বহু চৰ্চাৰ অৱশেষত আজি দিল্লীত কেন্দ্ৰীয় আৰু অসম চৰকাৰৰ সৈতে ত্ৰিপাক্ষিক শান্তি চুক্তি স্বাক্ষৰ কৰিলে আলফাৰ আলোচনাপন্থী গোটে। কেন্দ্ৰীয় গৃ্হমন্ত্ৰী অমিত শ্বাহ, অসমৰ মুখ্যমন্ত্ৰী হিমন্ত বিশ্ব শৰ্মাই এই চুক্তিত কেন্দ্ৰ আৰু ৰাজ্য চৰকাৰক প্ৰতিনিধিত্ব কৰে।
জানিব পৰা মতে অসমৰ ১২৬টা বিধানসভা সমষ্টিৰ ১০২টা খিলঞ্জীয়াৰ বাবে সংৰক্ষিত কৰা, ৰাষ্ট্ৰীয় নাগৰিকপঞ্জী উন্নীতকৰণ, খিলঞ্জীয়াক ভূমিৰ অধিকাৰ প্ৰদান, ছয়টা খিলঞ্জীয়া জনজাতিক এছ টি মৰ্যাদা প্ৰদান, অসমৰ বানপানীক ৰাষ্ট্ৰীয় দুৰ্যোগ ঘোষণা, শিক্ষানুষ্ঠান আৰু চৰকাৰী চাকৰিত খিলঞ্জীয়াৰ বাবে ৮৮ শতাংশ আসন সংৰক্ষণ প্ৰদান ইত্যাদি দাবীয়ে এই চুক্তিত স্থান পাইছে।
এই চুক্তি স্বাক্ষৰ সন্দৰ্ভত দিল্লীত সাংবাদিকৰ আগত গৃহমন্ত্ৰী অমিত শ্বাহে কয় যে আলফাৰ সকলো যুক্তিসংগত দাবী নিৰ্দিষ্ট সময়ৰ ভিতৰত পূৰণ কৰা হ’ব বুলি কেন্দ্ৰই নিশ্চিত কৰিব আৰু সংগঠন হিচাপে আলফাক চুক্তি অনুসৰি ভংগ কৰা হ’ব।
উত্তৰ-পূবত শান্তি আৰু স্থিতিশীলতা অনাৰ বাবে প্ৰধানমন্ত্ৰী নৰেন্দ্ৰ মোদীক কৃতিত্ব প্ৰদান কৰিছে শ্বাহে। শান্তি প্ৰক্ৰিয়াৰ সফলতা নিশ্চিত কৰাৰ বাবে কেন্দ্ৰৰ ওপৰত আলফাৰ আস্থাক সন্মান জনোৱা হ’ব বুলি আলফা নেতৃত্বক আশ্বাস প্ৰদান কৰে গৃ্হমন্ত্ৰী শ্বাহে।
ইফালে মুখ্যমন্ত্ৰী হিমন্ত বিশ্ব শৰ্মাই আলফাৰ সৈতে হোৱা শান্তি চুক্তিয়ে ৰাজ্যত বিদ্ৰোহৰ সমস্যা বহু পৰিমাণে সমাধান কৰিব বুলি মন্তব্য কৰে। অৱশ্যে চুক্তি সন্দৰ্ভত বিতং তথ্য এইপৰ্যন্ত প্ৰকাশ কৰা নাই কোনো এটা পক্ষই।
ইফালে আলফাৰ আলোচনাপন্থী গোটে চুক্তি স্বাক্ষৰ কৰিলেও পৰেশ বৰুৱা নেতৃত্বাধীন আলফা (স্বাধীন) এতিয়াও আলোচনাৰ মেজলৈ অহা নাই।
