নিষিদ্ধঘোষিত বিদ্ৰোহী সংগঠন সংযুক্ত মুক্তি বাহিনী, অসম (স্বাধীন) – এ সংগঠনটোৰ কেন্দ্ৰীয় সমিতি পুনৰ গঠন কৰিছে। এক প্ৰেছ বিবৃতিৰ জৰিয়তে সংগঠনটোৱে জনোৱা মতে, সাম্প্ৰতিক প্ৰেক্ষাপট আৰু সকলো দিশ পৰ্যালোচনা কৰি তেওঁলোকৰ উচ্চতম, উচ্চ আৰু নিম্ন পৰিষদ কেউখন ভংগ কৰি এক নতুন সমিতি গঠন কৰিছে।
এই নৱগঠিত কেন্দ্ৰীয় সমিতিৰ সভাপতিৰ দায়িত্বত আছে জেনেৰেল পৰেশ অসম আৰু উপ-সভাপতি হিচাপে নিযুক্তি দিয়া হৈছে মেজৰ জেনেৰেল মাইকেল অসমক।
আনহাতে মৈত্রী অসমক সাধাৰণ সম্পাদক, পৰমা অসমক সাংস্কৃতিক সম্পাদক আৰু মিল্টন অসমক সাংগঠনিক সম্পাদকৰ গুৰুত্বপূৰ্ণ দায়িত্ব অৰ্পণ কৰা হৈছে।
এই নতুন তালিকাত বিত্ত বিভাগৰ দায়িত্বত কেইবাজনো সদস্যক নিযুক্তি দিয়া হৈছে, যাৰ ভিতৰত ব্ৰিগেডিয়াৰ মানিক অসম, মেজৰ অভিমন্যু অসম, মেজৰ নিৰ্ণয় অসম আৰু লেফটেনেণ্ট চয়ন অসম অন্যতম।
মহিলা কল্যাণৰ দায়িত্বত কৰ্ণেল মিনতি অসমৰ লগতে শিখা অসমক সহকাৰী সম্পাদিকা হিচাপে নিৰ্বাচিত কৰা হৈছে।
ইয়াৰ উপৰিও লেফটেনেণ্ট কৰ্ণেল চিদাক কৃষি আৰু আশ্ৰয়স্থল উন্নয়ন সম্পাদক, কৰ্ণেল প্ৰবুদ্ধক জনস্বাস্থ্য আৰু সহকাৰী বৈদেশিক সম্পাদক তথা মেজৰ নিৰ্ণয় অসমক প্ৰচাৰ সম্পাদকৰ অতিৰিক্ত দায়িত্ব দিয়া হৈছে।
সংগঠনটোৰ এই পৰিৱৰ্তনে ৰাজ্যৰ ৰাজনৈতিক মহলত বিশেষ চৰ্চা লাভ কৰিছে।
