লণ্ডনত থকা ব্ৰিটেইনৰ প্ৰধানমন্ত্ৰীৰ চৰকাৰী বাসগৃহ ১০ ডাউনিং ষ্ট্ৰীটত ইউক্ৰেইনৰ ৰাষ্ট্ৰপতি ভ’ল’ডিমাইৰ জেলেনস্কি আৰু ব্ৰিটিছ প্ৰধানমন্ত্ৰী কেইৰ ষ্টাৰমাৰে দ্বিপাক্ষিক বৈঠকত মিলিত হয়। বৈঠকত ষ্টাৰমাৰে ইউক্ৰেইনৰ ৰাষ্ট্ৰপতিক কয় যে আমি ইউক্ৰেইনৰ সৈতে আছো।
ইউক্ৰেইনৰ পৰিস্থিতি সন্দৰ্ভত দেশখনৰ ইউৰোপীয় মিত্ৰ দেশসমূহৰ এখন সন্মিলনৰ পূৰ্বে দুয়োগৰাকী নেতাই বৈঠকত মিলিত হয়। ৱাশ্বিংটনৰ হোৱাইট হাউছত আমেৰিকাৰ ৰাষ্ট্ৰপতি ড’নাল্ড ট্ৰাম্প আৰু উপ-ৰাষ্ট্ৰপতি জে.ডি. ভেন্সৰ সৈতে বৈঠকত উত্তপ্ত বাক্য বিনিময়ৰ পিছত ব্ৰিটেইন ভ্ৰমণলৈ গৈছে জেলেনস্কি।
১০ নং ডাউনিং ষ্ট্ৰীটত উপস্থিত হোৱাৰ লগে লগে ষ্টাৰমাৰে জেলেনস্কিক উষ্ম আদৰণি জনায়। পিছত দুয়োগৰাকী নেতাই দ্বিপাক্ষিক বৈঠকত মিলিত হয়। সেই সময়ত ষ্টাৰমাৰে কয়, “যিমান দিন প্ৰয়োজন হয় আমি ইউক্ৰেইনৰ কাষত থিয় দিম।”
ষ্টাৰমাৰে ইউক্ৰেইনত স্থায়ী শান্তি অৰ্জনৰ বাবে নিজৰ “অটল দৃঢ় সংকল্প”কো পুনৰবাৰ উল্লেখ কৰে। বিবিচিয়ে জনোৱা মতে, ব্ৰিটেইনে ইউক্ৰেইনক ২.২৬ বিলিয়ন পাউণ্ড ঋণ দিবলৈ সন্মত হৈছে যাতে দেশখনৰ প্ৰতিৰক্ষা ব্যৱস্থা গঢ়ি তোলাত সহায় হয়।
জেলেনস্কিয়ে ষ্টাৰমাৰক তেওঁৰ সহায়ৰ বাবে ধন্যবাদ জনায়। এনে অংশীদাৰ আৰু বন্ধু পাই আমি গৌৰৱান্বিত বুলিও তেওঁ কয়।
ইউক্ৰেইনৰ ৰাষ্ট্ৰপতিগৰাকীয়ে লগতে কয় যে, “যুদ্ধৰ আৰম্ভণিৰে পৰাই ইমান ডাঙৰ সহায় আগবঢ়োৱাৰ বাবে আমি যুক্তৰাজ্যৰ নাগৰিকসকলক ধন্যবাদ জনাইছো।”
দেওবাৰে ব্ৰিটেইনৰ ৰজা তৃতীয় চাৰ্লছৰ সৈতে সাক্ষাৎ কৰাৰ কথা আছে জেলেনস্কিয়ে। এই বৈঠকৰ বাবে অনুৰোধ মঞ্জুৰ কৰাৰ বাবে ইউক্ৰেইনৰ ৰাষ্ট্ৰপতিয়ে ৰজাক ধন্যবাদ জনায়।
ইয়াৰ পূৰ্বে শুকুৰবাৰে জেলেনস্কিয়ে হোৱাইট হাউছৰ অভাল অফিচত ট্ৰাম্পৰ সৈতে সাক্ষাৎ কৰে। বৈঠকৰ সময়ত দুয়োগৰাকী নেতাৰ মাজত এক অভূতপূৰ্ব বাক্ বিতণ্ডাৰ সৃষ্টি হয়।
যি পৰিস্থিতিৰ সৃষ্টি হ’ল, সেই পৰিস্থিতিত ইউক্ৰেইনৰ খনিজ সম্পদৰ ওপৰত আমেৰিকাৰ নিয়ন্ত্ৰণ সন্দৰ্ভত দুয়োগৰাকী নেতাই চুক্তি স্বাক্ষৰ কৰাৰ কথা আছিল যদিও শেষত সেয়া নহ’ল। যৌথ সংবাদমেল বাতিল কৰা হয়। ইয়াৰ কিছু সময়ৰ পিছতে জেলেনস্কিক হোৱাইট হাউছ এৰি যোৱা দেখা গৈছিল।
