ৰাছিয়া-ইউক্ৰেনৰ বিবাদে তীব্ৰ উত্তেজনাৰ সৃষ্টি কৰাৰ সময়তে প্ৰায় পাঁচটা ৰাছিয়ান বেংক আৰু তিনিজন বিলিয়নাৰৰ ওপৰত নিষেধাজ্ঞা ঘোষণা কৰিছে ব্ৰিটেইনে।
ব্ৰিটেইনৰ প্ৰধানমন্ত্ৰী বৰিছ জনছনে আজি ব্ৰিটিছ সংসদত ৰাছিয়াৰ বিৰুদ্ধে এইয়া প্ৰথম পদক্ষেপ হিচাপে ঘোষণা কৰিছে।
নিষেধাজ্ঞাৰ সন্মুখীন হোৱা বেংক তথা ব্যক্তিকেইজনৰ ব্ৰিটেইনত থকা যিকোনো সম্পত্তি বাজেয়াপ্ত কৰা হ’ব আৰু সংশ্লিষ্ট ব্যক্তিকেইজনক ব্ৰিটেইন ভ্ৰমণৰ ওপৰত নিষেধাজ্ঞা আৰোপ কৰা হ’ব বুলি প্ৰধানমন্ত্ৰী জনছনে কয়।
নিষেধাজ্ঞা আৰোপ কৰা বেংককেইটা হৈছে ৰছিয়া, আইএছ বেংক, জেনেৰেল বেংক, প্ৰমচভায়াজবেংক আৰু ব্লেক চি বেংক।
ৰাছিয়াই ইউক্ৰেইনত সম্পূৰ্ণ আক্ৰমণৰ পৰিকল্পনা কৰিছে বুলি মন্তব্য কৰি প্ৰধানমন্ত্ৰী বৰিছ জনছনে কয় যে সকলোৱে পুটিনৰ পৰিকল্পনাৰ পৰৱৰ্তী পদক্ষেপৰ বাবে প্ৰস্তুত হ’ব লাগিব।
ইফালে, জাৰ্মানীয়ে আজি নৰ্ড ষ্ট্ৰীম ২ গেছ পাইপলাইনৰ অনুমোদন বন্ধ কৰি দিছে।
“আজিৰ পৰিস্থিতি সলনি হৈছে। সেয়েহে শেহতীয়া ঘটনাৱলীৰ প্ৰতি লক্ষ্য ৰাখি আমি এই পৰিস্থিতিৰ পুনৰ মূল্যাঙ্কন কৰিব লাগিব।” জাৰ্মানীৰ চাঞ্চেলৰ ওলাফ শ্চোলজে কয়।
উল্লেখ্য যে ৰাছিয়া-ইউক্ৰেনৰ শেহতীয়া পৰিস্থিতিৰ প্ৰতি উদ্বেগ প্ৰকাশ কৰি আমেৰিকা যুক্তৰাষ্ট্ৰই মিত্ৰশক্তিৰ সৈতে সমন্বয় ৰক্ষা কৰি আছে আৰু মঙলবাৰে ৰাছিয়াৰ বিৰুদ্ধে নতুন নিষেধাজ্ঞা ঘোষণা কৰিব।
ইউক্ৰেইনৰ দুটা বিচ্ছিন্নতাবাদী অঞ্চল – ডনেটস্ক আৰু লুগানস্কৰ স্বাধীনতাক ৰাছিয়াই স্বীকৃতি দিয়া বুলি ঘোষণা কৰাৰ পিছতে ৰাছিয়াৰ ওপৰত এই নিষেধাজ্ঞা আৰোপ কৰা হৈছে।
মঙলবাৰে পুৱতি নিশা ৰাছিয়াৰ ৰাষ্ট্ৰপতি পুটিনে শান্তি ৰক্ষা অভিযানৰ বাবে ৰাছিয়াৰ সৈন্য বাহিনীক এই অঞ্চলসমূহত প্ৰৱেশ কৰিবলৈ নিৰ্দেশ দিছিল।
