যোৰহাট জিলাত আলফাৰ সৈতে সম্পৰ্ক থকাৰ অভিযোগত মুন্না দাস ওৰফে পঙ্কজ দাস নামৰ এজন যুৱকক আৰক্ষীয়ে গ্ৰেপ্তাৰ কৰিছে। দেওবাৰে পূজাডুবি অঞ্চলৰ পৰা আৰক্ষীৰ অভিযানত আটক কৰা হয় লোকজনক। গ্ৰেপ্তাৰৰ পাছত সোমবাৰে তেওঁক তেজপুৰ ন্যায়িক দণ্ডাধীশৰ আদালতত হাজিৰ কৰোৱা হয়।
আৰক্ষীৰ তথ্য অনুসৰি, তেজপুৰ থানাত ৰুজু হৈ থকা ৪৯৯/২৬ নম্বৰৰ গোচৰৰ ভিত্তিত ধৃত ব্যক্তিজনক আদালতত হাজিৰ কৰাই আৰক্ষীৰ জিম্মাত লোৱা হৈছে। তদন্তৰ স্বাৰ্থত তেওঁৰ সোধাপোছা অব্যাহত ৰখা হৈছে।
আৰক্ষীয়ে জনোৱা মতে, মুন্না দাসৰ পৰা দুটা ম’বাইল ফোন আৰু ছখন ছিম কাৰ্ড উদ্ধাৰ কৰা হৈছে। ইয়াৰ লগতে চাৰি ৰাউণ্ড গুলীসহ এটা পিষ্টলও জব্দ কৰাৰ কথা আৰক্ষীয়ে প্ৰকাশ কৰিছে। ধৃত ব্যক্তিজনৰ ঘৰ শিৱসাগৰ জিলাত বুলি জানিব পৰা গৈছে।
আলফাৰ সৈতে তেওঁৰ প্ৰকৃত সম্পৰ্ক, উদ্ধাৰ হোৱা অস্ত্ৰ-গুলীৰ উৎস আৰু ম’বাইল ফোন তথা ছিম কাৰ্ডসমূহৰ ব্যৱহাৰ সন্দৰ্ভত তদন্ত আগবঢ়াইছে আৰক্ষীয়ে। সোধাপোছাৰ জৰিয়তে এই ঘটনাৰ সৈতে জড়িত আন তথ্য বা ব্যক্তিৰ সন্ধান পোৱাৰ চেষ্টা চলি আছে।
