বিশ্ববিদ্যালয় অনুদান আয়োগে (UGC) বিদেশী ডিগ্ৰীক স্বীকৃতি দিয়াৰ লগতে বিদেশত ভাৰতীয় ডিগ্ৰীৰ সমতুল্যতা নিৰ্ধাৰণৰ বাবে নতুন নিয়ম জাৰি কৰিছে। এই নিয়মসমূহক আনুষ্ঠানিকভাৱে ইউজিচি (বিদেশী শিক্ষা প্ৰতিষ্ঠানৰ অৰ্হতাৰ স্বীকৃতি আৰু সমতুল্যতা) বিধি, ২০২৫ বুলি নামকৰণ কৰা হৈছে।
বহু ভাৰতীয় ছাত্ৰ-ছাত্ৰীয়ে বিদেশত পঢ়াৰ সপোন দেখে, কিন্তু বিদেশী বিশ্ববিদ্যালয়সমূহে সদায় পোনপটীয়াকৈ ভাৰতীয় ডিগ্ৰী গ্ৰহণ নকৰে। একেদৰে বিদেশী ডিগ্ৰী লাভ কৰা ছাত্ৰ-ছাত্ৰীসকলে ভাৰতত স্বীকৃতি লাভ কৰাত প্ৰায়ে সমস্যাৰ সন্মুখীন হয়। এই সমস্যাসমূহৰ সমাধানৰ বাবে ইউজিচিয়ে এনে অৰ্হতাৰ স্বীকৃতি আৰু সমতুল্যতা নিৰ্ধাৰণৰ বাবে স্পষ্ট নিৰ্দেশনা জাৰি কৰিছে।
নিয়ম অনুসৰি বিদেশী ডিগ্ৰী ভাৰতত স্বীকৃতি দিয়া হ’ব যদিহে সেই দেশখনৰ দ্বাৰা অনুমোদিত বা স্বীকৃতিপ্ৰাপ্ত শিক্ষানুষ্ঠানৰ পৰা লাভ কৰে। লগতে, ডিগ্ৰীটোৱে সেই প্ৰতিষ্ঠানটোৱে নিৰ্ধাৰণ কৰা শৈক্ষিক মানদণ্ড আৰু প্ৰয়োজনীয়তাসমূহো পূৰণ কৰিব লাগিব।
উল্লেখযোগ্য যে চিকিৎসা, ফাৰ্মাচী, নাৰ্ছিং, আইন, আৰু স্থাপত্য আদি নিৰ্দিষ্ট পেছাদাৰী পাঠ্যক্ৰমৰ ডিগ্ৰীৰ ক্ষেত্ৰত এই নতুন নিয়ম প্ৰযোজ্য নহ’ব। এই ক্ষেত্ৰসমূহে ভাৰতত পৃথক স্বীকৃতি আৰু নিয়ন্ত্ৰণ পদ্ধতি অনুসৰণ কৰে।
বিদেশী আৰু ভাৰতীয় ডিগ্ৰী তুলনা কৰাৰ সময়ত ইউজিচিয়ে নিজ নিজ পাঠ্যক্ৰমৰ নূন্যতম সময়সীমা আৰু ক্ৰেডিটৰ প্ৰয়োজনীয়তা দুয়োটাকে বিবেচনা কৰিব। যদি ভাৰতীয় আৰু বিদেশী কাৰ্যসূচীৰ মাজত পাঠ্যক্ৰমৰ সময়সীমাৰ পাৰ্থক্য থাকে, তেন্তে প্ৰয়োজনীয় শৈক্ষিক ক্ৰেডিটৰ তুলনাৰ ওপৰত ভিত্তি কৰি সমতুল্যতা নিৰ্ধাৰণ কৰা হ’ব। প্ৰয়োজনীয় ক্ৰেডিটৰ ১০ শতাংশ পৰ্যন্ত তাৰতম্য গ্ৰহণযোগ্য বুলি গণ্য কৰা হ’ব।
বিদেশী ডিগ্ৰী স্বীকৃতি দিয়াৰ প্ৰক্ৰিয়াটোক অধিক স্বচ্ছ আৰু একধৰণৰ কৰি তোলা, যাতে বিদেশত অধ্যয়ন কৰা ছাত্ৰ-ছাত্ৰীসকলে ভাৰতত নিজৰ কেৰিয়াৰ বা অধিক অধ্যয়ন সুকলমে অব্যাহত ৰাখিব পাৰে এই লক্ষ্যৰে ইউজিচিয়ে এই নিয়ম প্ৰৱৰ্তন কৰিছে।
