ৰাজ্যখনৰ ১৮ বছৰৰ তলৰ কিশোৰ-শিশুসকলৰ সৰ্বাংগীণ উন্নয়নৰ বাবে চৰকাৰীভাৱে গ্ৰহণ কৰা আঁচনিবোৰৰ ৰূপায়নৰ ক্ষেত্ৰত য়ুনিচেফে প্ৰয়োজনীয় কাৰিকৰী তথা আন সহযোগিতাসমূহ আগবঢ়াব।
অসম বিধানসভাৰ চেন্ট্ৰেল হলত দেওবাৰে আয়োজিত এক অনুষ্ঠানত এই সন্দৰ্ভত য়ুনিচেফৰ সৈতে অসম বিধানসভাৰ এখন বুজাবুজি চুক্তিত স্বাক্ষৰিত হয়।
অসম বিধানসভাৰ অধ্যক্ষ হিতেন্দ্ৰ নাথ গোস্বামীয়ে আশা প্ৰকাশ কৰে যে বুজাবুজিৰ চুক্তিখনে কেৱল শিশু আৰু কিশোৰৰ সুৰক্ষাৰ ক্ষেত্ৰতেই নহয়, লগতে মহিলাসকলৰ সুৰক্ষাৰ ক্ষেত্ৰতো ইতিমধ্যে চলি থকা চৰকাৰী আঁচনিবোৰৰ সফল ৰূপায়নত বিধাসভাৰ সদস্যসকলক সহায় কৰিব।
অধ্যক্ষ গোস্বামীয়ে কয় যে ২০১১ চনৰ লোকপিয়ল অনুসৰি অসমৰ মুঠ জনসংখ্যাৰ ১ কোটি ২৮ লাখ হৈছে ৬ বছৰৰ পৰা ১৮ বছৰৰ শিশু তথা কিশোৰ। ৰাজ্যৰ ভৱিষ্যত এই শিশু-কিশোৰসকলৰ সুৰক্ষা আমাৰ সকলোৰে দায়িত্ব।
তদুপৰি, শিশু-কিশোৰৰ বাবে কেন্দ্ৰীয় চৰকাৰৰ লগতে ৰাজ্য চৰকাৰৰো বহু আঁচনি আছে। উক্ত আঁচনিসমূহ কিদৰে ৰূপায়ন কৰিলে শিশুসকল অধিক উপকৃত হ’ব পাৰে সেয়া য়ুনিচেফৰ পৰা আমি জানিব পাৰিম বুলি অধ্যক্ষ গোস্বামীয়ে উল্লেখ কৰে।
শিশুৰ পুষ্টিহীনতা, শিশু সৰবৰাহ, ড্ৰাগছ আসক্তি আদি প্ৰতিৰোধৰ ক্ষেত্ৰতো অসম বিধানসভাই চুক্তিখনৰ জৰিয়তে য়ুনিচেফৰ পৰা সহযোগ লাভ কৰিব।
য়ুনিচেফৰ অসমৰ ভাৰপ্ৰাপ্ত বিষয়া শ্বেতা পাটনায়কে কয় যে মাতৃ গৰ্ভত থকাৰ পৰা এটি শিশুৰ জন্মৰ পৰৱৰ্তী ২ বছৰলৈকে মস্তিস্কৰ ৭৫ শতাংশ বিকাশ হয়। উক্ত সময়ছোৱা শিশুটিৰ বাবে অত্যন্ত গুৰুত্বপূৰ্ণ। এই সময়ছোৱাত শিশুটিৰ মাকে যাতে পুষ্টিহীনতাৰ চিকাৰ হ’বলগীয়া নহয় তাৰবাবে চৰকাৰে বিভিন্ন আঁচনিৰ যোগেদি পদক্ষেপ গ্ৰহণ কৰিব লাগিব।
অনুষ্ঠানত অসম বিধানসভাৰ প্ৰাক্তন অধ্যক্ষ দিলীপ পাল, বিধায়ক ডাঃ নোমল মমিন, মহিলা আৰু শিশু কল্যাণ সমিতিৰ অধ্যক্ষা তথা বিধায়িকা ৰজলিনা তিৰ্কী, সাংসদ আব্দুল খালেককে ধৰি কেইবাগৰাকীও ব্যক্তি উপস্থিত থাকি চুক্তিখনে অসম বিধানসভাৰ সদস্যসকলক ভৱিষ্যতে বহু সহায় কৰিব বুলি মত ব্যক্ত কৰে।
