ৰাছিয়াক ধৰাশায়ী কৰিবলৈ যুদ্ধক্ষেত্ৰত ৰবট সেনা মোতায়েন কৰিছে ইউক্ৰেইনে। ইউক্ৰেইনৰ প্ৰাক্তন প্ৰতিৰক্ষা মন্ত্ৰী মিখাইল ফেড’ৰভে শনিবাৰে এই কথা ঘোষণা কৰিছে।
এইবাৰ ৰবট সেনাৰ শক্তিৰ সবিশেষ চৰ্চালৈ আহিছে। শত্ৰুৰ প্ৰতিৰক্ষা লাইনৰ পিছফালে বিমানেৰে নমোৱা ইউক্ৰেইনৰ ‘কামিকাজে গ্ৰাউণ্ড ৰবট’ অভিযানত প্ৰায় ৩ হাজাৰ ৰাছিয়ান সৈন্য নিহত হৈছে। এই দাবী ইউক্ৰেইনৰ সেনাৰ।
‘অপাৰেচন ভিভাল্ডি’ নামৰ এই গোপন অভিযান মে’ মাহৰ পৰা আৰম্ভ হৈছিল। যোৱা সপ্তাহত ইউক্ৰেইনৰ সশস্ত্ৰ বাহিনীৰ থাৰ্ড আৰ্মী কৰ্পছে এই অভিযানৰ সবিশেষ প্ৰকাশ কৰিছিল।
দাবী কৰা হৈছে যে এই অভিযানত ডনেস্কৰ বিবাদিত অঞ্চলত পাঁচখন গাঁও আৰু তিনিটা বসতি পুনৰ দখল কৰা হৈছে। ইউক্ৰেইনৰ থাৰ্ড আৰ্মী কৰ্পছৰ অধিনায়ক জেনেৰেল এণ্ড্ৰি বিলেটস্কিয়ে কয় যে, “আমি বিশ্বৰ ভিতৰতে প্ৰথমে গ্ৰাউণ্ড ৰবট এয়াৰড্ৰপিঙৰ এই কৌশল ব্যৱহাৰ কৰিছো।”
বোমাৰু ড্ৰ’নৰ সহায়ত ৰাছিয়াৰ ফ্ৰণ্টলাইনৰ পিছফালে সৰু সৰু মানৱবিহীন ভূমি বাহন বা ইউজিভি নমোৱা হয়। এইবোৰ আচলতে ৰবট। যিটো দূৰৈৰ পৰা ৰিমোটেৰে চলাব পাৰি। ইয়াৰ ভিতৰত বিস্ফোৰক সামগ্ৰী ভৰ্তি হৈ থাকে। লক্ষ্যত উপনীত হ’লেই বিস্ফোৰণ ঘটে। ৰবটটোৰ কেমেৰাৰ সহায়ত অপাৰেটৰে সমগ্ৰ অঞ্চলটো স্পষ্টকৈ চাব পাৰে।
ইউক্ৰেইনৰ সেনাই দাবী কৰিছে যে মে’ মাহৰ পৰা চলি থকা এই অভিযানত কমেও ১৫,৭০০টা আক্ৰমণ সংঘটিত হৈছে। এই ৰবটসমূহে মূলতঃ ৰাছিয়াৰ কমাণ্ড পোষ্ট, সেনাৰ আশ্ৰয় শিবিৰ, লজিষ্টিক চেণ্টাৰ, নদী পাৰ হোৱা স্থানসমূহক আক্ৰমণৰ লক্ষ্য কৰি লয়।
বিলেটস্কিয়ে দাবী কৰে, “শত্ৰু আকাশৰ পৰা আক্ৰমণৰ বাবে সাজু থাকে। কিন্তু স্থলভাগৰ পৰা আক্ৰমণ অতি অপ্ৰত্যাশিত। সেয়ে শত্ৰুৱে নিৰাপদ বুলি ভবা ঠাইতে তেওঁলোকৰ সৈন্য নিহত আৰু আহত হৈছে।”
