নাগা সমস্যা অতি সোনকালেই ওৰ পেলাবলৈ মন মেলিছে কেন্দ্ৰীয় গৃহ মন্ত্ৰালয়ে। তেনে সময়তে কেন্দ্ৰীয় চৰকাৰৰ সৈতে আলোচনাপন্থী আলফা নেতাৰ আলোচনা অন্তিম পৰ্যায় পোৱাহি বুলি জানিবলৈ দিছে আলোচনা পন্থী আলফা নেতা অনুপ চেতিয়াই।
“আলোচনা প্ৰায় অন্তিম পৰ্যায়ত আছে। অসমৰ খিলঞ্জীয়া জাতি- জনগোষ্ঠীক সাংবিধানিক সুৰক্ষাকৱচ কেনেকৈ দিব পৰা যায়, এই কথাটোৰ ওপৰতে লাগি আছে এতিয়া,”-নৰ্থ ইষ্ট নাওৰ সাংবাদিকৰ আগত এইদৰে কয় চেতিয়াই।
ইপিনে ৬ নং দফা ৰূপায়ণৰ পৰামৰ্শৰ বাবে যি সমিতি গঠন কৰি দিছে তেওঁলোকৰ প্ৰতিবেদনৰ ওপৰতো খিলঞ্জীয়াৰ ভৱিষ্যত নিৰ্ভৰ কৰিব বুলি চেতিয়াই কয়।
তেওঁ লগতে কয়, “কেন্দ্ৰীয় চৰকাৰৰ সৈতে যি আলোচনাৰ ধাৰা চলি আছে সেই ধাৰাত আমি বৰ্তমানলৈকে সুখী। পৰৱৰ্তী আলোচনা খুব সোনকালেই হ’ব।”
তাৎপৰ্যপূৰ্ণভাৱে আলোচনাপন্থী আলফাৰ দাবীসমূহ পূৰণৰ ক্ষেত্ৰত কেন্দ্ৰীয় চৰকাৰে ইতিবাচক ভূমিকা লৈছে বুলি সদৰী কৰে চেতিয়াই।
তেওঁ কয়, “আমি খিলঞ্জীয়াৰ সাংবিধানিক আৰু ভূমিৰ অধিকাৰ নিশ্চত কৰিবৰ বাবেহে বেছিকৈ জোৰ দিছো।”
ইপিনে বৰ্তমানলৈকে কেন্দ্ৰীয় চৰকাৰৰ সৈতে বহু লানি আলোচনা কৰা বুলি চেতিয়াই দাবী কৰে।
আনহাতে, পৰেশ বৰুৱা অবিহনেও এক শান্তি চুক্তি হ’ব বুলি চেতিয়াই মন্তব্য কৰে।
“আমি কেন্দ্ৰীয় চৰকাৰৰ ওচৰত যিখিনি দাবী উত্থাপন কৰিছো, পৰেশ বৰুৱা অবিহনেও ভাৰত চৰকাৰৰ ইচ্ছা-আগ্ৰহ থাকিলে এখন শান্তি চুক্তি হ’ব,”-চেতিয়াই কয়।
অৱশ্যে, পৰেশ বৰুৱা নোহোৱাকৈ ভাৰত চৰকাৰৰ সৈতে আলফাই আলোচনা হয়তো কৰিব পাৰিব। কিন্তু দীৰ্ঘদিনিয়া সংগ্ৰামৰ অন্তত ভাৰত চৰকাৰ আৰু আলফাৰ এই ৰাজনৈতিক প্ৰক্ৰিয়া কিমান সফল হ’ব? অসমলৈ স্থায়ী শান্তি আহিব নে? সেয়া কিন্তু গুৰুত্বপূৰ্ণ প্ৰশ্ন।
উল্লেখযোগ্য যে, ২০০৮ চনত আলফাৰ ২৮ নম্বৰ বেটেলিয়নে যুদ্ধ বিৰতি ঘোষণা কৰাৰ পাছৰে পৰা ভাৰত চৰকাৰৰ সৈতে আলোচনা আৰম্ভ হয়। পৰৱৰ্তী সময়ত এই প্ৰক্ৰিয়াত যোগ দিলে সভাপতি অৰবিন্দ ৰাজখোৱা, ৰাজু বৰুৱা, শশ চৌধুৰী, চিত্ৰবন হাজৰিকা প্ৰমুখ্যে নেতা সকলে।
২০১৫ চনত আলফাৰ সাধাৰণ সম্পাদক অনুপ চেতিয়াৰ বাংলাদেশৰ পৰা প্ৰত্যাৱৰ্তনৰ পাছত আলোচনা প্ৰক্ৰিয়াৰ সৈতে তেঁৱো জড়িত হৈ পৰে।
