ইউক্ৰেইন যুদ্ধত লোকচানৰ সন্মুখীন হোৱাৰ বাবে চোৰাংচোৱা বিষয়া সকলৰ ওপৰত খৰ্গহস্ত হৈ পৰিছে ৰাছিয়াৰ ৰাষ্ট্ৰপতি ভ্লাদিমিৰ পুটিন।
কেৱল ইমানেই নহয়, আঠজনকৈ শীৰ্ষ সেনা জেনেৰেলক বৰ্খাস্ত কৰিছে পুটিনে! ইউক্ৰেইনৰ প্ৰতিৰক্ষা সচিব অলেক্সি দানিলোভে এই দাবী কৰিছে।
তেওঁ দাবী কৰিছে যে ইউক্ৰেইনত ৰাছিয়া পৰাস্ত হৈছে আৰু এই লজ্জাজনক পৰাজয় আৰু দুৰ্বল ৰণনীতিৰ বাবে ফেডাৰেল চিকিউৰিটি চাৰ্ভিচ (এফএছবি)ৰ বিষয়াসকলো বৰ্খাস্তৰ তালিকাত আছে।
ইউক্ৰেইনৰ বাতৰি কাকত উক্ৰাইন্সকা প্ৰৱদাই প্ৰতিৰক্ষা সচিবজনৰ উদ্ধৃতি দি প্ৰকাশ কৰিছে যে এতিয়ালৈকে ৰাছিয়াৰ আঠজন সামৰিক জেনেৰেলক বৰ্খাস্ত কৰা হৈছে আৰু ৰাছিয়াই ৰণ কৌশল সলনি কৰিছে।
“ৰাছিয়াই নতুন সেনা জেলেৰেল নিযুক্তি দিছে। ৰাছিয়ান ফেডাৰেচনত কি ঘটিছে আমি স্পষ্টভাৱে বুজি পাওঁ। মই ক’ব পাৰোঁ যে তেওঁলোক হতাশ।”— দানিলোভে কয়।
“ৰাছিয়ানসকলে কেতিয়াও ভবা নাছিল যে ইউক্ৰেইন ইমান ঐক্যবদ্ধ ৰাষ্ট্ৰ।”— দানিলোভে লগতে কয়।
অৱশ্যে যুদ্ধৰ ভৱিষ্যত সন্দৰ্ভত তেওঁ কয় যে আগন্তুক পথটো ইমান সহজ নহ’ব। শত্ৰুক দুৰ্বল বুলি উলাই কৰা উচিত নহয়।
