পেছাদাৰী মিডিয়া উপদেষ্টাৰ অভাৱে অসমৰ বিজেপি চৰকাৰ বিশেষকৈ মুখ্য মন্ত্ৰী সৰ্বানন্দ সোণোৱালক পেলাইছে ভীষণ অস্বস্তিকৰ পৰিস্থিতিত।
অসম প্ৰশাসনীয় প্ৰাধিকাৰী মহাবিদ্যালয়ৰ এক অনুষ্ঠানত বুধবাৰে দুঘণ্টা পলমকৈ উপস্থিত হৈ সাংবাদিকৰ সন্মুখত মুখ্য মন্ত্ৰীয়ে ক্ষমা বিচাৰিব লগা হোৱাটো নিশ্চিতভাৱে অস্বস্তিকৰ কথা। অনুষ্ঠানটো আছিল সাংবাদিকক স্বীকৃতি পত্ৰ বিতৰণৰ।
ৰাজ্যৰ তথ্য আৰু জনসম্পৰ্ক বিভাগৰ সঞ্চালক ৰাজীৱ প্ৰকাশ বৰুৱাৰ চূড়ান্ত অপেছাদাৰিত্বৰ বাবেই কৰ্মসূত্ৰে খুব ব্যস্ত থকা সাংবাদিকসকলে নষ্ট কৰিব লগা হয় দিনটোৰ দুঘণ্টাকৈ মূল্যৱান কৰ্ম সময়।
‘অনুষ্ঠানটোৰ নিৰ্ধাৰিত সূচী আবেলি ২ বজা বুলি আমাক আমন্ত্ৰণ জনোৱা হৈছিল। আবেলি ২ বজাত অনুষ্ঠানটোত উপস্থিত হ’বলৈ ১.৪৫ত মই তথ্য সঞ্চালকৰ কাৰ্য্যালয়ৰ পৰা ফ’ন পাইছিলো,’ নৰ্থ ইষ্ট নাও-ক জনালে এগৰাকী সাংবাদিকে।
মুখ্য মন্ত্ৰীৰ পৰা পৰিচয় পত্ৰ গ্ৰহণৰ নামত শাৰী পতা আৰু ইমান দীঘলীয়া সময় ধৰি অপেক্ষা কৰোৱাৰ কোনো অৰ্থ নাই বুলিও আনকি একাংশ সাংবাদিকে মন্তব্য কৰিছে। ‘পৰিচয় পত্ৰখনৰ এনে কি বিশেষ বস্তু যে ইয়াক মুখ্য মন্ত্ৰীয়ে বিতৰণ কৰিব লগা হৈছে?’ তেওঁৰ প্ৰশ্ন।
মিডিয়া উপদেষ্টা হৃষীকেশ গোস্বামী আৰু ৰাজীৱ প্ৰকাশ বৰুৱাই জনা নাছিল নেকি যে অসম বিধান সভাত চাৰিখন কলেজৰ ছাত্ৰ-ছাত্ৰীৰ সৈতে মুখ্য মন্ত্ৰীৰ মত বিনিময় অনুষ্ঠান আছিল? বৰুৱাই অনুষ্ঠানটোৰ সূচী দুঘণ্টা পিছুওৱা হৈছে বুলি সাংবাদিকসকলক জনাব (এছ এম এছ/ ৱাটচ এপ বা ই-মে’ইলৰ জৰিয়তে) পাৰিলেহেঁতেন।
চৰফৰাজ খান নামৰ এগৰাকী সাংবাদিকৰ অভিযোগ চৰকাৰৰ বাবে আৰু অধিক অস্বস্তিকৰ। ‘ৰাজীৱ প্ৰকাশ বৰুৱাই পৰিচয় পত্ৰখন ল’বৰ বাবে মোক পত্ৰযোগে নিমন্ত্ৰণ কৰিছিল। কিন্তু মই নাপালো,’ খানে জনায়।
পৰিচয় পত্ৰ নোপোৱা সাংবাদিকগৰাকীয়ে লগতে জনাই যে এই সন্দৰ্ভত আনকি একো কাৰণো দৰ্শাব পৰা নাই বৰুৱাই। ‘মোৰ কাৰ্ডখন ল’বলৈ অনুষ্ঠানটোলৈ আহিবলৈ বৰুৱাৰ কাৰ্য্যালয়ৰ পৰা মই কেইবাবাৰো ফ’ন পাইছিলো। এতিয়া গম পালো যে মোৰ কাৰ্ডখন হেৰাইছে,’ জনালে খানে।
বৰুৱা অসম অসামৰিক সেৱাৰ বিষয়া আৰু ৩০ ছেপ্তেম্বৰত তেওঁ অৱসৰ লোৱাৰ কথা। কাৰ্য্যকাল বৃদ্ধিৰ বাবে কৰা বৰুৱাৰ আবেদন এতিয়াও শূন্যত ওলমি আছে।
কিন্তু সোণোৱালৰ প্ৰতিশ্ৰুতি সত্বেও নতুন বিজ্ঞাপন নীতি আৰু ডিজিটেল তথ্য সঞ্চালকালয়ৰ ৰূপ দিয়াত পুতৌজনকভাৱে ব্যৰ্থ হৈছে বৰুৱা।
