টি-২০ বিশ্বকাপত প্ৰথমখন খেলত ওমানক পৰাস্ত কৰাৰ পিছত জিম্বাবুৱে অষ্ট্ৰেলিয়াৰ বিৰুদ্ধেও জয়লাভ কৰে। আৰু যেতিয়া বৰষুণৰ বাবে আয়াৰলেণ্ডৰ মেচখন পৰিত্যক্ত হৈ পৰে, তেতিয়া ছিকন্দৰ ৰাজাৰ দলটোৰ ছুপাৰ এইটত স্থান নিশ্চিত হৈ যায়। এইবাৰ গ্ৰুপ পৰ্যায়ৰ অন্তিমখন খেলত শ্ৰীলংকাক পৰাস্ত কৰি ৰোডেছিয়াৰ দলটো গ্ৰুপৰ শ্ৰেষ্ঠ হয়।
এই জয়ৰ জৰিয়তে জিম্বাবুৱেই ৪খন মেচৰ পৰা সৰ্বাধিক ৭ পইণ্ট লাভ কৰি নিজৰ গ্ৰুপৰ তালিকাৰ শীৰ্ষত আছে। শ্ৰীলংকাই একে সংখ্যক খেলৰ পৰা ৬ পইণ্ট লাভ কৰি দুই নম্বৰত আছে। এই তালিকাৰ তৃতীয় স্থানত আছে আয়াৰলেণ্ড। তেওঁলোকে ৩ পইণ্ট সংগ্ৰহ কৰিছে। ইফালে অষ্ট্ৰেলিয়া আৰু ওমানে চাৰি আৰু পাঁচ নম্বৰত আছে।
বৃহস্পতিবাৰে প্ৰথমে বেটিং কৰি শ্ৰীলংকাই ২০ অভাৰত ৭ উইকেটত ১৭৮ ৰান সংগ্ৰহ কৰে। ইয়াৰ প্ৰত্যুত্তৰত জিম্বাবুৱেই হাতত ৩টা বল আৰু ৬টা উইকেট থকা অৱস্থাত জয় নিশ্চিত কৰে।
লক্ষ্য অনুসৰণ কৰি জিম্বাবুৱেই ৬৯ ৰানৰ অপেনিং পাৰ্টনাৰশ্বিপ লাভ কৰে। সেইটোৱেই জিম্বাবুৱেক জয়ৰ ভেটি গঢ়ি দিয়ে। অ’পেনাৰ তাদিৱান্সে মাৰুমানীয়ে ২৬টা বলত ৩৪ ৰান সংগ্ৰহ কৰে। মাত্ৰ ১২টা বলত ২৩ ৰান সংগ্ৰহ কৰে ৰিয়ান বাৰ্লে।
ইয়াৰ পিছত দলৰ অধিনায়ক ছিকন্দৰ ৰাজাই অ’পেনাৰ ৰিয়ান বাৰ্লৰ সৈতে ৬৯ ৰানৰ গুৰুত্বপূৰ্ণ যুটী গঢ়ি তোলে। এই পাৰ্টনাৰশ্বিপৰ জৰিয়তে জিম্বাবুৱে জয়ৰ অতি ওচৰ চাপিছিল। কিন্তু ৰাজাই বিজয় লৈ উভতি আহিব নোৱাৰিলে। মাত্ৰ ২৬টা বলত ৪৫ ৰানৰ দুৰ্দান্ত ইনিংছ খেলি আউট হয়। তাৰ পিছত ব্রায়ান বেনেটে টনি মুনয়োৰ সৈতে জয় নিশ্চিত কৰে৷ তেওঁ ৬৩ ৰানত অপৰাজিত হৈ থাকে। মুনয়োয়ো ৮ ৰানত অপৰাজিত হৈ থাকে।
ইয়াৰ পূৰ্বে কলম্বোত অনুষ্ঠিত খেলখনৰ আৰম্ভণিতে বেটিং কৰিবলৈ নামে শ্ৰীলংকাই। অ’পেনাৰ দুজনৰ বাবেই তেওঁলোকে ভাল আৰম্ভণি লাভ কৰে। অপেনিং পাৰ্টনাৰশ্বিপত ৫৪ ৰান আহে। কুশাল পেৰেৰাই ১৪টা বলত ২২ ৰান সংগ্ৰহ কৰি আউট হয়। পৰৱৰ্তী উইকেটৰ বাবে কুশল মেণ্ডিছে ২০টা বলত ১৪ ৰান সংগ্ৰহ কৰে। ইফালে পাথুম নিশংকাই অৰ্ধ শতক সম্পূৰ্ণ কৰাৰ পিছত ৬২ ৰানত আউট হয়।
পৱন ৰত্নায়কে মাত্ৰ ২৫টা বলত ৪৪ ৰান সংগ্ৰহ কৰে। ডুনিথ ভেল্লালাঘেও ৮টা বলত ১৫ ৰান সংগ্ৰহ কৰে। আন কোনো বেটছমেনে দুটা অংক স্পৰ্শ কৰিব নোৱাৰিলে।
