‘CAA কেতিয়াও ঘূৰাই লোৱা নহ’ব, বিজেপি চৰকাৰে কেতিয়াও ইয়াক লৈ আপোচ নকৰে’: অমিত শ্বাহ

নাগৰিকত্ব সংশোধনী আইন (CAA) কেতিয়াও ঘূৰাই লোৱা নহ’ব বুলি উল্লেখ কৰি গৃহমন্ত্ৰী অমিত শ্বাহে কয় যে দেশত ভাৰতীয় নাগৰিকত্ব নিশ্চিত কৰাটো বিজেপি নেতৃত্বাধীন কেন্দ্ৰীয় চৰকাৰৰ ‘সাৰ্বভৌম সিদ্ধান্ত’।

সংবাদ সংস্থা এএনআইৰ সৈতে হোৱা এক সাক্ষাৎকাৰত কেন্দ্ৰীয় গৃহমন্ত্ৰী তথা ভাৰতীয় জনতা পাৰ্টিৰ নেতা অমিত শ্বাহে কয় যে `আমি কেতিয়াও ইয়াৰ সৈতে আপোচ নকৰো’।

কেন্দ্ৰই সোমবাৰে নাগৰিকত্ব (সংশোধনী) আইন, ২০১৯ কাৰ্যকৰী কৰাৰ কথা ঘোষণা কৰে। এই বিতৰ্কিত আইনখন গৃহীত হোৱাৰ চাৰি বছৰৰ পাছত এই পদক্ষেপে গ্ৰহণ কৰা হৈছে। ই পাকিস্তান, বাংলাদেশ আৰু আফগানিস্তানৰ পৰা নথি-পত্ৰবিহীন অমুছলমান প্ৰব্ৰজনকাৰীসকলৰ নাগৰিকত্বৰ পথ মুকলি কৰিছে।

লগতে পঢ়কঃ শ্বেয়াৰ বজাৰত বৃহৎ পতন; আদানীৰ ৬৬ হাজাৰ কোটি, আম্বানীৰ ৩০ হাজাৰ কোটিৰ লোকচান!

‘মুছলমানক লক্ষ্য কৰা’ বুলি অভিযোগ উত্থাপন কৰা একাংশ লোকৰ সমালোচনাৰ সন্মুখীন হৈছে CAA, যিটো অভিযোগ কেন্দ্ৰই নাকচ কৰিছে।

যিহেতু লোকসভা নিৰ্বাচনৰ সম্ভাৱ্য ঘোষণাৰ কিছুদিন পূৰ্বে CAAৰ নিয়মসমূহ অধিসূচনা কৰা হৈছে, সেয়েহে বিৰোধীয়ে বিজেপি নেতৃত্বাধীন কেন্দ্ৰৰ এই পদক্ষেপক “ভোট বেংকৰ ৰাজনীতি” বুলিও অভিহিত কৰিছে।

গৃহমন্ত্ৰী অমিত শ্বাহে এএনআইৰ সৈতে হোৱা সাক্ষাৎকাৰত বিৰোধীৰ আন কোনো কাম নাই বুলি উল্লেখ কৰি কয় যে প্ৰধানমন্ত্ৰী নৰেন্দ্ৰ মোডীয়ে যি কয় সেয়া শিলৰ ৰেখাত পৰিণত হয়।

অমিত শ্বাহে কয়, “বিৰোধীৰ আন কোনো কাম নাই, আনকি তেওঁলোকে কৈছিল যে চাৰ্জিকেল ষ্ট্ৰাইক আৰু এয়াৰ ষ্ট্ৰাইকত ৰাজনৈতিক লাভ আছে, গতিকে আমি সন্ত্ৰাসবাদৰ বিৰুদ্ধে ব্যৱস্থা গ্ৰহণ কৰিব নালাগেনে? তেওঁলোকে লগতে কৈছিল যে ৩৭০ অনুচ্ছেদ বাতিল কৰাটোও আমাৰ ৰাজনৈতিক লাভালাভৰ বাবে। আমি ১৯৫০ চনৰ পৰাই কৈ আহিছে যে আমি ৩৭০ অনুচ্ছেদ আঁতৰাই দিম।’

