ব্ৰিটেইন চৰকাৰে গণতান্ত্ৰিক ব্যৱস্থাৰ বৃহৎ পৰিৱৰ্তনৰ ইংগিত দিছে। পৰৱৰ্তী নিৰ্বাচনত ১৬ আৰু ১৭ বছৰীয়াসকলৰ ভোটাধিকাৰ সুনিশ্চিত কৰাৰ পৰিকল্পনা কৰিছে। দেশখনৰ কৰ্তৃপক্ষৰ মতে এই পৰিৱৰ্তনে গণতন্ত্ৰৰ প্ৰতি জনসাধাৰণৰ আস্থা বৃদ্ধি কৰিব।
স্কটলেণ্ড আৰু ৱেলছৰ যুৱ ভোটাৰৰ বাবে এনে নীতি ৰূপায়ণ কৰাৰ পিছত ব্ৰিটেইনৰ বৰ্তমানৰ শাসকীয় লেবাৰ পাৰ্টিয়ে সেই পথ অনুসৰণ কৰিব বিচাৰিছে। তেওঁলোকৰ মতে ইয়াৰ ফলত ভোটাধিকাৰত সামঞ্জস্য সৃষ্টি হ’ব।
এক সাক্ষাৎকাৰত ব্ৰিটেইনৰ প্ৰধানমন্ত্ৰী ছাৰ কেয়াৰ ষ্টাৰমাৰে কয় যে কামত যোগদান কৰিবলৈ তেওঁলোকৰ (তৰুণ-তৰুণী) বয়সটো যথেষ্ট। কৰ দিব পৰাকৈও তেওঁলোকৰ যথেষ্ট বয়স হৈছে। মই ভাবো আপোনাৰ টকা ক’ত খৰচ হয় সেইটো কোৱাৰ সুযোগ পোৱা উচিত। তদুপৰি চৰকাৰে কোন পথে যোৱা উচিত সেই সন্দৰ্ভতো তেওঁলোকে মতামত দিব পাৰিব।
ভোটাধিকাৰৰ এই পৰিৱৰ্তনৰ বাবে সংসদীয় অনুমোদনৰ প্ৰয়োজন। কিন্তু সংসদত এই আইনখন গৃহীত কৰাৰ বাটত বিশেষ বাধা আহিব যেন নালাগে। কাৰণ যোৱা বছৰ নিৰ্বাচনী প্ৰচাৰত তৰুণসকলক ভোটাধিকাৰ দিয়াৰ প্ৰতিশ্ৰুতি দি লেবাৰ পাৰ্টিয়ে সংসদত সংখ্যাগৰিষ্ঠতা লাভ কৰিছিল।
ক্ষমতালৈ অহাৰ পিছত কেয়াৰ ষ্টাৰমাৰৰ জনপ্ৰিয়তা হ্ৰাস পাইছে। দেশৰ সাম্প্ৰতিক অৰ্থনৈতিক পৰিস্থিতিৰ সৈতে মোকাবিলা কৰিবলৈ তেওঁৰ চৰকাৰে ধাৰাবাহিকভাৱে ভুল সিদ্ধান্ত গ্ৰহণ কৰি আহিছে। বেছিভাগ জনমত সমীক্ষাতে তেওঁৰ দলটোৱে নাইজেল ফাৰাজৰ সোঁপন্থী ৰিফৰ্ম ইউ কে পাৰ্টিৰ পিছৰ স্থানত আছে।
অৱশ্যে ১৬-১৭ বছৰ বয়সৰ যুৱ ভোটাৰৰ ওপৰত কৰা এক সমীক্ষাত লেবাৰ পাৰ্টিৰ অৱস্থা অতি ভাল। এই সমীক্ষাটো মাৰ্লিন ষ্ট্ৰেটেজি নামৰ এটা সংস্থাই কৰিছিল। য’ত প্ৰায় ৫০০ তৰুণে অংশগ্ৰহণ কৰে।
সংবাদ মাধ্যমত প্ৰকাশিত পৰিসংখ্যাই প্ৰকাশ কৰিছে যে বেছিভাগ তৰুণে লেবাৰ পাৰ্টিক ভোট দিব। তেওঁলোকৰ সংখ্যা ৩৩ শতাংশ। আনহাতে ২০ শতাংশই ব্ৰিটেইন ৰিফৰ্ম পাৰ্টিক ভোট দিব। ১৮ শতাংশই গ্ৰীণ পাৰ্টিক ভোট দিব। ১২ শতাংশই লিবাৰেল ডেম’ক্ৰেটক ভোট দিব। এই ক্ষেত্ৰত যুক্তৰাজ্যৰ পূৰ্বৰ চৰকাৰী দল কনজাৰ্ভেটিভ পাৰ্টি তলত আছে। ১০ শতাংশ তৰুণে তেওঁলোকক ভোট দিব।
চৰকাৰী তথ্য অনুসৰি ব্ৰিটেইনত বৰ্তমান ১৬ৰ পৰা ১৭ বছৰ বয়সৰ ১৬ লাখ তৰুণ-তৰুণী আছে। মুঠ ভোটাৰৰ সংখ্যা ৪ কোটি ৮০ লাখ। ২০০১ চনৰ পিছত এই সংখ্যা সৰ্বনিম্ন। ২০২৯ চনত দেশৰ পৰৱৰ্তী সংসদীয় নিৰ্বাচন অনুষ্ঠিত হ’ব।
