বিশ্ববিদ্যালয় অনুদান আয়োগে শেহতীয়াকৈ এক গুৰুত্বপূৰ্ণ জাননী জাৰী কৰি বেংগালুৰুৰ ৰাজাজিনগৰত অৱস্থিত গ্ল’বেল হিউমেন পিছ ইউনিভাৰ্চিটিক এটা ভুৱা বিশ্ববিদ্যালয় হিচাপে ঘোষণা কৰিছে। এই শিক্ষানুষ্ঠানখনৰ কোনো বৈধতা নাই বুলি স্পষ্ট কৰি দি ইউজিচিয়ে ছাত্ৰ-ছাত্ৰীসকলক ইয়াত নামভৰ্তি নকৰিবলৈ কঠোৰ পৰামৰ্শ দিছে। ১৬ ফেব্ৰুৱাৰীত প্ৰকাশ কৰা এই ৰাজহুৱা জাননীত উল্লেখ কৰা হৈছে যে উক্ত বিশ্ববিদ্যালয়খন ইউজিচি আইনৰ কোনো ধাৰাৰ অধীনতে স্বীকৃত নহয়। কেৱল ইউজিচিয়েই নহয়, অল ইণ্ডিয়া কাউন্সিল ফৰ টেকনিকেল এডুকেচন বা আন কোনো চৰকাৰী বিধিগত সংস্থাৰ পৰাও এই প্ৰতিষ্ঠানটোৱে কোনো অনুমতি লাভ কৰা নাই।
ইউজিচিয়ে জনোৱা মতে এই বিশেষ শিক্ষানুষ্ঠানখনে বৰ্তমানৰ চৰকাৰী আইন উলংঘা কৰি ডিগ্ৰী প্ৰদান কৰি আহিছে। আয়োগে স্পষ্টকৈ কৈছে যে এই প্ৰতিষ্ঠানে এতিয়ালৈকে প্ৰদান কৰা যিকোনো ডিগ্ৰী বা ডিপ্লমা উচ্চ শিক্ষা গ্ৰহণৰ ক্ষেত্ৰত অথবা চৰকাৰী চাকৰিৰ আবেদনৰ বাবে কোনো ধৰণে বৈধ নহ’ব। গতিকে এনে ধৰণৰ স্ব-ঘোষিত শিক্ষানুষ্ঠানত নামভৰ্তি কৰিলে ছাত্ৰ-ছাত্ৰীসকলৰ ভৱিষ্যত আৰু কেৰিয়াৰ গভীৰ সংকটত পৰাৰ সম্ভাৱনা আছে। এই ক্ষেত্ৰত ছাত্ৰ-ছাত্ৰীৰ লগতে অভিভাৱকসকলকো সজাগ হবলৈ আহ্বান জনোৱা হৈছে।
উল্লেখনীয় যে এই প্ৰতিষ্ঠানটোৱে নিজৰ ৱেবছাইটত আমেৰিকা যুক্তৰাষ্ট্ৰৰ ফেডাৰেল চৰকাৰৰ অধীনত পঞ্জীয়নভুক্ত বুলি এক বিভ্ৰান্তিকৰ দাবী কৰি আহিছে। আনকি তেওঁলোকে ৱেবছাইটত আমেৰিকাৰ ঠিকনা ব্যৱহাৰ কৰাৰ লগতে ভাৰতৰ নিটি আয়োগৰ সৈতে পঞ্জীয়নভুক্ত বুলিও প্ৰচাৰ চলাইছে। সংবাদ মাধ্যমে যেতিয়া এই সন্দৰ্ভত প্ৰতিষ্ঠানটোৰ সৈতে যোগাযোগ কৰিবলৈ চেষ্টা কৰিছিল, তেতিয়া তেওঁলোকৰ তৰফৰ পৰা কোনো সঁহাৰি পোৱা নগ’ল। চৰকাৰী স্বীকৃতি নোহোৱাকৈ ডিগ্ৰী বিতৰণ কৰা এনে ভুৱা শিক্ষানুষ্ঠানৰ পৰা আঁতৰত থাকিবলৈ ইউজিচিয়ে সকলোকে পুনৰ সকীয়াই দিছে।
