বিশ্বখ্যাত কাৰ টেক্সি এপ উবেৰে ভাৰতত দ্বিতীয়টো চেণ্টাৰ অব এক্সেলেন্স স্থাপন কৰিছে আৰু এইটো হৈছে বিশাখাপট্টনমত।
২ ডিচেম্বৰত আমেৰিকা ভিত্তিক কোম্পানিটোৱে এই ঘোষণা কৰাৰ লগতে নতুনকৈ স্থাপন হোৱা কেন্দ্ৰটোত ৫০০ লোক নিয়োগ কৰা হ’ব বুলি জনাইছে।
কোম্পানিটোৰ ইতিপূৰ্বে হাইদৰাবাদত এটা কেন্দ্ৰ আছে আৰু নতুন কেন্দ্ৰটো তাৰে সম্প্ৰসাৰিত কেন্দ্ৰ।
উবেৰৰ এছিয়া পেচিফিকৰ কমিউনিটি অপাৰেইশ্যনৰ ছিনিঅ’ৰ ডিৰেক্টৰ ছু লিন ৱেনে কয়, এই কেন্দ্ৰটোৱে ভাৰতৰ গ্ৰাহকসকলৰ লগতে এছিয়া পেচিফিক অঞ্চলটোৰ গ্ৰাহকসকললৈ ছাপ’ৰ্ট আগ বঢ়াব।
নিয়োজিত ৫০০ লোকক প্ৰশিক্ষণ দিয়া হ’ব আৰু এই প্ৰশিক্ষিত লোকসকলৰ গোটবোৰে কোম্পানিটোলৈ অহা যিকোনো ধৰণৰ জৰুৰী বিষয় বা ঘটনাৰ প্ৰতি সঁহাৰি দিব। সপ্তাহৰ আটাইকেইটা দিনতে ২৪ ঘণ্টাই এই সেৱা আগ বঢ়োৱা হ’ব।
আমি ইতিপূৰ্বে ৭০জন লোকক ল’লো আৰু অহা বছৰৰ প্ৰথমভাগতে ইয়াৰ সংখ্যা ১২০জন হ’ব। আমি আশা কৰিছো অহা বছৰটোৰ শেষলৈ ৫০০জনক লোৱা হ’ব, লিন ৱেনে কয়।
উবেৰে ইয়াৰ ভাৰতীয় প্ৰতিদ্বন্দ্বী Ola-ৰ সৈতে ব্যৱসায়িক প্ৰতিযোগিতাত আছে আৰু এই প্ৰতিযোগিতাত অধিক আগ বাঢ়ি থকাৰ কৌশলৰ অংশ হিচাপে এই নতুন কেন্দ্ৰটো স্থাপন কৰা হৈছে।
ইয়াৰ পূৰ্বে ২০১৫ চনত ভাৰতৰ প্ৰথমটো কেন্দ্ৰ হাইদৰাবাদত স্থাপন কৰা হৈছিল, য’ত বৰ্তমান ১,০০০-ৰ অধিক কৰ্মচাৰী আছে।