প্লাষ্টিকৰ বটলভৰ্তি পানীত গুড়ি প্লাষ্টিকৰ কণা মিহলি থাকে বুলি ইতিমধ্যে বিজ্ঞানীসকলে তথ্য দিছে। শেহতীয়া গৱেষণাৰ পৰাও দেখা গৈছে যে প্লাষ্টিকৰ বটলত পানীৰ লগত বহু পৰিমাণে প্লাষ্টিকৰ কণা মিহলি হৈ থাকে। এই গুড়ি প্লাষ্টিক পানী খোৱাৰ সময়ত শৰীৰত প্ৰৱেশ কৰি শৰীৰত বিষাক্ত পদাৰ্থৰ মাত্ৰা বহুগুণে বৃদ্ধি কৰে।
খোৱাপানীক প্লাষ্টিকমুক্ত কৰাৰ এক আচৰিত আৱিষ্কাৰ কৰিছে বিজ্ঞানীসকলে। পানীৰ পৰা প্লাষ্টিক ফিল্টাৰ কৰি উলিয়াই দিব চুম্বকে! প্লাষ্টিকৰ কণিকাৰ দৰে সুক্ষ্ম এই চুম্বক। ইয়াৰ সৈতে স্পৰ্শ কৰাৰ লগে লগে গুড়ি গুড়ি মাইক্ৰ’প্লাষ্টিক নিৰ্মূল হ’ব।
কেন্টাকি মাৰ্টিন বিশ্ববিদ্যালয়ৰ খাদ্য আৰু পৰিৱেশ বিজ্ঞান বিভাগৰ অধ্যাপক-গৱেষকসকলে এক প্ৰকাৰৰ নেন’-মেগনেট উদ্ভাৱন কৰিছে যিয়ে মাইক্ৰ’প্লাষ্টিক নামৰ প্লাষ্টিকৰ অণুবীক্ষণিক কণাবোৰ ফিল্টাৰ কৰাত সহায় কৰিব।
‘ছায়েন্টিফিক ৰিপোৰ্টছ’ নামৰ বিজ্ঞান আলোচনীখনত এই গৱেষণাৰ খবৰ প্ৰকাশ পাইছে। ব্ৰিটেইনৰ কেমিকেল এণ্ড মেটেৰিয়েল ইঞ্জিনিয়াৰিং বিভাগৰ গৱেষকসকলো কেন্টাকি বিশ্ববিদ্যালয়ৰ সৈতে এই গৱেষণাৰ সৈতে জড়িত।
কেন্টাকি বিশ্ববিদ্যালয়ৰ গৱেষক জেৰেনা ক্ৰফচেকে কয় যে এই নেনো-মেগনেটৰ নাম NADES। এই চুম্বক বহুখিনি পানীৰ লগত মিহলি হ’লে ই তৰল হৈ পৰিব। তাৰ পিছত এটা এটাকৈ পানীত মিহলি হৈ থকা গুড়ি প্লাষ্টিকবোৰ ফিল্টাৰ কৰি উলিয়াই দিব। আনকি অতি সুক্ষ্ম প্লাষ্টিকৰ কণাবোৰো এই চুম্বকটোৰ স্পৰ্শত লাগি ধৰিব।
অতি সূক্ষ্ম প্লাষ্টিকৰ কণাবোৰক নেন’প্লাষ্টিক বোলা হয়। গৱেষণাৰ মতে ১ লিটাৰ প্লাষ্টিকৰ বটলত ভৰোৱা পানীত (৩৩ আউন্স) কমেও ২ লাখ ৪০ হাজাৰ প্লাষ্টিকৰ কণা মিহলি হৈ থাকে। ইয়াক খালী চকুৰে দেখা পোৱা নাযায়। পানীৰ সৈতে শৰীৰত প্ৰৱেশ কৰি তেজৰ লগত মিহলি হয়। ৫ মিলিমিটাৰতকৈ সৰু প্লাষ্টিকৰ যিকোনো অংশক মাইক্ৰ’প্লাষ্টিক বোলা হয়।
ইয়াৰ পূৰ্বে মানুহৰ কোষত, পৰীক্ষাগাৰৰ প্ৰাণীত আৰু সাগৰীয় প্ৰাণীৰ শৰীৰত মাইক্ৰ’প্লাষ্টিক পোৱা গৈছে। কিন্তু জীৱিত মানুহৰ ওপৰত এই প্ৰদূষকৰ ভূমিকা এতিয়াও জানিব পৰা হোৱা নাছিল। কিন্তু শেহতীয়াকৈ মাতৃদুগ্ধত মাইক্ৰ’প্লাষ্টিকৰ উপস্থিতি পোৱাৰ পিছত বিজ্ঞানীসকলে ইয়াৰ ক্ষতিকাৰক প্ৰভাৱৰ ওপৰত আলোকপাত কৰিছে।
গৱেষকসকলে কয় যে খাদ্য আৰু পানীৰ জৰিয়তে প্লাষ্টিকৰ কণাবোৰ শৰীৰত প্ৰৱেশ কৰে। বিশেষকৈ প্লাষ্টিকৰ বটলত পলিইথাইলিন টেট্ৰাফ্যালেট থাকে, যাৰ সুক্ষ্ম কণাবোৰ বটলত ভৰোৱা পানীৰ সৈতে মিহলি হৈ থাকে। শুকান খাদ্য পেকিং কৰা প্লাষ্টিকত পলিলেক্টিক এচিড থাকে। এই ধৰণৰ প্লাষ্টিক ফুড কন্টেইনাৰবোৰতো ব্যৱহাৰ কৰা হয়।
গৱেষণাৰ পৰা দেখা গৈছে যে এই মাইক্ৰ’প্লাষ্টিকতকৈও সুক্ষ্ম নেন’প্লাষ্টিক বটলৰ পানীত পোৱা গৈছে। ইহঁতৰ দৈৰ্ঘ্য ১ৰ পৰা ৫০০০ মাইক্ৰ’মিটাৰৰ দৰে। মানুহৰ মূৰৰ চুলিতকৈ মিহি। প্লাষ্টিকৰ বটলৰ পানীত এই মিহি প্লাষ্টিকৰ কণাবোৰ থাকে যিবোৰ শৰীৰত প্ৰৱেশ কৰে। নেনো-মেগনেটে এই প্লাষ্টিক কণাবোৰ ফিল্টাৰ কৰি পানী বিশুদ্ধ কৰাৰ কাম কৰিব।
