বিহাৰত অভিন্ন দেৱানী বিধি বা ইউচিচি কাৰ্যকৰী কৰা নহ’ব বুলি স্পষ্ট কৰি দিছে জনতা দল ইউনাইটেডৰ জ্যেষ্ঠ নেতা তথা বিধায়ক শ্যাম ৰজকে।
সোমবাৰে ৰজকে কয়, বিহাৰৰ চৰকাৰত জেডিইউ বিজেপিৰ সহযোগী দল। সেয়ে জেডিইউয়ে সন্মতি নিদিলে বিজেপি নেতৃত্বাধীন চৰকাৰে ৰাজ্যত এই ব্যৱস্থা কাৰ্যকৰী কৰিব নোৱাৰে।
কেন্দ্ৰীয় গৃহমন্ত্ৰী অমিত শ্বাহে শেহতীয়াকৈ ঘোষণা কৰিছিল যে বিজেপি আৰু এনডিএ শাসিত ২১খন ৰাজ্যত ২০২৯ চনৰ লোকসভা নিৰ্বাচনৰ পূৰ্বে অভিন্ন দেৱানী বিধি কাৰ্যকৰী কৰা হ’ব। শ্বাহৰ এই ঘোষণাৰ পাছতেই জেডিইউৰ ফালৰ পৰা অহা শ্যাম ৰজকৰ মন্তব্যই বিষয়টো নতুন ৰূপ দিছে।
জেডিইউৰ জ্যেষ্ঠ নেতা ৰজকে কয়, সংসদত ইউচিচি সম্পৰ্কীয় আইনক সমৰ্থন কৰাৰ সময়তে তেওঁলোকৰ দলে স্পষ্ট কৰি দিছিল যে বিহাৰত এই বিধি কাৰ্যকৰী কৰা নহ’ব। তেওঁৰ মতে, জেডিইউ নিজৰ সেই স্থিতিত এতিয়াও অটল। অৰ্থাৎ, কেন্দ্ৰত বিষয়টোত সমৰ্থন থাকিলেও বিহাৰত ইউচিচি কাৰ্যকৰী কৰাৰ ক্ষেত্ৰত দলটোৱে আপত্তি অব্যাহত ৰাখিব।
শ্যাম ৰজকৰ ৰাজনৈতিক যাত্ৰাও যথেষ্ট গুৰুত্বপূৰ্ণ। তেওঁ এসময়ত লালু প্ৰসাদ যাদৱৰ ঘনিষ্ঠ সহচৰ আছিল আৰু ৰাবড়ী দেৱীৰ মন্ত্ৰীসভাত মন্ত্ৰিত্ব কৰিছিল। পাছত নীতীশ কুমাৰৰ দলত যোগদান কৰি পুনৰ মন্ত্ৰী হয়। বৰ্তমান মন্ত্ৰী নহ’লেও জেডিইউৰ ভিতৰত তেওঁ এগৰাকী গুৰুত্বপূৰ্ণ নেতা হিচাপে পৰিচিত।
ৰজকৰ এই মন্তব্য নীতীশ কুমাৰৰ পৰামৰ্শ আৰু দলীয় স্থিতিৰ ভিত্তিতেই আহিছে বুলি ৰাজনৈতিক মহলত চৰ্চা আৰম্ভ হৈছে। আনহাতে, বিজেপি নেতৃত্বাধীন সম্ৰাট চৌধুৰীৰ চৰকাৰ বা বিজেপিৰ শীৰ্ষ নেতাসকলে এই মন্তব্য সন্দৰ্ভত এতিয়ালৈকে কোনো স্পষ্ট প্ৰতিক্ৰিয়া প্ৰকাশ কৰা নাই।
কিন্তু বিষয়টো ইয়াতে থমকি ৰোৱাৰ সম্ভাৱনা কম। বিজেপিয়ে দেশজুৰি অভিন্ন দেৱানী বিধি প্ৰৱৰ্তনৰ বাবে দীৰ্ঘদিন ধৰি ৰাজনৈতিক আৰু আইনগতভাৱে আগবাঢ়ি আহিছে। কেন্দ্ৰীয় সংসদে কোনো আইন গৃহীত কৰিলে, সেই আইন প্ৰযোজ্য হোৱাৰ পাছত কোনো ৰাজ্যত সংশ্লিষ্ট দলে সংসদত ইয়াৰ পক্ষত নে বিপক্ষত ভোট দিছিল, সেই কথা আইনখন প্ৰৱৰ্তনৰ ক্ষেত্ৰত পৃথক বাধা হৈ নাথাকে।
সেই কাৰণেই বিহাৰত ইউচিচি প্ৰৱৰ্তনৰ প্ৰশ্নত বিজেপি আৰু জেডিইউৰ মাজত মতভেদে আগন্তুক দিনত নতুন ৰাজনৈতিক সংঘাতৰ সৃষ্টি কৰিব পাৰে বুলি ধাৰণা কৰা হৈছে। মিত্ৰজোঁটৰ ভিতৰত থকা এই মতপাৰ্থক্য কিমান দূৰ গম্ভীৰ ৰূপ লয়, এতিয়া সেয়াই লক্ষ্যণীয় হৈ পৰিছে।
