উত্তৰাখণ্ড আৰু হিমাচল প্ৰদেশৰ পিছত গুজৰাট চৰকাৰেও ইউনিফৰ্ম চিভিল কোড (ইউচিচি) কাৰ্যকৰী কৰাৰ বাবে এখন সমিতি গঠন কৰাৰ সিদ্ধান্ত লৈছে।
গুজৰাটৰ কেবিনেট বৈঠকত এই সিদ্ধান্ত লোৱা হৈছে। অহা সপ্তাহৰ ভিতৰত ৰাজ্যখনত বিধানসভা নিৰ্বাচনৰ দিন ঘোষণা কৰা হ’ব বুলি আশা কৰা হৈছে। গুজৰাটৰ গৃহ ৰাজ্যিক মন্ত্ৰী হৰ্ষ সংঘৱী আৰু কেন্দ্ৰীয় মন্ত্ৰী পৰশত্তম ৰূপলাই সাংবাদিকসকলক আজিৰ এই সিদ্ধান্তটোৰ বিষয়ে অৱগত কৰে।
“সমিতিখনৰ নেতৃত্বত থাকিব উচ্চ ন্যায়ালয়ৰ এজন অৱসৰপ্ৰাপ্ত ন্যায়াধীশ আৰু ইয়াত তিনিৰ পৰা চাৰিজন সদস্য থাকিব। মুখ্যমন্ত্ৰী ভূপেন্দ্ৰ পেটেলক সমিতিৰ সদস্য বাছনি কৰাৰ ক্ষমতা কেবিনেটে দিছে,” ৰূপাই কয়।
নিৰ্বাচনৰ বাবে আদৰ্শ আচৰণ বিধি কাৰ্যকৰী হোৱাৰ আগতে সমিতিখন গঠন কৰা হ’ব বুলিও তেওঁ কয়। সংঘৱীয়ে কয় যে সিদ্ধান্তটো আছিল সংবিধানৰ ৪৪ নং অনুচ্ছেদৰ বিধান অনুসৰি লোৱা সিদ্ধান্ত। যিয়ে ৰাজ্য চৰকাৰে সকলো নাগৰিকৰ বাবে উমৈহতীয়া আইন প্ৰয়োগ কৰাৰ অনুমতি দিয়ে।
তেওঁ কয় “এয়া মুখ্যমন্ত্ৰী ভূপেন্দ্ৰ পেটেলৰ এক ঐতিহাসিক সিদ্ধান্ত। আমাৰ চৰকাৰে সাধাৰণ মানুহৰ লগতে বিজেপি কৰ্মীসকলৰ ইচ্ছাক সন্মান জনাইছে,” ৰূপাই তেওঁ লগতে কয় যে প্ৰস্তাৱিত ইউনিফৰ্ম চিভিল কোডে সংবিধানৰ অধীনত নিশ্চিত মৌলিক অধিকাৰ উলংঘা নকৰে। হিন্দু বিবাহ আইন আৰু মুছলমান ব্যক্তিগত আইন ইউচিচিৰ অধীনত সামৰি লোৱা হ’ব। কিয়নো এই আইনসমূহ সংবিধানৰ অংশ নহয়, কেন্দ্ৰীয় মন্ত্ৰীগৰাকীয়ে লগতে কয়।
তেওঁ কয় “আমি জনসাধাৰণৰ মৌলিক অধিকাৰক অগ্ৰাহ্য কৰাৰ ইচ্ছা নাই। ইউচিচি হৈছে অসামৰিক বিবাদত উদ্ভৱ হোৱা বিসংগতিবোৰ সমাধান কৰাৰ সহজ উপায়।, ” তেওঁ দাবী কৰে যে আগন্তুক বিধানসভা নিৰ্বাচনৰ সৈতে এই সিদ্ধান্তৰ কোনো সম্পৰ্ক নাই। ইপিনে বিৰোধীয়ে সমালোচনাক কৰি কৈছে যে শাসকীয় বিজেপিয়ে ইউচিচিৰ প্ৰতিশ্ৰুতি দি হিন্দু ভোটৰ বিভাজন কৰিবলৈ চেষ্টা কৰি আছে।
