তিনিচুকীয়া আৰক্ষীয়ে গ্ৰেপ্তাৰ কৰাৰ কিছুদিন পিছতে আলফা (স্বাধীন)ৰ ব্ৰিগেডিয়াৰ ৰূপম অসম ওৰফে কান্ত বৰাক ৰাষ্ট্ৰীয় তদন্ত সংস্থা
(নিয়া)ই আনুষ্ঠানিকভাৱে জিম্মাত লৈছে।
সূত্ৰসমূহে নিশ্চিত কৰিছে যে আলফা (স্বাধীন)ৰ জ্যেষ্ঠ নেতাগৰাকীৰ যোৱা তিনিদিন ধৰি গুৱাহাটীৰ সমীপৰ সোণাপুৰৰ নিয়াৰ কাৰ্যালয়ত মাৰাথন জেৰা অব্যাহত ৰাখিছে।
হত্যা, অপহৰণকে ধৰি সশস্ত্ৰ বিদ্ৰোহীৰ কাৰ্যকলাপৰ গুৰুতৰ অপৰাধৰ সৈতে জড়িত কেইবাটাও চলি থকা তদন্তৰ মূল ব্যক্তি ৰূপম অসম বুলি কোৱা হৈছে।
উত্তৰ-পূবত চলি থকা বিদ্ৰোহী নেটৱৰ্ক দমনৰ অংশ হিচাপে নিয়াই পূৰ্বে তেওঁৰ বিৰুদ্ধে একাধিক গোচৰ ৰুজু কৰিছিল।
জানিব পৰা মতে, তেওঁৰ আনুষ্ঠানিক জিম্মা নিশ্চিত হোৱাৰ লগে লগে নিয়াই আলফা নেতাগৰাকীৰ পূৰ্বৰ কাণ্ডৰ সৈতে জড়িত গোচৰৰ ফাইলসমূহ পুনৰ মুকলি কৰিছে।
ৰূপম অসমৰ জেৰাত আলফা (স্বাধীন)ৰ কামকাজৰ বিষয়ে বহু তথ্য উন্মোচিত হ’ব পাৰে বুলি ধাৰণা কৰা হৈছে।
অৱশ্যে তেওঁক কোন বিশেষ অভিযোগৰ অধীনত আদালতত হাজিৰ কৰা হ’ব সেই বিষয়ে এতিয়াও কোনো কথা প্ৰকাশ কৰা নাই নিয়াই ।
