দ্বিতীয়বাৰৰ বাবে উৱেফা চেম্পিয়নছ লীগ জয় কৰিলে চেলছিয়ে।
ইউৰোপৰ অভিজাত ফুটবল ক্লাবসমূহৰ আটাইতকৈ বৰ্ণাঢ্য প্ৰতিযোগিতাখনৰ ফাইনেলত ১-০ ব্যৱধানত বিজয় সাব্যষ্ট কৰে ইংলিছ প্ৰিমিয়াৰ লীগৰ ঐতিহাসিক ক্লাবটোৱে।
শনিবাৰে পৰ্টুগালৰ প’ৰ্ট’ৰ এস্তাদিউ ডো ড্ৰেগো ষ্টেডিয়ামত চেলছি সন্মুখীন হয় ইংলিছ প্ৰিমিয়াৰ লীগৰে মানচেষ্টাৰ চিটিৰ স’তে।
উল্লেখযোগ্য যে মানচেষ্টাৰ চিটিয়ে এই বৰ্ষৰ প্ৰিমিয়াৰ লীগ জয় কৰিছে।
যেন এই ফাইনেলখনত প্ৰিমিয়াৰ লীগৰ প্ৰতিশোহে পূৰণ কৰিলে চেলছিয়ে।
মেচখনত একমাত্ৰ বিজয়সূচক গ’লটো কৰে চেলছিৰ কাই হাভাৰ্টজে।
ক্লাবটোৰ আটাইতকৈ দামী খেলুৱৈ জাৰ্মানীৰ ফুটবলাৰজনে গ’লটো কৰে প্ৰথমাৰ্ধৰ ৪২ মিনিটত।
হাভাৰ্টজক গ’লটোৰ বাবে এছিষ্ট কৰে মেচন মাউণ্টে।
উল্লেখযোগ্য যে চেলছিৰ প্ৰশিক্ষক থমাছ টুচেলে যোৱাবাৰ ফ্ৰান্সৰ পেৰিছ চেইণ্ট-জাৰ্মেইনৰ প্ৰশিক্ষকৰ দায়িত্বত আছিল।
তেওঁৰ প্ৰশিক্ষণতে ফ্ৰান্সৰ আগশাৰীৰৰ ক্লাবটো চেম্পিয়নছ লীগৰ ফাইনেলত অৱতীৰ্ণ হৈ জাৰ্মানীৰ বেয়াৰ্ণ মিউনিখৰ হাতত পৰাজিত হৈছিল।
কিন্তু এইবাৰ তেওঁ বিজয়ৰ সোৱাদ লাভ কৰিলে।
🏆 𝗖𝗛𝗔𝗠𝗣𝗜𝗢𝗡𝗦 𝗢𝗙 𝗘𝗨𝗥𝗢𝗣𝗘 🏆
Congratulations, @ChelseaFC! 🎉🎉🎉#UCL #UCLfinal pic.twitter.com/DDxy0BZYCn
— UEFA Champions League (@ChampionsLeague) May 29, 2021
মেচখনৰ প্ৰথমৰে পৰা আক্ৰমণাত্মকভাৱে খেলি গৈছিল কাই হাভাৰ্টছ, এনগ’ল’ কাণ্টৰ দৰে তাৰকাবিশিষ্ট চেলছিয়ে।
১৩ মিনিটতে গ’ল দিয়াৰ সুযোগ পাইও হেৰুৱাইছিল, তাৰ পাছতে হেৰুৱাইছিল ২টাকৈ সুযোগ।
কিন্তু হাভাৰ্টজৰ গ’লটোৰে তেওঁলোক প্ৰতিপক্ষতকৈ আগবাঢ়ি থাকে।
দ্বিতীয়াৰ্ধত চেলছিক উলটি ধৰে মানচেষ্টাৰ চিটিয়ে।
কিন্তু চিটিৰ গেব্ৰিয়েল জেচুচ, ফাৰ্ণাণ্ডিনহো, চাৰ্জিও আগুৱেৰোৰ দৰে তাৰকাসকলে আপ্ৰাণ চেষ্টা কৰিও চেলছিৰ ৰক্ষণবাহিনীক পৰাভূত কৰিব নোৱাৰিলে।
যাৰ ফলত পৰাজীত ক্লাব ফুটবলৰ কিংম্বদন্তি প্ৰশিক্ষক পেপ গুৱাৰ্ডিৱলাৰ দলটো।
উল্লেখযোগ্য যে ২০১২ চনত প্ৰথমবাৰৰ বাবে চেলছিয়ে এই প্ৰতিযোগিতাখনৰ খিতাপ অৰ্জন কৰিছিল।