ধলাৰ গুলীচালনাত নিহতৰ সকাম-নিকামৰ খৰচৰ দায়িত্ব ল’লে অসমৰ দল-সংগঠনে
যোৱা ১ নবেম্বৰত ধলাৰ খেৰবাৰী গাঁৱত দুস্কৃতিকাৰীৰ গুলীত নিহত ব্যক্তিকেইগৰাকীৰ পৰিয়ালৰ লোকসকলক সমবেদনা জনোৱৰ উদ্দেশ্যে আজি আলোচনা পন্থী নেতা প্ৰবাল নেওগৰ নেতৃত্বত এটা ১০০ জনীয়া প্ৰতিনিধিৰ দল শোকস্তব্ধ পৰিয়ালবৰ্গৰ কাষত উপস্থিত হয়।
এই সম্পৰ্কত তেওঁ নৰ্থ-ইষ্ট নাওৰ সৈতে হোৱা কথা-বতৰাত তেওঁ কয়, ‘ভূপেন হাজৰিকাৰ ‘মানুহে মানুহৰ বাবে’ বাক্যশাৰী সাৰোগত কৰি তেওঁৰ সপ্তম মৃত্যু বাৰ্ষিকীৰ দিনাই খেৰবাৰীত দুস্কৃতিকাৰীৰ গুলীত নিহত হোৱা ৫ জনকৈ লোকৰ বাসগৃহলৈ যোৱাৰ সিদ্ধান্ত গ্ৰহণ কৰা হৈছিল। কিন্তু কাকপথাৰ কেম্পত কালি এখন সভা থকাৰ বাবে যাব পৰা নহ’ল।‘
অঞ্চলটোৰ সকলোকে শান্তি-সম্প্ৰীতি ৰক্ষা কৰি কোনো কাৰণতে গোষ্ঠীগত সংঘাতৰ সৃষ্টি নকৰিবলৈ আহ্বান জনাই পূৰ্বৰে পৰা অঞ্চলটোৰ বাঙালী ভাষী আৰু অন্যান্য জনগোষ্ঠীৰ মাজত তেওঁৰ সম্পৰ্ক ভাল বুলি নেওগে নৰ্থ-ইষ্ট নাওৰ আগত উল্লেখ কৰে।
নেওগে নৰ্থ-ইষ্ট নাওৰ আগত লগতে কয় যে মত বিনিময়ৰ সময়ত অঞ্চলটোৰ ৰাইজে ‘ৰাজনৈতিক নেতাসকলে খাতি খোৱা মানুহক টাৰ্গেট কৰি লয়’ বুলি উল্লেখ কৰি তেওঁলোকক ইয়াৰ পৰা বিৰত থাকিবলৈ কয়।
প্ৰবাল নেওগৰ সৈতে যোৱা আন সদস্যসকলৰ ভিতৰত আছে কাকপথাৰ কেম্পৰ পৰা অন্টু চাওদাং, দিবাকৰ মৰাণকে ধৰি ২০ জন সদস্য, খিলঞ্জীয়া মঞ্চৰ প্ৰতিনিধি, টাই আহোম ছাত্ৰ সন্থাৰ শদিয়া জিলা সভাপতি-সম্পাদক, সোণোৱাল কছাৰী ছাত্ৰ সন্থাৰ ধলাৰ স্থানীয় সদস্য, গোৰ্খা ছাত্ৰ সন্থাৰ ৭ জন সদস্য আৰু জাতীয়তাবাদী যুৱ ছাত্ৰ পৰিষদৰ সদস্য।
আনহাতে দলটোত যোৱা সদস্য সকলে মিলি নিহত লোককেইজনৰ ‘সকামৰ(কাজ) সকলো খৰচ বহন কৰিব’ বুলি নেওগে নৰ্থ-ইষ্ট নাওক জনায়।
উল্লেখযোগ্য যে, নিজকে বাঙালী ভাষীসকলৰ সুৰক্ষাৰ বাবে মাত মাতি অহা বুলি কৈ অহা শিলাদিত্য দেব আজি পৰ্যন্ত ধলাৰ উক্ত গুলীচালনাত নিহতসকলৰ পৰিয়ালবৰ্গৰ কাষত উপস্থিত হোৱা নাই।