কোচ-ৰাজবংশী ভোটৰ অংক! কেন্দ্ৰীয় গৃহমন্ত্ৰী অমিত শ্বাহ আৰু অনন্ত ৰায়ৰ মাজত বৈঠক
আসন্ন অসম বিধানসভাৰ নিৰ্বাচন। সেয়েহে, কোচ-ৰাজবংশীসকলৰ ভোটৰ অংকত পুৱাই অসমলৈ ঢপলিয়াই আহিল কেন্দ্ৰীয় গৃহমন্ত্ৰী অমিত শ্বাহ।
বৃহস্পতিবাৰে চিৰাঙত মহাৰাজ অনন্ত ৰায়ৰ ঘৰত উপস্থিত হৈ তেওঁক সাক্ষাৎ কৰে অমিত শ্বাহে।
বিজেপিৰ বাবে অতি গুৰুত্বপূৰ্ণ ৰাজবংশী ভোটবেংক কুক্ষিগত কৰিবলৈ কেন্দ্ৰীয় মন্ত্ৰীগৰাকীয়ে অনন্ত ৰায় মহাৰাজৰ সৈতে গুৰুত্বপূৰ্ণ বৈঠকত মিলিত হয়।
কেন্দ্ৰীয় মন্ত্ৰীগৰাকীক আজি সংগ দিয়ে বিজেপিৰ ৰাজ্যিক সভাপতি ৰঞ্জিত দাস, মন্ত্ৰী হিমন্ত বিশ্ব শৰ্মা আৰু বিজেপিৰ ৰাষ্ট্ৰীয় সাধাৰণ সম্পাদক কৈলাশ বিজয়বৰ্গীয়। বিধানসভাৰ নিৰ্বাচনৰ পূৰ্বে এই বৈঠকে বিশেষ তাৎপৰ্য বহন কৰিছে।
প্ৰায় আধাঘন্টা ধৰি বৈঠকত আলোচনা কৰা হয়। জানিব পৰা মতে, অনন্ত ৰায় মহাৰাজে অমিত শ্বাহক বিজেপিৰ সৈতে থকাৰ আশ্বাস দিছে।
অৱশ্যে, মুকলিকৈ কোনোৱে এই কথা স্বীকাৰ কৰা নাই যদিও এক সন্তুষ্টি লৈ শ্বাহে ইয়াৰ পৰা কোচবিহাৰলৈ যাত্ৰা কৰা বুলি জানিব পৰা গৈছে।
অনন্ত ৰায়ৰ ঘৰৰ পৰা ওলাই কেন্দ্ৰীয় মন্ত্ৰীগৰাকীয়ে সংবাদমাধ্যমৰ আগত কোনো কথা প্ৰকাশ কৰাৰ পৰা বিৰত থাকে। মুঠতে ১৮.৫ লাখ কোচ ৰাজবংশী ভোটৰ অংকৰ সমীকৰণত অনন্ত ৰায়ৰ সৈতে অমিত শ্বাহে এক সিদ্ধান্ত উপনীত হোৱা বুলি অনুমান কৰা হৈছে।
উল্লেখ্য যে ২০১৬ ৰ নিৰ্বাচনত কোচ-ৰাজবংশীসকলক জনজাতিৰ মৰ্যাদা দিয়াৰ প্ৰতিশ্ৰুতিৰে বিজেপি বিধানসভাৰ নিৰ্বাচনী বৈতৰণী পাৰ কৰিছিল।
সেই প্ৰতিশ্ৰুতি এতিয়াও পালন কৰা হোৱা নাই। সূত্ৰ অনুসৰি, আজি দুইগৰাকী নেতাৰ মাজত এই সম্পৰ্কতো আলোচনা হোৱা বুলি কোৱা হৈছে।