অসমত CAA ৰূপায়ণ আৰু CAA আৰু এনআৰচি (NRC)ৰ সংযোগ সন্দৰ্ভত কেন্দ্ৰীয় গৃহমন্ত্ৰী অমিত শ্বাহে কয় যে NRCৰ CAAৰ লগত কোনো সম্পৰ্ক নাই।

লগতে পঢ়কঃ কুকুৰৰ পৰা সাৱধান! ভাৰতত নিষিদ্ধ হ’ল পিটবুলকে ধৰি হিংস্ৰ কুকুৰ বিক্ৰী; আপোনাৰো আছে নেকি?

অমিত শ্বাহে কয় যে, “অসমৰ লগতে দেশৰ অন্যান্য প্ৰান্তত CAA কাৰ্যকৰী হ’ব। উত্তৰ-পূৰ্বাঞ্চলৰ যিবোৰ ৰাজ্যত দুই ধৰণৰ বিশেষ অধিকাৰ প্ৰদান কৰা হৈছে, সেইবোৰ ৰাজ্যতহে CAA কাৰ্যকৰী নহ’ব।”

ইয়াৰ ভিতৰত ইনাৰ লাইন পাৰ্মিট (আই এল পি)ৰ ব্যৱস্থা থকা ক্ষেত্ৰসমূহ আৰু সংবিধানৰ ষষ্ঠ অনুসূচীৰ অধীনত বিশেষ মৰ্যাদা প্ৰদান কৰা অঞ্চলসমূহ অন্তৰ্ভুক্ত বুলিও তেওঁ লগতে কয়।

কংগ্ৰেছৰ প্ৰাক্তন সভাপতি ৰাহুল গান্ধী আৰু তেওঁৰ দলৰ নাগৰিকত্ব সংশোধনী আইনৰ সমালোচনাক খাৰিজ কৰি অমিত শ্বাহে কংগ্ৰেছৰ নেতাক ৰাজহুৱা মঞ্চত উপস্থিত হৈ বিষয়টোৰ ওপৰত নিজৰ দলৰ আপত্তি সদৰী কৰিবলৈ প্ৰত্যাহ্বান জনায়।

অমিত শ্বাহে কয়, “মই আপোনালোকক অনুৰোধ জনাইছো যে বিষয়টো সন্দৰ্ভত ৰাহুল গান্ধীৰ বিতংভাৱে সাক্ষাৎকাৰ লওক আৰু তেওঁৰ CAAৰ বিৰোধিতা কৰাৰ কাৰণ সাধাৰণ জনতাক বুজাই দিয়ক। ৰাজনীতিত আপোনাৰ সিদ্ধান্তক ন্যায্যতা প্ৰদান কৰাটো আপোনাৰ দায়িত্ব। CAA যদি মোৰ চৰকাৰৰ সিদ্ধান্ত হয় তেন্তে মই মোৰ দলৰ স্থিতি, চৰকাৰৰ সিদ্ধান্ত আৰু কিয় জাতিৰ পক্ষত আছে সেই বিষয়ে বুজাই দিব লাগিব। একেদৰে ৰাহুল গান্ধীয়েও আইনখনৰ বিৰোধিতাৰ কাৰণ বুজাই দিব লাগে।’

লগতে পঢ়কঃ বাংলাদেশৰ পৰা অন্তৰ্ধান হোৱা ৩৯ লাখ হিন্দু বাংলাদেশী ক’ত? প্ৰশ্ন ৰাইজৰ দলৰ

কংগ্ৰেছৰ জ্যেষ্ঠ নেতা তথা ৰাজ্যসভাৰ সাংসদ জয়ৰাম ৰমেশে নাগৰিকত্ব সংশোধনী আইনৰ নিয়ম জাৰি কৰাৰ সময়ক লৈ প্ৰশ্ন উত্থাপন কৰিছে।

কংগ্ৰেছে অভিযোগ কৰে যে এয়া বিতৰ্কিত আইন কাৰণ নাগৰিকত্ব কেতিয়াও ধৰ্মৰ ওপৰত ভিত্তি কৰি নহয়, ই সংবিধানৰ বিৰুদ্ধে যায়।