সদৌ অসম পুথি প্ৰকাশক আৰু বিক্ৰেতা সংস্থাই অনুষ্ঠিত কৰি অহা উত্তৰ-পূব গ্ৰন্থমেলাখন চৰকাৰৰ বিধি-পথালিৰ বাবে এইবাৰ অনুষ্ঠিত হোৱাত অনিশ্চয়তা আহি পৰিছে। পূৰ্বৰ কংগ্ৰেছ চৰকাৰৰ সময়ত চৰকাৰৰ ৰোষত পৰা বিক্ৰেতা সংস্থা এইবাৰ পৰিৱৰ্তনকামী বিজেপি চৰকাৰখনৰো ৰোষত পৰিছে।
অহা ৯-২০ নৱেম্বৰলৈ চানমাৰিৰ অসম অভিযান্ত্ৰিক প্ৰতিষ্ঠানৰ খেলপথাৰত বিংশতিতম উত্তৰ-পূব গ্ৰন্থমেলা অনুষ্ঠিত কৰাৰ কথা আছিল। তাৰ বাবে অহা ১ৰপৰা ২২ নৱেম্বৰলৈ খেলপথাৰখন বিক্ৰেতা সংস্থাই তেওঁলোকৰ নামত সংৰক্ষিত কৰাৰ বাবে খেলপথাৰ সমিতিক ২৫ হাজাৰ টকা আগধনো আদায় দিছিল। কিন্তু সংস্থাৰ এই প্ৰচেষ্টাক মষিমূৰ কৰাৰ বাবে চৰকাৰী পৃষ্ঠপোষকতাতে এক ষড়যন্ত্ৰ আৰম্ভ হোৱাৰ উমান পোৱা গৈছে।
জানিব পৰা মতে হঠাৎ নৱেম্বৰ মাহৰ পৰা জানুৱাৰী মাহলৈ খেলপথাৰখন অসম প্ৰকাশন পৰিষদৰ নামত সংৰক্ষণ কৰা হৈছে। এই সময়ছোৱাত প্ৰকাশন পৰিষদে এখন শিশু গ্ৰন্থমেলা আৰু তাৰ পিছত গুৱাহাটী গ্ৰন্থমেলাখন অনুষ্ঠিত কৰিব। আনহাতে, জানুৱাৰিৰপৰা মাৰ্চ মাহলৈকে খেলপথাৰখন অইনৰ নামত সংৰক্ষিত হৈ আছে। সেয়েহে মাৰ্চ মাহলৈ গ্ৰন্থমেলা পাতিবলৈ খেলপথাৰখন খালী নাই।
এতিয়া মাৰ্চ মাহৰ পিছত যিহেতু গ্ৰন্থমেলা পতাৰ পৰিৱেশ নাথাকে আৰু গ্ৰন্থমেলা অনুষ্ঠিত কৰিবলৈ অইন উপযুক্ত খেলপথাৰো নাই, গতিকে উত্তৰ-পূব গ্ৰন্থমেলাখন অনুষ্ঠিত হোৱাৰ ক্ষেত্ৰত অনিশ্চয়তা বৃদ্ধি পাইছে।
আনহাতে, বিক্ৰেতা সংস্থাই জানিবলৈ দিয়া মতে জুলাইৰ শেষ সপ্তাহত খেলপথাৰ সমিতিয়ে চৰকাৰী অনুষ্ঠানে খেলপথাৰখন লোৱা বাবে সেইখন অইনক দিব পৰা নাযাব বুলি বিক্ৰেতা সংস্থাক জনাইছিল।
দুৰ্ভাগ্যজনকভাৱে পূৰ্বৰ কংগ্ৰেছ চৰকাৰৰ সময়ত উত্তৰ-পূব গ্ৰন্থমেলাখন ভৰলুমুখৰ সোণাৰাম খেলপথাৰ, পাণবজাৰৰ পাঠ্যপুথি প্ৰণয়ন নিগমৰ খেলপথাৰ আদি ঠাইত অনুষ্ঠিত কৰিব লগীয়া হৈছিল। কিন্তু পৰিৱৰ্তনৰ বাৰ্তা কঢ়িয়াব বিচৰা বৰ্তমান চৰকাৰৰ দিনতো গ্ৰন্থমেলাক লৈ ৰাজনীতি হোৱাটো পৰিতাপৰ বিষয়।
জানিব পৰা মতে পুথি প্ৰকাশক আৰু বিক্ৰেতা সংস্থাই শিক্ষা মন্ত্ৰী সিদ্ধাৰ্থ ভট্টাচাৰ্যক খন্তেক সময়ৰ বাবে সাক্ষাৎ কৰিছিল যদিও শিক্ষা মন্ত্ৰীয়ে নিশ্চিতভাৱে একো কোৱা নাই। শিক্ষা মন্ত্ৰীয়ে গ্ৰন্থমেলা এখন কৰিলে ভাল হয় বুলি উল্লেখ কৰি বিষয়টো মিলাই দিয়াৰ কথা সংস্থাক অৱগত কৰিছিল। কিন্তু সময় উকলি যোৱাৰ এই সময়ত সংস্থাই বিষয়টোত মুখ্য মন্ত্ৰীৰ হস্তক্ষেপ বিচাৰিছে।
