম্বৰত জামিন লাভ কৰিছিল। হকৰ বিৰুদ্ধে দাখিল কৰা এজাহাৰত উল্লেখ কৰা হৈছিল যে হকে ১৮ আগষ্টত ফেচবুকত ‘অভিনন্দন তালিবান’ পোষ্ট কৰিছিল আৰু দাবী কৰিছিল যে তেওঁৰ উদ্দেশ্য আছিল সন্ত্ৰাসবাদী গোটটোৰ কাৰ্যকলাপ কঢ়িয়াই নিয়া।
অৱশ্যে,কামৰূপ সত্ৰ আদালতে ৰায় দিয়ে যে, উপলব্ধ ফেচবুক পোষ্টটোৱেই অভিযুক্তই সন্ত্ৰাসবাদী সংগঠনক সমৰ্থন কৰা প্ৰমাণ কৰিবলৈ প্ৰাথমিক ভাৱে পৰ্যাপ্ত নাছিল।
গুৱাহাটী উচ্চ ন্যায়ালয়ৰ জ্যেষ্ঠ অধিবক্তা হাফিজ ৰছিদ চৌধুৰীয়ে কয় যে গ্ৰেপ্তাৰ কৰা বেছিসংখ্যক ব্যক্তিৰে ক্ষেত্ৰত UAPA ৰ দৰে কঠোৰ আইন কাৰ্যকৰী কৰাটো উচিত হোৱা নাছিল , আদালতে এই কথাত সমৰ্থন জনাইছে আৰু সেয়ে এই সকলক জামিন প্ৰদান কৰে।
গ্ৰেপ্তাৰ হোৱা জাৱেদ হুছেইন মজুমদাৰ (৩০), ফাৰুক হুছেইন খান (৩২), মজিদুল ইছলাম (২৫), অৰমান হুছেইন (২৫), চিকিৎসা বিজ্ঞানৰ ছাত্ৰ নাদিম আখটাৰ লস্কৰ (২৩), অৱসৰপ্ৰাপ্ত মৌলানা বছিৰুদ্দিন লস্কৰ (৬৫) আৰু মকবুল আলমে প্ৰাৰম্ভিক পৰ্যায়তে জামিন লাভ কৰে।
গুৱাহাটী উচ্চ ন্যায়ালয়ৰ ন্যায়াধীশ হিতেশ কুমাৰ শৰ্মাই ৰায়ত উল্লেখ কৰে যে, তেওঁলোকৰ বিৰুদ্ধে এনে একো প্ৰমাণ বিচাৰি পোৱা নাই, যাৰ বাবে অধিক জিম্মাত বন্দী কৰি ৰাখিব পাৰি।
আন এজন অভিযুক্ত আবু বাক্কাৰ ছিদ্দিক (৫৫) ওৰফে আফগা খান অভিলেষৰ ক্ষেত্ৰত আদালতে কয় যে তেওঁৰ কেছ ডায়েৰী প্ৰাপ্ত হোৱা নাই আৰু তেওঁ ইতিমধ্যে ৪৭ দিন ধৰি বন্দী হৈ আছে।
লগতে জামিন লাভ কৰে ২৬ বছৰীয়া ৰফিকুল ইছলামে।
কৰিমগঞ্জ জিলাৰ পৰা আটক কৰা দুজন অভিযুক্ত ২৪ বছৰীয়া মুজিব উদ্দিন নামৰ এজন শিক্ষক আৰু ১৮ বছৰীয়া B.Com ৰ ছাত্ৰ মোৰ্তুজা হুছেইন খান দুয়োৱে জামিন লাভ কৰিছে বুলি কৰিমগঞ্জৰ আৰক্ষী অধীক্ষক পদ্মনাভ বৰুৱাই নিশ্চিত কৰিছে।
UAPA ৰ অধীনত গোচৰ ৰুজু নকৰা একমাত্ৰ অভিযুক্ত মৌলানা য়াছিন খানক ১৫ ছেপ্টেম্বৰত জামিনত মুক্তি দিয়া হৈছিল।
অৱশ্যে এতিয়ালৈকে জামিন লাভ কৰা নাই ৫৭ বছৰীয়া খাণ্ডাকাৰ নুৰ আলোম আৰু এজন ৰিক্সাচালক চৈয়দ আহমেদে। দুয়োজনৰ জামিন আবেদন নাকচ কৰে ধুবুৰী সত্ৰ আদালতে। তেওঁলোকৰ ব্যক্তিগত অধিবক্তাই আদালতে পৰৱৰ্তী শুনানিৰ বাবে ২২ অক্টোবৰ ধাৰ্য কৰিছে বুলি জানিবলৈ দিয়ে।