নাগৰিকত্ব সংশোধনী বিধেয়কৰ বিৰুদ্ধে ৰাজ্যখনত তীব্ৰ প্ৰতিবাদৰ জোৱাৰ চলি থকাৰ মাজতে এইবাৰ লখিমপুৰৰ অগপ বিধায়ক উৎপল দত্তক লক্ষ্য কৰি লৈছে প্ৰতিবাদকাৰীয়ে।
লখিমপুৰৰ বিভিন্ন স্থানত বিধায়কগৰাকীৰ বিৰুদ্ধে “নিৰুদ্দেশ’ৰ পোষ্টাৰ আঁৰি অজ্ঞাত প্ৰতিবাদকাৰীয়ে তেওঁৰ বিৰুদ্ধে “কেব’ সম্পৰ্কত নিৰৱতা অৱলম্বন কৰাৰ বাবে কিছু ব্যংগাত্মক অভিযোগ উত্থাপন কৰিছে।
“নিৰ্বাচনত জাতিৰ নামত মই ভোট লওঁ কিন্তু’ বুলি শিৰোণাম দি পোষ্টাৰখনত লিখিছেঃ
(১)“কেবৰ বিৰুদ্ধে মোৰ মাত মাতিবলৈ সময় নাই কাৰণ মই সৰু বিয়া আৰু সকাম খোৱাত ব্যস্ত’’।
(২)“কেবৰ বিৰুদ্ধে মই নামাতো কাৰণ মই কৰা ঠিকা বিলাকৰ বিলসমূহ হিমন্ত বিশ্বই কাটি দিব।‘’
(৩) “জাতি যি হয় হওক, বাংলাদেশী আহিলেও আহক, অসম বাংলাদেশ হ’লেও হওক কেবল মই MLA হৈ থাকিলেই হ’ল।‘’
(৪) “আচলতে মই সকলো শুনো যদিও মই নিজৰ স্বাৰ্থ থাকিলে কলা হোৱাৰ ভাও কৰো।‘’
এইধৰণেই অগপ বিধায়ক উৎপল দত্তৰ বিৰুদ্ধে ক্ষোভ উজাৰিছে কেব বিৰোধী কোনো প্ৰতিবাদকাৰীয়ে।
উল্লেখযোগ্য যে অসম আন্দোলনৰ এগৰাকী নেতা উৎপল দত্ত পূৰ্বতে প্ৰাক্তন মুখ্য মন্ত্ৰী প্ৰফুল্ল কুমাৰ মহন্তৰ মন্ত্ৰীসভাত জনস্বাস্থ্য কাৰিকৰী মন্ত্ৰী হিচাপে কাৰ্যনিৰ্বাহ কৰিছিল।
মন্ত্ৰীত্বকালত দত্তৰ বিৰুদ্ধে দুৰ্নীতিৰ বহু অভিযোগ উত্থাপন হোৱাৰ উপৰি এবাৰ বিমানত বিদেশী মহিলাক অশালীন আচৰণ কৰাৰ বাবেও চৰ্চালৈ আহিছিল।
বিগত বিধানসভাৰ নিৰ্বাচনত লখিমপুৰৰ পৰা অগপৰ বিধায়ক হিচাপে নিৰ্বাচিত হৈ অহা উৎপল দত্তই চলিত কাৰ্যকালত অগপৰ মন্ত্ৰী-বিধায়কৰ লগতে বিজেপিৰ শৰণাপন্ন হয় আৰু অসমৰ খিলঞ্জীয়া জনসাধাৰণৰ স্বাৰ্থৰ প্ৰতি পিঠি দি সুবিধা লাভৰ বাবে ব্যস্ত হৈ পৰে।
নাগৰিকত্ব সংশোধনী বিধেয়কৰ বিৰুদ্ধে সমগ্ৰ ৰাজ্যখনতে চলি থকা বিভিন্ন জাতীয় সংগঠনৰ প্ৰতিবাদৰ সময়ত বিধায়কগৰাকীয়ে মৌনব্ৰত ধাৰণ কৰাৰ অভিযোগ উত্থাপিত হৈ আহিছে।